Read Buku Lopatulik Masalmo 96 Bible Online

Masalmo 96 - Buku Lopatulik bible

Masalmo 96

¹Myimbireni Yehova nyimbo yatsopano; Myimbireni Yehova, inu, dziko lonse lapansi.

²Myimbireni Yehova, lemekezani dzina lace; Lalikirani cipulumutso cace tsiku ndi tsiku.

³Fotokozerani ulemerero wace mwa amitundu; Zodabwiza zace mwa mitundu yonse ya anthu.

⁴Pakuti Yehova ndi wamkulu, nayenera kulemekezedwa kwakukulu; Ayenera amuope koposa milungu yonse.

⁵Pakuti milungu yonse ya mitundu ya anthu ndiyo mafano: Koma Yehova analenga zakumwamba.

⁶Pamaso pace pali ulemu ndi ukulu: M'malo opatulika mwace muli mphamvu ndi zocititsa kaso.

⁷Mpatseni Yehova, inu, mafuko a mitundu ya anthu, Mpatseni Yehova ulemerero ndi mphamvu,

⁸Mpatseni Yehova ulemerero wa dzina lace; Bwerani naco copereka, ndipo fikani ku mabwalo ace.

⁹Gwadirani Yehova moyera ndi mokometsetsa: Njenjemerani pamaso pace, inu dziko lonse lapansi.

¹⁰Nenani mwa amitundu, Yehova acita ufumu; Dziko lokhalamo anthu lomwe likhazikika kuti silingagwedezeke; Adzaweruza mitundu ya anthu molunjika.

¹¹Kumwamba kukondwere nilisekerere dziko lapansi; Nyanja ibume mwa kudzala kwace:

¹²Munda ukondwerere ndi zonse ziri m'mwemo; Pamenepo mitengo yonse ya kunkhalango idzapfuula mokondwera;

¹³Pamaso pa Yehova, pakuti akudza; Pakuti akudza kudzaweruza dziko lapansi: Adzaweruza dziko lokhalamo anthu ndi cilungamo, Ndi mitundu ya anthu ndi coonadi.