Read Buku Lopatulik Masalmo 78 Bible Online

Masalmo 78 - Buku Lopatulik bible

Masalmo 78

¹Tamverani, anthu anga, cilamulo canga; Cherezani khutu lanu mau a pakamwa panga.

²Ndidzatsegula pakamwa panga mofanizira; Ndidzachula zinsinsi zoyambira kale;

³Zimene tinazimva, ndi kuzidziwa, Ndipo makolo athu anatifotokozera.

⁴Sitidzazibisira ana ao, Koma kufotokozera mbadwo ukudzawo zolemekeza za Yehova, Ndi mphamvu yace, ndi zodabwiza zace zimene anazicita.

⁵Anakhazika mboni mwa Yakobo, Naika cilamulo mwa Israyeli, Ndizo analamulira atate athu, Akazidziwitse ana ao;

⁶Kuti mbadwo ukudzawo udziwe, ndiwo ana amene akadzabadwa; Amene adzaimirira nadzafotokozera ana ao:

⁷Ndi kuti ciyembekezo cao cikhale kwa Mulungu, Osaiwala zocita Mulungu, Koma kusunga malamulo ace ndiko.

⁸Ndi kuti asange makolo ao, Ndiwo mbadwo woukirana ndi wopikisana ndi Mulungu; Mbadwo wosakonza mtima wao, Ndi mzimu wao sunakhazikika ndi Mulungu.

⁹Ana a Efraimu okhala nazo zida, oponya nao mauta, Anabwerera m'mbuyo tsiku la nkhondo.

¹⁰Sanasunga cipangano ca Mulungu, Nakana kuyenda m'cilamulo cace.

¹¹Ndipo anaiwala zocita Iye, Ndi zodabwiza zace zimene anawaonetsa.

¹²Anacita codabwiza pamaso pa makolo ao, M'dziko la Aigupto ku cidikha ca Zoanu.

¹³Anagawa nyanja nawapititsapo; Naimitsa madziwo ngati khoma.

¹⁴Ndipo msana anawatsogolera ndi mtambo Ndi usiku wonse ndi kuunika kwa moto.

¹⁵Anang'alula thanthwe m'cipululu, Ndipo anawamwetsa kocuruka monga m'madzi ozama.

¹⁶Anaturukitsa mitsinje m'thanthwe, Inde anatsikitsa madzi ngati mitsinje.

¹⁷Koma anaonjeza kuincimwira Iye, Kupikisana ndi Wam'mwambamwamba m'cipululu.

¹⁸Ndipo anayesa Mulungu mumtimamwao Ndi kupempha cakudya monga mwa kulakalaka kwao.

¹⁹Ndipo analankhula motsutsana ndi Mulungu; Anati, Kodi Mulungu akhoza kutikonzera podyera m'cipululu?

²⁰Taonani, anapanda thanthwe, ndi madzi anayendako Ndi mitsinje inasefuka; Kodi adzakhozanso kupatsa mkate? Kodi adzafunira anthu ace nyama?

²¹Cifukwa cace Yehova anamva, nakwiya; Ndipo anayatsa moto pa Yakobo, Ndiponso mkwiyo unakwera pa Israyeli;

²²Popeza sanakhulupirira Mulungu, Osatama cipulumutso cace.

²³Koma analamulira mitambo iri m'mwamba, Natsegula m'makomo a kumwamba.

²⁴Ndipo anawabvumbitsira mana, adye, Nawapatsa tirigu wa kumwamba.

²⁵Yense anadya mkate wa omveka: Anawatumizira cakudya cofikira,

²⁶Anaombetsa m'mwamba mphepo ya kum'mawa: Natsogoza mwela ndi mphamvu yace.

²⁷Ndipo anawabvumbitsira nyama ngati pfumbi, Ndi mbalame zouluka ngati mcenga wa kunyanja:

²⁸Ndipo anazigwetsa pakati pa misasa yao, Pozungulira pokhala iwo.

²⁹Potero anadya nakhuta kwambiri; Ndipo anawapatsa cokhumba iwo.

³⁰Asanathe naco cokhumba cao, Cakudya cao ciri m'kamwa mwao,

³¹Pamenepo mkwiyo wa Mulungu unawaukira, Ndipo anapha mwa onenepa ao, Nagwetsa osankhika a Israyeli.

³²Cingakhale ici conse anacimwanso, Osabvomereza zodabwiza zace.

³³Potero anathera masiku ao ndi zopanda pace, Ndi zaka zao mwa mantha.

³⁴Pamene anawapha ndipo anamfuna Iye; Nabwerera, nafunitsitsa Mulungu,

³⁵Ndipo anakumbukila kuti Mulungu ndiye thanthwe lao, Ndi Mulungu Wam'mwambamwamba Mombolo wao.

