Read Buku Lopatulik Masalmo 75 Bible Online

Masalmo 75 - Buku Lopatulik bible

Masalmo 75

¹Tikuyamikani Inu, Mulungu; Tiyamika, pakuti dzina lanu liri pafupi; Afotokozera zodabwiza zanu,

²Pakuona nyengo yace ndidzaweruza molunjika.

³Lasungunuka dziko lapansi, ndi onse okhalamo; Ndinacirika mizati yace.

⁴Ndinati kwa odzitamandira, Musamacita zodzitamandira; Ndi kwa oipa, Musamakweza nyanga;

⁵Musamakwezetsa nyanga yanu; Musamalankhula ndi khosi louma.

⁶Pakuti kukuzaku sikucokera kum'mawa, Kapena kumadzulo, kapena kucipululu,

⁷Pakuti Mulungu ndiye woweruza; Acepsa wina, nakuza wina.

⁸Pakuti m'dzanja la Yehova muli cikho; Ndi vinyo wace acita thobvu; Cidzala ndi zosanganizira, ndipo atsanulako: Indedi, oipa onse a pa dziko lapansi adzamwa Nadzagugudiza nsenga zace.

⁹Koma ine ndidzalalikira kosalekeza, Ndidzayimbira zomlemekeza Mulungu wa Yakobo.

¹⁰Ndipo ndidzatseteka nyanga zonse za oipa; Koma nyanga za wolungama zidzakwezeka.