Read Buku Lopatulik Miyambi 10 Bible Online

Miyambi 10 - Buku Lopatulik bible

Miyambi 10

¹Mwana wanzeru akondweretsa atate; Koma mwana wopusa amvetsa amace cisoni.

²Cuma ca ucimo sicithangata: Koma cilungamo cipulumutsa kuimfa.

³Yehova samvetsa njala moyo wa wolungama; Koma amainga cifuniro ca wocimwa.

⁴Wocita ndi dzanja laulesi amasauka; Koma dzanja la akhama lilemeretsa.

⁵Wokolola m'malimwe ndi mwana wanzeru; Koma wogona pakututa ndi mwana wocititsa manyazi.

⁶Madalitso ali pamtu pa wolungama Koma m'kamwa mwa oipa mubisa ciwawa.

⁷Amayesa wolungama wodala pamkumbukira; Koma dzina la oipa lidzabvunda.

⁸Mwini mtima wanzeru amalandira malamulo; Koma citsiru colongolola cidzagwa.

⁹Woyenda moongoka amayenda osatekeseka; Koma wokhotetsa njira zace adzadziwika.

¹⁰Wotsinzinira acititsa cisoni; Koma wodzudzula momveka acita mtendere.

¹¹M'kamwa mwa wolungama ndi kasupe wa moyo; Koma m'kamwa mwa oipa mubisa ciwawa.

¹²Udani upikisanitsa; Koma cikondi cikwirira zolakwa zonse.

¹³Nzeru ipezedwa m'milomo ya wozindikira; Koma wopusa pamsana pace ntyole.

¹⁴Anzeru akundika zomwe adziwa Koma m'kamwa mwa citsiru muononga tsopano lino.

¹⁵Cuma ca wolemera ndi mudzi wace wolimba; Koma umphawi wao uononga osauka.

¹⁶Nchito za wolungama zipatsa moyo; Koma phindu la oipa licimwitsa.

¹⁷Wosunga mwambo ali m'njira ya moyo; Koma wosiya cidzudzulo asocera.

¹⁸Wobisa udani ali ndi milomo yonama; Wonena ugogodi ndiye citsiru.

¹⁹Pocuruka mau zolakwa sizisoweka; Koma wokhala cete acita mwanzeru.

²⁰Lilime la wolungama likunga siliva wosankhika; Koma mtima wa oipa uli wacabe.

²¹Milomo ya wolungama imadyetsa ambiri; Koma zitsiru zimafa posowa nzeru.

²²Madalitso a Yehova alemeretsa, Saonjezerapo cisoni.

²³Masewero a citsiru ndiwo kucita zoipa; Koma masewero a wozindikira ndiwo nzeru.

²⁴Comwe woipa aciopa cidzamfikira; Koma comwe olungama acifuna cidzapatsidwa.

²⁵Monga kabvumvulu angopita, momwemo woipa kuti zi; Koma olungama ndiwo maziko osatha.

²⁶Ngati vinyo wowawa m'mano, ndi utsi m'maso, Momwemo wolesi kwa iwo amene amtuma.

²⁷Kuopa Yehova kutanimphitsa masiku; Koma zaka za oipa zidzafinimpha,

²⁸Ciyembekezo ca olungama ndico cimwemwe; Koma cidikiro ca oipa cidzaonongeka.

²⁹Njira ya Yehova ndi linga kwa woongoka mtima; Koma akucita zoipa adzaonongeka.

³⁰Wolungama sadzacotsedwa konse: Koma oipa sadzakhalabe m'dziko.

³¹M'kamwa mwa wolungama mulankhula nzeru; Koma lilime lokhota lidzadulidwa.

³²Milomo ya wolungama idziwa zokondweretsa; Koma m'kamwa mwa oipa munena zokhota,