³⁶Koma anamsyasyalika pakamwa pao, Namnamiza ndi lilime lao.

³⁷Popeza mtima wao sunakonzekera Iye, Ndipo sanakhazikika m'cipangano cace.

³⁸Koma Iye pokhala ngwa cifundo, Anakhululukira coipa, osawaononga; Nabweza mkwiyo wace kawiri kawiri, Sanautsa ukali wace wonse.

³⁹Ndipo anakumbukira kuti iwo ndiwo anthu; Mphepo yopita yosabweranso.

⁴⁰Kawiri kawiri nanga anapikisana ndi Iye kucigwako, Nammvetsa cisoni m'cipululu.

⁴¹Pakuti anabwerera m'mbuyo, nayesa Mulungu, Nacepsa Woyerayo wa Israyeli.

⁴²Sanakumbukila dzanja lace, Tsikuli anawaombola kwa msautsi.

⁴³Amene anaika zizindikilo zace m'Aigupto, Ndi zodabwiza zace ku cidikha ca Zoanu;

⁴⁴Nasanduliza nyanja yao mwazi, Ndi mitsinje yao, kuti sangakhoze kumwa.

⁴⁵Anawatumizira pakati pao mitambo ya nchenche zakuwatha; Ndi acule akuwaononga.

⁴⁶Ndipo anapatsa mphuci dzinthu dzao, Ndi dzombe nchito yao.

⁴⁷Anapha mphesa zao ndi matalala, Ndi mikuyu yao ndi cisanu.

⁴⁸Naperekanso zoweta zao kwa matalala, Ndi ng'ombe zao kwa mphezi.

⁴⁹Anawatumizira mkwiyo wace wotentha, Kuzaza, ndi kupsa mtima, ndi nsautso, Ndizo gulu la amithenga ocita zoipa.

⁵⁰Analambulira mkwiyo wace njira; Sanalekerera moyo wao usafe, Koma anapereka moyo wao kumliri;

⁵¹Ndipo anapha ana oyamba onse a mu Aigupto, Ndiwo oyamba a mphamvu yao m'mahema a Hamu:

⁵²Koma anaturutsa anthu ace ngati nkhosa, Nawatsogoza ngati gulu la zoweta m'cipululu.

⁵³Ndipo anawatsogolera mokhulupirika, Kotero kuti sanaopa; Koma nyanja inamiza adani ao.

⁵⁴Ndipo anawafikitsa ku malire a malo ace oyera, Ku phiri ili, dzanja lamanja lace lidaligula.

⁵⁵Ndipo anapitikitsa amitundu pamaso pao, Nawagawira colowa cao, ndi muyeso, Nakhalitsa mafuko a Israyeli m'mahema mwao.

⁵⁶Koma anamuyesa napikisana ndi Mulungu Wam'mwambamwamba, Osasunga mboni zace;

⁵⁷Koma anabwerera m'mbuyo, nacita zosakhulupirika monga makolo ao: Anapatuka ngati uta wolenda,

⁵⁸Ndipo anautsa mtima wace ndi malo amsanje ao, Namcititsa nsanje ndi mafano osema.

⁵⁹Pakumva ici Mulungu, anakwiya, Nanyozatu Israyeli;

⁶⁰Ndipo anacokera cokhalamo ca ku Silo, Cihemaco adacimanga mwa anthu;

⁶¹Napereka mphamvu yace m'ukapolo, Ndi ulemerero wace m'dzanja la msautsi.

⁶²Naperekanso anthu ace kwa lupanga; Nakwiya naco colandira cace.

⁶³Moto unapsereza anyamata ao; Ndi anamwali ao sanalemekezeka.

⁶⁴Ansembe ao anagwa ndi lupanga; Ndipo amasiye ao sanacita maliro.

⁶⁵Pamenepo Ambuye anauka ngati wam'tulo; Ngati ciphona cakucita nthungululu ndi vinyo.

⁶⁶Ndipo anapanda otsutsana naye kumbuyo; Nawapereka akhale otonzeka kosatha.

⁶⁷Tero anakana hema wa Yosefe; Ndipo sanasankha pfuko la Efraimu;

⁶⁸Koma anasankha pfuko la Yuda, Phiri la Ziyoni limene analikonda.

⁶⁹Ndipo anamanga malo oyera ace ngati kaphiri, Monga dziko lapansi limene analikhazikitsa kosatha.

⁷⁰Ndipo anasankha Davide mtumiki wace, Namtenga ku makola a nkhosa:

⁷¹Anamtenga kuja anatsata zoyamwitsa, Awete Yakobo, anthu ace, ndi Israyeli, colandira cace.

⁷²Potero anawaweta monga mwa mtima wace wangwiro; Nawatsogolera ndi luso la manja ace.