Read Buku Lopatulik Miyambi 18 Bible Online

Miyambi 18 - Buku Lopatulik bible

Miyambi 18

¹Wopanduka afunafuna niro cace, Nakangana ndi nzeru yonse yeniyeni.

²Wopusa sakondwera ndi kuzindikira; Koma kungobvumbulutsa za m'mtima mwace.

³Pakudza wamphulupulu padzanso kunyoza; Manyazi natsagana ndi citonzo.

⁴Mau a m'kamwa mwa munthu ndiwo madzi akuya; Kasupe wa nzeru ndiye mtsinje wodzala.

⁵Kukometsa mlandu wa wamphulupulu mwatsankhu sikuli kwabwino, Ngakhale kucitira cetera wolungama.

⁶Milomo ya wopusa ifikitsa makangano; Ndipo m'kamwa mwace muputa kukwapulidwa.

⁷M'kamwa mwa wopusa mumuononga, Milomo yace ikhala msampha wa moyo wace.

⁸Mau a kazitape akunga zakudya zolongosoka, Zotsikira m'kati mwa mimba.

⁹Wogwira nchito mwaulesi Ndiye mbale wace wa wosakaza.

¹⁰Dzina la Yehova ndilo linga lolimba; Wolungama athamangiramo napulumuka.

¹¹Cuma ca wolemera ndico mudzi wace wolimba; Alingalira kuti ndico khoma lalitari.

¹²Mtima wa munthu unyada asanaonongeke; Koma cifatso citsogolera ulemu.

¹³Wobwezera mau asanamvetse apusa, Nadzicititsa manyazi.

¹⁴Mtima wa munthu umlimbitsa alikudwala; Koma ndani angatukule mtima wosweka?

¹⁵Mtima wa wozindikira umaphunzira; Khutu la anzeru lifunitsa kudziwa.

¹⁶Mtulo wa munthu umtsegulira njira, Numfikitsa pamaso pa akuru.

¹⁷Woyamba kudzinenera ayang'anika wolungama; Koma mnzace afika namuululitsa zace zonse.

¹⁸Ula uletsa makangano, Nulekanitsa amphamvu.

¹⁹Kupembedza mbale utamcimwira nkobvuta, Kulanda mudzi wolimba nkosabvuta; Makangano akunga mipiringidzo ya linga.

²⁰Mimba ya munthu idzakhuta zipatso za m'kamwa mwace; Iye nadzakhuta phindu la milomo yace.

²¹Lilime liri ndi mphamvu pa imfa ndi moyo; Wolikonda adzadya zipatso zace.

²²Wopeza mkazi apeza cinthu cabwino; Yehova amkomera mtima.

²³Wosauka amadandaulira; Koma wolemera ayankha mwaukali.

²⁴Woyanjana ndi ambiri angodziononga; Koma liripo bwenzi lipambana ndi mbale kuumirira.