Read Buku Lopatulik Masalmo 71 Bible Online

Masalmo 71 - Buku Lopatulik bible

Masalmo 71

¹Ndikhulupirira Inu, Yehova: Ndisacite manyazi nthawi zonse.

²Ndikwatuleni m'cilungamo canu, ndi kundilanditsa: Ndicherereni khutu lanu ndi kundipulumutsa.

³Mundikhalire thanthwe lokhalamo, lopitako kosaleka; Mwalamulira kundipulumutsa; Popeza Inu ndinu thanthwe langa ndi linga langa,

⁴Ndilanditseni, Mulungu wanga, m'dzanja la woipa, M'dzanja la munthu wosalungama ndi waciwawa.

⁵Pakuti Inu ndinu ciyembekezo canga, Ambuye Yehova; Mwandikhalira wokhulupirika kuyambira ubwana wanga.

⁶Inu munandigwirizizakuyambira ndisanabadwe: Kuyambira pa thupi la mai wanga wondicitira zokoma ndinu; Ndidzakulemekezani kosalekeza.

⁷Ndikhala codabwiza kwa ambiri; Koma Inu ndinu pothawira panga polimba.

⁸M'kamwa mwanga mudzadzala lemekezo lanu, Ndi ulemu wanu tsiku lonse.

⁹Musanditaye mu ukalamba wanga; Musandisiye, pakutha mphamvu yanga.

¹⁰Pakuti adani anga alankhula za ine; Ndipo iwo akulalira moyo wanga apangana upo,

¹¹Ndi kuti, Wamsiya Mulungu: Mlondoleni, mgwireni; popeza palibe wompulumutsa,

¹²Musandikhalire kutali, Mulungu; Fulumirani kundithandiza, Mulungu;

¹³Adani a moyo wanga acite manyazi, nathawe; Cotonza ndi cimpepulo zikute ondifunira coipa,

¹⁴Koma ine ndidzayembekeza kosaleka, Ndipo ndidzaonjeza kukulemekezani.

¹⁵Pakamwa panga padzafotokozera cilungamo canu, Ndi cipulumutso canu tsiku lonse; Pakuti sindidziwa mawerengedwe ace.

¹⁶Ndidzamuka mu mphamvu ya Ambuye Yehova; Ndidzachula cilungamo canu, inde canu cokha.

¹⁷Mulungu, mwandiphunzitsa kuyambira ubwana wanga; Ndipo kufikira lero ndilalikira zodabwiza zanu.

¹⁸Poteronso pokalamba ine ndi kukhala nazo imvi musandisiye, Mulungu; Kufikira nditalalikira mbadwo uwu za dzanja lanu, Mphamvu yanu kwa onse akudza m'mbuyo.

¹⁹Cilungamo canunso, Mulungu, cifikira kuthambo; Inu amene munacita zazikuru, Akunga Inu ndani, Mulungu?

²⁰Inu, amene munationetsa nsautso zambiri ndi zoipa, Mudzatipatsanso moyo, Ndi kutitenganso munsi mwa dziko.

²¹Mundionjezere ukulu wanga, Ndipo munditembenukire kundisangalatsa,

²²Ndiponso ndidzakuyamikani ndi cisakasa, Kubukitsa coonadi canu, Mulungu wanga; Ndidzakuyimbirani Nyimbo ndi zeze, Ndinu Woyerayo wa Israyeli.

²³Milomo yanga idzapfuula mokondwera poyimbira Inu Nyimbo; Inde, moyo wanga umene munaombola.

²⁴Lilime langa lomwe lidzalankhula za cilungamo canu tsiku lonse: Pakuti ofuna kundicitira coipa acita manyazi, nadodoma.