Read Buku Lopatulik Miyambi 14 Bible Online

Miyambi 14 - Buku Lopatulik bible

Miyambi 14

¹Mkazi yense wanzeru amanga banja lace; Koma wopusa alipasula ndi manja ace.

²Woyenda moongoka mtima aopa Yehova; Koma wokhota m'njira yace amnyoza,

³M'kamwa mwa citsiru muli ntyole ya kudzikuza; Koma milomo ya anzeru Idzawasunga.

⁴Popanda zoweta modyera muti see; Koma mphamvu ya ng'ombe icurukitsa phindu.

⁵Mboni yokhulupirika sidzanama; Koma mboni yonyenga imalankhula zonama.

⁶Wonyoza afunafuna nzeru osaipeza; Koma wozindikira saona bvuto m'kuphunzira.

⁷Pita pamaso pa munthu wopusa, Sudzazindikira milomo yakudziwa.

⁸Nzeru ya wocenjera ndiyo yakuti azindikire njira yace; Koma utsiru wa opusa ndiwo cinyengo.

⁹Zitsiru zinyoza kuparamula; Koma mwa oongoka mtima muli ciyanjano.

¹⁰Mtima udziwa kuwawa kwace kwace; Mlendo sadudukira ndi cimwemwe cace.

¹¹Nyumba ya oipa idzapasuka; Koma hema wa oongoka mtima adzakula.

¹²Iripo njira yooneka kwa mwamuna ngati yoongoka; Koma matsiriziro ace ndi njira za imfa.

¹³Ngakhale m'kuseka mtima uwawa; Ndipo matsiriziro a ciphwete ndi cisoni.

¹⁴Wobwerera m'mbuyo m'mtima adzakhuta njira zace; Koma munthu wabwino adzakhuta za mwa iye yekha.

¹⁵Wacibwana akhulupirira mau onse; Koma wocenjera asamalira mayendedwe ace.

¹⁶Wanzeru amaopa nasiya zoipa; Koma wopusa amanyada osatekeseka.

¹⁷Wokangaza kukwiya adzacita utsiru; Ndipo munthu wa ziwembu adzadedwa.

¹⁸Acibwana amalandira colowa ca utsiru; Koma ocenjera amabvala nzeru ngati korona.

¹⁹Oipa amagwadira abwino, Ndi ocimwa pa makomo a olungama.

²⁰Waumphawi adedwa ndi anzace omwe; Koma akukonda wolemera acuruka.

²¹Wonyoza anzace acimwa; Koma wocitira osauka cifundo adala.

²²Kodi oganizira zoipa sasocera? Koma akuganizira zabwino adzalandira cifundo ndi ntheradi.

²³M'nchito zonse muli phindu; Koma kulankhula-lankhula kungopatsa umphawi.

²⁴Korona wa anzeru ndi cuma cao; Utsiru wa opusa ndiwo utsiru.

²⁵Mboni yoona imalanditsa miyoyo; Koma wolankhula zonama angonyenga.

²⁶Wakuopa Yehova akhulupirira kolimba; Ndipo ana ace adzakhala ndi pothawirapo.

²⁷Kuopa Yehova ndiko kasupe wa moyo, Kupatutsa ku misampha ya imfa.

²⁸Mu unyinji wa anthu muli ulemu wa mfumu; Koma popanda anthu kalonga aonongeka.

²⁹Wosakwiya msanga apambana kumvetsa; Koma wansontho akuza utsiru.

³⁰Mtima wabwino ndi moyo wa thupi; Koma nsanje ibvunditsa mafupa.

³¹Wotsendereza aumphawi atonza Mlengi wace; Koma wocitira wosauka cifundo amlemekeza.

³²Wocimwa adzakankhidwa m'kuipa kwace; Koma wolungama akhulupirirabe pomwalira,

³³Nzeru ikhalabe m'mtima wa wozindikira, Nidziwika pakati pa opusa.

³⁴Cilungamo cikuza mtundu wa anthu; Koma cimo licititsa pfuko manyazi.

³⁵Mfumu ikomera mtima kapolo wocita mwanzeru; Koma idzakwiyira wocititsa manyazi.