Read Buku Lopatulik Masalmo 86 Bible Online

Masalmo 86 - Buku Lopatulik bible

Masalmo 86

¹Cherani khutu lanu Yehova, mundiyankhe; Pakuti ine ndine wozunzika ndi waumphawi.

²Sungani moyo wanga pakuti ine ndine wokondedwa wanu; Inu Mulungu wanga, pulumutsani mtumiki wanu wokhulupirira Inu.

³Mundicitire cifundo, Ambuye; Pakuti tsiku lonse ndiitana Inu.

⁴Kondwetsani moyo wa mtumiki wanu; Pakuti ndikwezera moyo wanga kwa Inu, Ambuye.

⁵Pakuti fnu, Ambuye, ndinu wabwino, ndi wokhululukira, Ndi wa cifundo cocurukira onse akuitana Inu.

⁶Cherani khutu pemphero langa, Yehova; Nimumvere mau a kupemba kwanga,

⁷Tsiku la msauko wanga ndidzaitana Inu; Popeza mudzandibvomereza.

⁸Pakati pa milungu palibe wina wonga Inu, Ambuye; Ndipo palibe nchito zonga zanu.

⁹Amitundu onse mudawalenga adzadza nadzagwada pamaso panu, Ambuye; Nadzalemekeza dzina lanu.

¹⁰Pakuti Inu ndinu wamkulu, ndi wakucita zodabwiza; Inu ndinu Mulungu, nokhanu.

¹¹Mundionetse njira yanu, Yehova; ndidzayenda m'coonadi canu: Muumbe mtima wanga ukhale umodzi kuti uliope dzina lanu.

¹²Ndidzakuyamikani, Ambuye, Mulungu wanga, ndi mtima wanga wonse; Ndipo ndidzalemekeza dzina lanu nthawi zonse.

¹³Pakuti cifundo canu ca pa ine ncacikuru; Ndipo munalanditsa moyo wanga kunsi kwa manda.

¹⁴Mulungu, odzikuza andiukira, Ndi msonkhano wa anthu oopsa afuna moyo wanga, Ndipo sanaika Inu pamaso pao.

¹⁵Koma Inu, Ambuye, ndinu Mulungu wansoni ndi wacisomo, Wosapsa mtima msanga, ndi wocurukira cifundo ndi coonadi.

¹⁶Mundibwerere ine, ndi kundicitira cifundo; Mpatseni mtumiki wanu mphamvu yanu, Ndipo pulumutsani mwana wa mdzakazi wanu.

¹⁷Mundicitire cizindikilo coti cabwino; Kuti ondida acione, nacite manyazi, Popeza Inu, Yehova, munandithandiza ndi kundisangalatsa,