Read Buku Lopatulik Miyambi 24 Bible Online

Miyambi 24 - Buku Lopatulik bible

Miyambi 24

¹Usacitire nsanje anthu oipa, Ngakhale kufuna kukhala nao;

²Pakuti mtima wao ulingalira za cionongeko; Milomo yao ilankhula za mphulupulu.

³Nzeru imangitsa nyumba; Luntha liikhazikitsa.

⁴Kudziwa kudzaza zipinda zace Ndi cuma conse cofunika ca mtengo wace.

⁵Mwamuna wanzeru ngwamphamvu; Munthu wodziwa ankabe nalimba.

⁶Pakuti udzaponya nkhondo yako ndi upo, Ndi kupulumuka pocuruka aphungu,

⁷Nzeru itarikira citsiru; Satsegula pakamwa kubwalo.

⁸Wolingalira zakucita zoipa Anthu adzamcha waciwembu.

⁹Maganizo opusa ndiwo cimo; Wonyoza anyansa anthu.

¹⁰Ukalefuka tsiku la tsoka Mphamvu yako icepa.

¹¹Omwe atengedwa kuti akafe, uwapulumutse; Omwe ati aphedwe, usaleke kuwalanditsa.

¹²Ukanena, Taonani, sitinadziwa cimeneci; Kodi woyesa mitima sacizindikira ici? Ndi wosunga moyo wako kodi sacidziwa? Ndipo kodi sabwezera munthu yense monga mwa macitidwe ace?

¹³Mwananga, idya uci pakuti ngwabwino, Ndi cisa cace citsekemera m'kamwamwako;

¹⁴Potero udzadziwa kuti nzeru iri yotero m'moyo wako; Ngati waipeza padzakhala mphotho, Ndipo ciyembekezo cako sicidzalephereka.

¹⁵Usabisalire, woipa iwe, pomanga wolungama; Usapasule popuma iyepo.

¹⁶Pakuti wolungama amagwa kasanu ndi kawiri, nanyamukanso; Koma oipa akhumudwa pomfikira tsoka.

¹⁷Usakondwere pakugwa mdani wako; Mtima wako usasekere pokhumudwa iye;

¹⁸Kuti Yehova angaone kukondwa kwako, ndi kukuyesa koipa, Ndi kuleka kumkwiyira.

¹⁹Usabvutike mtima cifukwa ca ocita zoipa; Ngakhale kucitira nsanje amphulupulu;

²⁰Pakuti woipayo sadzalandira mphotho; Nyali ya amphulupulu idzazima.

²¹Mwananga, opa Yehova ndi mfumu yomwe, Osadudukira anthu osinthasintha.

²²Pakuti tsoka lao lidzaoneka modzidzimuka; Ndipo ndani adziwa cionongeko ca zaka zao?

²³Izinso ziri za anzeru. Poweruza cetera siliri labwino.

²⁴Wonenakwa woipa, Wolungama iwe; Magulu a anthu adzamtemberera, mitundu ya anthu idzamkwiyira,

²⁵Omwe amdzudzula adzasekera, Nadzadalitsika ndithu.

²⁶Wobwezera mau oongoka Apsompsona milomo.

²⁷Longosola nchito yako panjapo, nuikonzeretu kumunda; Pambuyo pace ndi kumanga nyumba yako.

²⁸Usacitire mnzako umboni womtsutsa opanda cifukwa; Kodi udzanyenga ndi milomo yako?

²⁹Usanene, Ndidzamcitira zomwezo anandicitira ine; Ndidzabwereza munthuyo monga mwa macitidwe ace.

³⁰Ndinapita pa munda wa wolesi, Polima mphesa munthu wosowa nzeru.

³¹Taonani, ponsepo panamera minga, Ndi kuwirirapo khwisa; Chinga lace lamiyala ndi kupasuka.

³²Pamenepo ndinayang'ana ndi kuganizira, Ndinaona ndi kulandira mwambo.

³³Tulo tapang'ono, kungoodzera pang'ono, Kungomanga manja pang'ono m'kugona,

³⁴Ndipo umphawi wako udzafika ngati mbala; Ndi kusauka kwako ngati munthu wacikopa.