Read Buku Lopatulik Miyambi 21 Bible Online

Miyambi 21 - Buku Lopatulik bible

Miyambi 21

¹Mtima wa mfumu uli m'dzanja la Yehova ngati mitsinje ya madzi; Aulozetsa komwe afuna.

²Njira zonse za munthu zilungama pamaso pace; Koma Yehova ayesa mitima.

³Kucita cilungamo ndi ciweruzo Kupambana ndi nsembe kumkonda Yehova.

⁴Maso akunyada, ndi mtima wodzikuza, Ndi nyali ya oipa, ziri cimo.

⁵Zoganizira za wakhama zicurukitsadi katundu; Koma yense wansontho angopeza umphawi.

⁶Kupata cuma ndi lilime lonama ndiko nkhungu yoyendayenda, ngakhale misampha ya imfa.

⁷Ciwawa ca amphulupulu cidzawakokolola; Cifukwa akana kucita ciweruzo.

⁸Wosenza cimo njira yace ikhotakhota; Koma nchito ya woyera mtima ilungama.

⁹Kukhala pa ngondya ya tsindwi kufunika Kuposa kukhala m'nyumba ndi mkazi wolongolola.

¹⁰Wamphulupulu mtima wace umkhumba zoipa; Sakomera mtima mnzace.

¹¹Polangidwa wonyoza, wacibwana alandira nzeru, Naphunzira pakuyang'ana pa wanzeru.

¹²Wolungama aganizira za nyumba ya wamphulupulu, Kuti amphulupulu amagwetsedwa, naona zoipa.

¹³Wotseka makutu ace polira waumphawi, Nayenso adzalira koma osamvedwa.

¹⁴Mphatso ya m'tseri ipembedza mkwiyo, Ndi mtulo wa pamfunga ukali wolimba.

¹⁵Kucita ciweruzo kukondweretsa wolungama; Koma kuwaononga akucita mphulupulu,

¹⁶Munthu wosocera pa njira ya nzeru Adzakhala m'msonkhano wa akufa.

¹⁷Wokonda zoseketsa adzasauka; Wokonda vinyo ndi mafuta sadzalemera.

¹⁸Wocimwa ndiye ciombolo ca wolungama; Ndipo waciwembu adzalowa m'malo mwa oongoka mtima.

¹⁹Kukhala m'cipululu kufunika Kuposa kukhala ndi mkazi wolongolola ndi wong'ung'udza.

²⁰Mokhala wanzeru muli katundu wofunika ndi mafuta; Koma wopusa angozimeza.

²¹Wolondola cilungamo ndi cifundo Apeza moyo, ndi cilungamo, ndi ulemu.

²²Wanzeru akwera pa mudzi wa olimba, Nagwetsa mphamvu yace imene anaikhulupirira.

²³Wosunga m'kamwa mwace ndi lilime lace Asunga moyo wace kumabvuto.

²⁴Wonyada wodzikuza dzina lace ndiye wonyoza; Acita mwaukali modzitama.

²⁵Cifuniro ca wolesi cimupha; Cifukwa manja ace akana kugwira nchito.

²⁶Ena asirira modukidwa tsiku lonse; Koma wolungama amapatsa osamana.

²⁷Nsembe ya oipa inyansa; Makamaka pakudza nayo iwo mwaciwembu.

²⁸Mboni yonama idzafa; Koma mwamuna wakumvetsa adzanena mosakayika,

²⁹Munthu woipa aumitsa nkhope yace; Koma woongoka mtima akonza njira zace.

³⁰Kulibe nzeru ngakhale luntha Ngakhale uphungu wotsutsana ndi Yehova.

³¹Kavalo amakonzedweratu cifukwa ca tsiku la nkhondo; Koma wopulumutsa ndiye Yehova.