Read Buku Lopatulik Masalmo 92 Bible Online

Masalmo 92 - Buku Lopatulik bible

Masalmo 92

¹Nkokoma kuyamika Yehova, Ndi kuyimbira nyimbo dzina lanu, Wam'mwambamwamba Inu:

²Kuonetsera cifundo canu mamawa, Ndi cikhulupiriko canu usiku uli wonse.

³Pa coyimbira ca zingwe khumi ndi pacisakasa; Pazeze ndi kulira kwace.

⁴Popeza Inu, Yehova, munandikondweretsa ndi kucita kwanu, Ndidzapfuula mokondwera pa nchito ya manja anu.

⁵Ha! nchito zanu nzazikuru, Yehova, Zolingalira zanu nzozama ndithu.

⁶Munthu wopulukira sacidziwa; Ndi munthu wopusa sacizindikira ici;

⁷Cakuti pophuka oipa ngati msipu, Ndi popindula ocita zopanda pace; Citero kuti adzaonongeke kosatha:

⁸Koma Inu, Yehova, muli m'mwamba ku nthawi yonse.

⁹Pakuti, taonani, adani anu, Yehova, Pakuti, taonani, adani anu adzatayika; Ocita zopanda pace onse adzamwazika.

¹⁰Koma munakweza nyanga yanga ngati ya njati; Anandidzoza mafuta atsopano.

¹¹Diso langa lapenya cokhumba ine pa iwo ondilalira, M'makutu mwanga ndamva cokhumba ine pa iwo akucita zoipa akundiukira.

¹²Wolungama adzaphuka ngati mgwalangwa; Adzakula ngati mkungudza wa ku Lebano.

¹³Iwo ookedwa m'nyumba ya Yehova, Adzaphuka m'mabwalo a Mulungu wathu.

¹⁴Atakalamba adzapatsanso zipatso; Adzadzazidwa ndi madzi nadzakhala abiriwiri:

¹⁵Kulalikira kuti Yehova ngwolunjika; Iye ndiye thanthwe langa, ndipo mwa Iye mulibe cosalungama.