Read Buku Lopatulik Masalmo 97 Bible Online

Masalmo 97 - Buku Lopatulik bible

Masalmo 97

¹Yehova acita ufumu; dziko lapansi likondwere; Zisumbu zambiri zikondwerere.

²Pomzinga pali mitambo ndi mdima; Cilungamo ndi ciweruzo ndizo zolimbitsa mpando wacifumu wace.

³Moto umtsogolera, Nupsereza otsutsana naye pozungulirapo,

⁴Mphezi zace zinaunikira dziko lokhalamo anthu; Dziko lapansi linaona nilinagwedezeka.

⁵Mapiri anasungunuka ngati sera pamaso pa Yehova, Pamaso pa Ambuye wa dziko lonse lapansi.

⁶Kumwamba kulalikira cilungamo cace, Ndipo mitundu yonse ya anthu ipenya ulemerero wace.

⁷Onse akutumikira fano losema, Akudzitamandira nao mafano, acite manyazi: Mgwadireni Iye, milungu yonse inu.

⁸Ziyoni anamva nakondwera, Nasekerera ana akazi a Yuda; Cifukwa ca maweruzo anu, Yehova.

⁹Pakuti Inu, Yehova, ndinu Wam'mwambamwamba pa dziko lonse lapansi, Ndinu wokwezeka kwakukuru pamwamba pa milungu yonse yina.

¹⁰Inuokonda Yehova, danani naco coipa: Iye asunga moyo wa okondedwa ace; Awalanditsa m'manja mwa oipa.

¹¹Kuunika kufesekera wolungama, Ndi cikondwerero oongoka mtima.

¹²Kondwerani mwa Yehova, olungama inu; Ndipo yamikani pokumbukila ciyero cace.