Read Buku Lopatulik Miyambi 15 Bible Online

Miyambi 15 - Buku Lopatulik bible

Miyambi 15

¹Mayankhidwe ofatsa abweza mkwiyo; Koma mau owawitsa aputa msunamo.

²Lilime la anzeru linena bwino zomwe adziwa; Koma m'kamwa mwa opusa mutsanulira utsiru.

³Maso a Yehova ali ponseponse, Nayang'anira oipa ndi abwino.

⁴Kuciza lilime ndiko mtengo wa moyo; Koma likakhota liswa moyo.

⁵Citsiru cipeputsa mwambo wa atate wace; Koma wosamalira cidzudzulo amacenjera.

⁶M'nyumba ya wolungama muli katundu wambiri; Koma m'phindu la woipa muli bvuto,

⁷Milomo ya anzeru iwanditsa nzeru, Koma mtima wa opusa suli wolungama.

⁸Nsembe ya oipa inyansa Yehova; Koma pemphero la oongoka mtima limkondweretsa.

⁹Njira ya oipa inyansa Yehova; Koma akonda wolondola cilungamo.

¹⁰Wosiya njira adzalangidwa mowawa; Wakuda cidzudzulo adzafa.

¹¹Kumanda ndi kucionongeko kuli pamaso pa Yehova; Koposa kotani nanga mitima ya ana a anthu?

¹²Wonyoza sakonda kudzudzulidwa, Samapita kwa anzeru.

¹³Mtima wokondwa usekeretsa nkhope; Koma moyo umasweka ndi zowawa za m'mtima.

¹⁴Mtima wa wozindikira ufunitsa kudziwa; Koma m'kamwa mwa opusa mudya utsiru.

¹⁵Masiku onse a wosauka ali oipa; Koma wokondwera mtima ali ndi phwando losatha.

¹⁶Zapang'ono, ulikuopa Yehova, Zipambana ndi katundu wambiri pokhala phokoso,

¹⁷Kudya masamba, pali cikondano, Kuposa ng'ombe yonenepa pali udani.

¹⁸Munthu wozaza aputa makani; Koma wosakwiya msanga atonthoza makangano.

¹⁹Mayendedwe a wolesi akunga Hnga laminga, Koma njira ya oongoka mtima iundidwa ngati mseu.

²⁰Mwana wanzeru akondweretsa atate wace; Koma munthu wopusa apeputsa amace.

²¹Wosowa nzeru akondwera ndi utsiru; Koma munthu wozindikira aongola mayendedwe ace.

²²Zolingalira zizimidwa popanda upo Koma pocuruka aphungu zikhazikika.

²³Munthu akondwera ndi mayankhidwe a m'kamwa mwace; Ndi mau a pa nthawi yace kodi sali abwino?

²⁴Anzeru ayesa njira yamoyo yokwerakwera, Kuti apambuke kusiya kunsi kwa manda.

²⁵Yehova adzapasula nyumba ya wonyada; Koma adzalembera mkazi wamasiye malire ace,

²⁶Ziwembu zoipa zinyansa Yehova; Koma oyera mtima alankhula mau okondweretsa.

²⁷Wopindula monyenga abvuta nyumba yace; Koma wakuda mitulo adzakhala ndi moyo.

²⁸Mtima wa wolungama uganizira za mayankhidwe; Koma m'kamwa mwa ocimwa mutsanulira zoipa.

²⁹Yehova atarikira oipa; Koma pemphero la olungama alimvera.

³⁰Kuunika kwa maso kukondweretsa mtima; Ndipo pomveka zabwino mafupa amatenga uwisi.

³¹Khutu lomvera cidzudzulo ca moyo Lidzakhalabe mwa anzeru.

³²Wokana mwambo apeputsa moyo wace; Koma wosamalira cidzudzulo amatenga nzeru.

³³Kuopa Yehova ndiko mwambo wanzeru; Ndipo cifatso citsogolera ulemu.