Read Buku Lopatulik Miyambi 19 Bible Online

Miyambi 19 - Buku Lopatulik bible

Miyambi 19

¹Wosauka woyenda mwangwiro Aposa wokhetsa milomo ndi wopusa.

²Kukhumba kosadziwa sikuli kwabwino; Ndipo wofulumira ndi mapazi ace amacimwa.

³Utsiru wa munthu ukhotetsa njira yace; Mtima wace udandaula pa Yehova.

⁴Cuma cionjezetsa mabwenzi ambiri; Koma mnzace wa waumphawi amleka.

⁵Mboni yonama sidzakhala yosalangidwa; Wolankhula mabodza sadzapulumuka.

⁶Ambiri adzapembedza waufulu; Ndipo yense ndi bwenzi la munthu wopatsa.

⁷Abale onse a wosauka amuda; Nanga mabwenzi ace kodi satanimphirana naye? Awatsata ndi mau, koma kuli zi.

⁸Wolandira nzeru akonda moyo wace; Wosunga luntha adzapeza zabwino.

⁹Mboni yonama sidzapulumuka cilango; Wolankhula mabodza adzaonongeka.

¹⁰Wopusa sayenera kukhala ndi zinthu zolongosoka; Nanga kapolo ayenera kulamulira akalonga kodi?

¹¹Kulingalira kwa munthu kucedwetsa mkwiyo; Ulemerero wace uli wakuti akhululukire colakwa.

¹²Mkwiyo wa mfumu ukunga kubangula kwa mkango; Koma kukoma mtima kwace kunga mame pamsipu.

¹³Mwana wopusa ndiye tsoka la atate wace; Ndipo makangano a mkazi ndiwo kudontha-donthabe.

¹⁴Nyumba ndi cuma ndizo colowa ca atate; Koma mkazi wanzeru acokera kwa Yehova.

¹⁵Ulesi ugonetsa tulo tofa nato; Ndipo moyo wamkhongono udzamva njala.

¹⁶Wosunga lamulo asunga moyo wace; Wonyalanyaza mayendedwe ace adzafa.

¹⁷Wocitira waumphawi cifundo abwereka Yehova; Adzambwezera cokoma caceco.

¹⁸Menya mwanako, ciyembekezero ciripo, Osafunitsa kumuononga.

¹⁹Munthu waukali alipire mwini; Pakuti ukampulumutsa udzateronso.

²⁰Tamvera uphungu, nulandire mwambo, Kuti ukhale wanzeru pa cimariziro cako,

²¹Muli zolingalira zambiri m'mtima mwa munthu; Koma uphungu wa Yehova ndiwo udzaimika.

²²Cotikondetsa munthu ndico kukoma mtima kwace; Ndipo wosauka apambana munthu wonama.

²³Kuopa Yehova kupatsa moyo; Wokhala nako adzakhala wokhuta; Zoipa sizidzamgwera.

²⁴Wolesi alonga dzanja lace m'mbale, Osalibwezanso kukamwa kwace.

²⁵Menya wonyoza, ndipo acibwana adzaceniera; Nudzudzule wozindikira adzazindikira nzeru.

²⁶Wolanda za atate, ndi wopitikitsa amai, Ndiye mwana wocititsa manyazi ndi wogwetsa nkhope.

²⁷Ukangofuna, mwananga, kusocera kusiya mau akudziwitsa, Leka kumva mwambo.

²⁸Mboni yopanda pace inyoza ciweruzo; M'kamwa mwa amphulupulu mumeza zoipa,

²⁹Akonzera onyoza ciweruzo, Ndi mikwingwirima pamsana pa opusa.