Read Buku Lopatulik Miyambi 1 Bible Online

Miyambi 1 - Buku Lopatulik bible

Miyambi 1

¹MIYAMBI ya Solomo mwana wa Davide, mfumu ya Israyeli.

²Kudziwa nzeru ndi mwambo; Kuzindikira mau ozindikiritsa;

³Kulandira mwambo wakusamalira macitidwe, Cilungamo, ciweruzo ndi zolunjika;

⁴Kucenjeza acibwana, Kuphunzitsa mnyamata kudziwa ndi kulingalira;

⁵Kuti wanzeru amve, naonjezere kuphunzira; Ndi kuti wozindikira afikire kuuphungu;

⁶Kuzindikira mwambi ndi tanthauzo lace, Mau a anzeru, ndi zophiphiritsa zao.

⁷Kuopa Yehova ndiko ciyambi ca kudziwa; Opusa anyoza nzeru ndi mwambo.

⁸Mwananga, tamva mwambo wa atate wako, Ndi kusasiya cilangizo ca amako

⁹Pakuti izi ndi korona wa cisomo pamtu pako, Ndi mkanda pakhosi pako.

¹⁰Mwananga, akakukopa ocimwa usalole.

¹¹Akanena, Idza nafe, tibisalire mwazi, Tilalire osacimwa opanda cifukwa;

¹²Tiwameze ali ndi moyo ngati manda, Ali amphumphu, ngati akutsikira kudzenje;

¹³Tidzapeza cuma conse ca mtengo wace, Tidzadzaza nyumba zathu ndi zofunkha;

¹⁴Udzacita nafe maere, Tonse tidzakhala ndi cibeti cimodzi;

¹⁵Mwananga, usayende nao m'njira; Letsa phazi lako ku mayendedwe ao;

¹⁶Pakuti mapazi ao athamangira zoipa, Afulumira kukhetsa mwazi.

¹⁷Pakuti kuchera msampha pamaso pa mbalame ndi cabe;

¹⁸Ndipo awa abisalira mwazi wao wao, alalira miyoyo yao yao.

¹⁹Mayendedwe a yense wopindula cuma monyenga ngotere; Cilanda moyo wa eni ace,

²⁰Nzeru ipfuula panja; Imveketsa mau ace pabwalo;

²¹Iitana posonkhana anthu polowera pacipata; M'mudzi inena mau ace;

²²Kodi mudzakonda zacibwana kufikira liti, acibwana inu? Onyoza ndi kukonda kunyoza, Opusa ndi kuda nzeru?

²³Tembenukani pamene ndikudzudzulani; Taonani, nditsanulira pa inu mzimu wanga, Ndikudziwitsani mau anga.

²⁴Cifukwa ndaitana, ndipo munakana; Ndatambasula dzanja langa, ndipo panalibe analabadira;

²⁵Koma munapeputsa uphungu wangawonse, Ndi kukana kudzudzula kwanga.

²⁶Inetu ndidzacitiraciphwete tsoka lanu, Ndidzatonyola pakudza mantha anu;

²⁷Pakudza mantha anu ngati mphepo yopasula, Ndi pofika tsoka lanu ngati kabvumvulu; Pakudza kwa inu bvuto ndi nsautso.

²⁸Pamenepo adzandiitana, koma sindidzabvomera; Adzandifunatu, osandipeza ai;

²⁹Cifukwa anada nzeru, Sanafuna kuopa Yehova;

³⁰Anakana uphungu wanga, Nanyoza kudzudzula kwanga konse;

³¹Momwemo adzadya zipatso za mayendedwe ao, Nadzakhuta zolingalira zao.

³²Pakuti kubwerera m'mbuyo kwa acibwana kudzawapha; Ndipo mphwai za opusa zidzawaononga.

³³Koma wondimvera ine adzakhala osatekeseka, Nadzakhala phe osaopa zoipa,