Read Buku Lopatulik Masalmo 89 Bible Online

Masalmo 89 - Buku Lopatulik bible

Masalmo 89

¹Ndidzayimbira zacifundo za Yehova nthawi yonse: Pakamwa panga ndidzadziwitsira cikhulupiriko canu ku mibadwo mibadwo.

²Pakuti ndinati, Cifundo adzacimanga kosaleka; Mudzakhazika cikhulupiriko canu m'Mwamba mweni mweni.

³Ndinacita cipangano ndi wosankhika wanga, Ndinalumbirira Davide mtumiki wanga:

⁴Ndidzakhazika mbeu yako ku nthawi yonse, Ndipo ndidzamanga mpando wacifumu wako ku mibadwo mibadwo.

⁵Ndipo kumwamba kudzalemekeza zodabwiza zanu, Yehova; Cikhulupiriko canunso mu msonkhano wa oyera mtima.

⁶Pakuti kuli yani kuthambo timlinganize ndi Yehova? Afanana ndi Yehova ndani mwa ana a amphamvu?

⁷Ndiye Mulungu, ayenera kumuopa kwambiri m'upo wa oyera mtima, Ndiye wocititsa mantha koposa onse akumzinga.

⁸Yehova, Mulungu wa makamu, wamphamvu ndani wonga Inu, Yehova? Ndipo cikhulupiriko canu cikuzingani.

⁹Inu ndinu wakucita ufumu pa kudzikuza kwa nyanja; Pakuuka mafunde ace muwacititsa bata.

¹⁰Mudathyola Rahabu, monga munthu wophedwa; Munabalalitsa adani anu ndi mkono wa mphamvu yanu.

¹¹Kumwamba ndi kwanu, dziko lapansi lomwe ndi lanu; Munakhazika dziko lokhalamo anthu ndi kudzala kwace.

¹²Munalenga kumpoto ndi kumwela; Tabora ndi Hermoni apfuula mokondwera m'dzina lanu.

¹³Muli nao mkono wanu wolimba; M'dzanja mwanu muli mphamvu, dzanja lamanja lanu nlokwezeka.

¹⁴Cilungamo ndi ciweruzo ndiwo maziko a mpando wacifumu wanu; Cifundo ndi coonadi zitsogolera pankhope panu.

¹⁵Odala anthu odziwa liu la lipenga; Ayenda m'kuunika kwa nkhope yanu, Yehova.

¹⁶Akondwera m'dzina lanu tsiku lonse; Ndipo akwezeka m'cilungamo canu.

¹⁷Popeza Inu ndinu ulemerero wa mphamvu yao; Ndipo potibvomereza Inu nyanga yathu idzakwezeka.

¹⁸Pakuti cikopa cathu cifuma kwa Yehova; Ndi mfumuyathu kwa Woyera wa Israyeli.

¹⁹Pamenepo munalankhula m'masompenya ndi okondedwa anu, Ndipo mudati, Ndasenza thandizo pa ciphona; Ndakweza wina wosankhika mwa anthu.

²⁰Ndapeza Davide mtumiki wanga; Ndamdzoza mafuta anga oyera.

²¹Amene dzanja langa lidzakhazikika naye; Inde mkono wanga udzalimbitsa.

²²Mdani sadzamuumira mtima; Ndi mwana wa cisalungamo sadzamzunza.

²³Ndipo ndidzaphwanya omsautsa pamaso pace; Ndidzapandanso odana naye.

²⁴Koma cikhulupiriko canga ndi cifundo canga zidzakhala naye; Ndipo nyanga yace idzakwezeka m'dzina langa.

²⁵Ndipo ndidzaika dzanja lace panyanja, Ndi dzanja lamanja lace pamitsinje.

²⁶Iye adzandichula, ndi kuti, Inu ndinu Atate wanga, Mulungu wanga, ndi thanthwe la cipulumutso canga.

²⁷Inde ndidzamuyesa mwana wanga woyamba, Womveka wa mafumu a pa dziko lapansi.

²⁸Ndidzamsungira cifundo canga ku nthawi yonse, Ndipo cipangano canga cidzalimbika pa iye.

²⁹Ndidzakhalitsanso mbeu yace cikhalire, Ndi mpando wacifumu wace ngati masiku a m'mwamba.

³⁰Ana ace akataya cilamulo canga, Osayenda m'maweruzo anga:

³¹Nakaipsa malembo anga; Osasunga malamulo anga;

³²Pamenepo ndidzazonda zolakwa zao ndi ndodo, Ndi mphulupulu zao ndi mikwingwirima.

³³Koma sindidzamcotsera cifundo canga conse, Ndi cikhulupiriko canga sicidzamsowa.

³⁴Sindidzaipsa cipangano canga, Kapena kusintha mau oturuka m'milomo yanga.

³⁵Ndinalumbira kamodzi m'ciyero canga; Sindidzanamizira Davide;

³⁶Mbeu yace idzakhala ku nthawi yonse, Ndi mpando wacifumu wace ngati dzuwa pamaso panga.

³⁷Udzakhazikika ngati mwezi ku nthawi yonse, Ndi ngati mboni yokhulupirika kuthambo.

³⁸Koma Inu munamtaya, nimunamkaniza, Munakwiya naye wodzozedwa wanu.

³⁹Munakaniza cipangano ca mtumiki wanu; Munaipsa korona wace ndi kumponya pansi,

⁴⁰Munapasula maguta ace onse; Munagumula malinga ace.

⁴¹Onse opita panjirapa amfunkhira: Akhala cotonza ca anansi ace.

⁴²Munakweza dzanja lamanja la iwo omsautsa; Munakondweretsa adani ace onse.

⁴³Munapinditsa kukamwa kwace kwa lupanga lace, Osamuimika kunkhondo.

⁴⁴Munaleketsa kuwala kwace, Ndipo munagwetsa pansi mpando wacifumu wace.

⁴⁵Munafupikitsa masiku a mnyamata wace; Munamkuta nao manyazi.

⁴⁶Mudzabisala kosatha kufikira liti, Yehova; Ndi kuzaza kwanu kudzatentha ngati moto kufikira liti?

⁴⁷Kumbukilani kuti nthawi yanga njapafupi; Munalengeranji ana onse a anthu kwacabe?

⁴⁸Munthu ndani amene adzakhalabe ndi moyo, osaona imfa? Amene adzapulumutsa moyo wace ku mphamvu ya manda?

⁴⁹Ciri kuti cifundo canu cakale, Ambuye, Munacilumbirira Davide pa cikhulupiriko canu?

⁵⁰Kumbukilani, Ambuye, cotonzera atumiki anu; Ndicisenza m'cifuwa mwanga cacokera ku mitundu yonse yaikuru ya anthu;

⁵¹Cimene adani anu, Yehova, atonza naco; Cimene atonzera naco mayendedwe a wodzozedwa wanu.

⁵²Wodalitsika Yehova ku nthawi yonse, Amen ndi Amen.