Read Buku Lopatulik Masalmo 90 Bible Online

Masalmo 90 - Buku Lopatulik bible

Masalmo 90

¹Ambuye, Inu munatikhalira mokhalamo M'mibadwo mibadwo.

²Asanabadwe mapiri, Kapena musanalenge dziko lapansi, ndi lokhalamo anthu, Inde, kuyambira nthawi yosayamba kufikira nthawi yosatha, Inu ndinu Mulungu.

³Mubweza munthu akhale pfumbi; Nimuti, Bwererani inu, ana a anthu.

⁴Pakuti pamaso panu zaka zikwi Zikhala ngati dzulo, litapita, Ndi monga ulonda wa usiku.

⁵Muwatenga ngati ndi madzi akulu, akhala ngati tulo; Mamawa akhala ngati msipu waphuka.

⁶Mamawa uphuka bwino; Madzulo ausenga, nuuma.

⁷Pakuti tionongeka mu mkwiyo wanu; Ndipo m'kuzaza kwanu tiopsedwa.

⁸Munaika mphulupulu zathu pamaso panu, Ndi zoipa zathu zobisika pounikira nkhope yanu.

⁹Pakuti masiku athu onse apitirira m'ukali wanu; Titsiriza moyo wathu ngati lingaliro.

¹⁰Masiku a zaka zathu ndiwo zaka makumi asanu ndi awiri, Kapena tikakhala nayo mphamvudi zaka makumi asanu ndi atatu; Koma teronso kukula kwao kumati cibvuto ndi copanda pace; Pakuti kumapitako msanga ndipo tithawa ife tomwe.

¹¹Adziwa mphamvu ya mkwiyo wanu ndani, Ndi ukali wanu monga ayenera kukuopani?

¹²Mutidziwitse kuwerenga masiku athu motero, Kuti tikhale nao mtima wanzeru.

¹³Bwerani, Yehova; kufikira liti? Ndipo alekeni atumiki anu.

¹⁴Mutikhutitse naco cifundo canu m'mawa; Ndipo tidzapfuula mokondwera ndi kukondwera masiku athu onse.

¹⁵Tikondweretseni monga mwa masiku mudatizunzawa, Ndi zaka tidaona coipa.

¹⁶Cocita Inu cioneke kwa atumiki anu, Ndi ulemerero wanu pa ana ao.

¹⁷Ndipo cisomo cace ca Yehova Mulungu wathu cikhale pa ife; Ndipo mutikhazikitsire ife nchito ya manja athu; Inde, nchito ya manja athu muikhazikitse.