Read Buku Lopatulik Miyambi 22 Bible Online

Miyambi 22 - Buku Lopatulik bible

Miyambi 22

¹Mbiri yabwino ifunika kopambana cuma cambiri; Kukukomera mtima anzako kuposa siliva ndi golidi.

²Wolemera ndi wosauka akumana, Wolenga onsewo ndiye Yehova.

³Wocenjera aona zoipa, nabisala; Koma acibwana angopitirira, nalipitsidwa.

⁴Mphotho ya cifatso ndi kuopa, Yehova Ndiye cuma, ndi ulemu, ndi moyo.

⁵Minga ndi misampha iri m'njira ya wokhota; Koma wosunga moyo wace adzatarikira imeneyo.

⁶Phunzitsa mwana poyamba njira yace; Ndipo angakhale atakalamba sadzacokamo.

⁷Wolemera alamulira osauka; Ndipo wokongola ndiye kapolo wa womkongoletsa.

⁸Wofesa zosalungama adzakolola tsoka; Ndipo ntyole ya mkwiyo wace idzalephera.

⁹Mwini diso lamataya adzadala; Pakuti apatsa osauka zakudya zace.

¹⁰Ukainga wonyoza, makangano adzaturuka; Makani ndi manyazi adzalekeka.

¹¹Wokonda kuyera mtima, Mfumu idzakhala bwenzi lace cifukwa ca cisomo ca milomo yace.

¹²Maso a Yehova acinjiriza wodziwa; Koma agwetsa mau a munthu wa ziwembu.

¹³Waulesi ati, Pali mkango panjapo, Ndidzaphedwa pamakwalalapo.

¹⁴M'kamwa mwa mkazi waciwerewere muli dzenje lakuya; Yemwe Yehova amkwiyira adzagwamo.

¹⁵Utsiru umangidwa mumtima mwa mwana; Koma ntyole yomlangira idzauingitsira kutari.

¹⁶Wotsendereza waumphawi kuti acurukitse cuma cace, Ndi wopatsa wolemera kanthu, angosauka.

¹⁷Chera makutu ako, numvere mau a anzeru, Nulozetse mtima wako kukadziwa zanga.

¹⁸Pakuti mauwo akondweretsa ngati uwasunga m'kati mwako, Ngati akhazikika pamodzi pa milomo yako.

¹⁹Ndakudziwitsa amenewo lero, ngakhale iwedi, Kuti ukhulupirire Yehova.

²⁰Kodi sindinakulembera zoposa Za uphungu ndi nzeru;

²¹Kuti ukadziwitse ntheradi yace ya mau oona, Nukabwere ndi mau oona kwa iwo amene anakutumiza?

²²Usalande za waumphawi cifukwa ali waumphawi, Ngakhale kutsendereza wosauka kubwalo.

²³Pakuti Yehova adzanenera mlandu wao; Omwe akwatula zao Iye adzakwatula moyo wao.

²⁴Usayanjane ndi munthu wokwiya msanga; Ngakhale kupita ndi mwamuna waukali;

²⁵Kuti ungaphunzire mayendedwe ace, Ndi kutengera moyo wako msampha,

²⁶Usakhale wodulirana mpherere, Ngakhale kumperekera cikole ca ngongole zace.

²⁷Ngati ulibe cobwezera Kodi acotserenji kama lako pansi pako?

²⁸Usasunthe cidziwitso cakale ca m'malire, Cimene makolo ako anaciimika.

²⁹Kodi upenya munthu wofulumiza nchito zace? Adzaima pamaso pa mafumu, osaima pamaso pa anthu acabe.