Read Buku Lopatulik Masalmo 74 Bible Online

Masalmo 74 - Buku Lopatulik bible

Masalmo 74

¹Mulungu, munatitayiranji citayire? Mkwiyo wanu ufukiranji pa nkhosa za kubusa kwanu?

²Kumbukilani msonkhano wanu, umene munaugula kale, Umene munauombola ukhale pfuko la colandira canu; Phiri La Ziyoni limene mukhalamo.

³Nyamulani mapazi anu kukapenya mapasukidwe osatha, Zoipa zonse adazicita mdani m'malo opatulika.

⁴Otsutsana ndi Inu abangula pakati pa msonkhano wanu; Aika mbendera zao zikhale zizindikilo.

⁵Anaoneka ngati osamula nkhwangwa kunkhalango.

⁶Ndipo tsopano aphwanya zosemeka zace zonse Ndi nkhwangwa ndi nyundo,

⁷Anatentha malo anu opatulika; Anaipsa ndi kugwetsa pansi mokhalamo dzina lanu.

⁸Ananena mumtima mwao, Tiwapasule pamodzi; Anatentha zosonkhaniramo za Mulungu zonse, m'dzikomo.

⁹Sitiziona zizindikilo zathu; Palibenso mneneri; Ndipo mwa ife palibe wina wakudziwa mpaka liti.

¹⁰Wotsutsanayo adzatonza kufikira liti, Mulungu? Kodi mdani adzanyoza dzina lanu nthawi yonse?

¹¹Mubwezeranji dzanja lanu, ndilo dzanja lamanja lanu? Muliturutse ku cifuwa canu ndipo muwatheretu.

¹²Koma Mulungu ndiye mfumu yanga kuyambira kale, Wocita zakupulumutsa pakati pa dziko lapansi.

¹³Mudagawa nyanja ndi mphamvu yanu; Mudaswa mitu ya zoopsa za m'madzi.

¹⁴Mudaphwanya mitu ya livyatanu; Mudampereka akhale cakudya ca iwo a m'cipululu.

¹⁵Mudagawa kasupe ndi mtsinje; Mudaphwetsa mitsinje yaikuru.

¹⁶Usana ndi wanu, usikunso ndi wanu: Munakonza kuunika ndi dzuwa.

¹⁷Munaika malekezero onse a dziko lapansi; Munalenga dzinja ndi malimwe.

¹⁸Mukumbukile ici, Yehova, mdaniyo anatonza, Ndipo anthu opusa ananyoza dzina lanu.

¹⁹Musapereke moyo wa njiwa yanu kwa cirombo; Musamaiwala moyo wa ozunzika anu nthawi yonse.

²⁰Samalirani cipanganoco; Pakuti malo amdima a m'dziko adzala ndi zokhalamo ciwawa.

²¹Okhalira mphanthi asabwere nao manyazi; Wozunzika ndi waumphawi alemekeze dzina lanu.

²²Nyamukani, Mulungu, mudzinenere mlandu nokha; Kumbukilani momwe akutonzani wopusa tsiku lonse.

²³Musaiwale mau a iwo otsutsana ndi Inu; Kusokosera kwa iwo akuukirani Inu kumakweca kosaleka.