Read Buku Lopatulik Miyambi 25 Bible Online

Miyambi 25 - Buku Lopatulik bible

Miyambi 25

¹Iyinso ndiyo miyambo ya Solomo Imene anthu a Hezekiya mfumu ya Yuda anailemba.

²Kubisa kanthu ndi ulemerero wa Mulungu; Koma ulemerero wa mafumu ndi kusanthula kanthu.

³Pamlengalenga patarika, ndi padziko pakuya, Koma mitima ya mafumu singasanthulike.

⁴Cotsera siliva mphala yace, Mmisiri wa ng'anjo aturutsamo mbale;

⁵Cotsera woipa pamaso pa mfumu, Mpando wace udzakhazikika m'cilungamo.

⁶Usadzitame pamaso pa mfumu, Ngakhale kuima m'malo mwa akuru;

⁷Pakuti kunena kwa iwe, Takwera kuno, Kupambana ndi kuti utsitsidwe pamaso pa kalonga, Amene maso ako anamuona.

⁸Usaturuke mwansontho kukalimbana, Ungalephere pa kutha kwace, Atakucititsa mnzako manyazi.

⁹Nena mlandu wako ndi mnzako, Osaulula zinsinsi za mwini;

¹⁰Kuti wakumva angakutonze, Mbiri yako yoipa ndi kusacoka.

¹¹Mau oyenera a pa nthawi yace Akunga zipatso zagolidi m'nsengwa zasiliva.

¹²Monga phelele lagolidi ndi cipini cagolidi woyengeka, Momwemo wanzeru wodzudzula pa khutu lomvera.

¹³Monga cisanu ca cipale cofewa pa nthawi ya masika, Momwemo mthenga wokhulupirika kwa amene anamtuma; Atsitsimutsa moyo wa ambuyace.

¹⁴Monga mitambo ndi mphepo popanda mvula, Momwemo ndiye wodzikweza ndi zipatso zace monyenga.

¹⁵Cipiriro cipembedza mkuru; Lilime lofatsa lityola pfupa,

¹⁶Wapeza uci kodi? Idyapo wokwanira, Kuti ungakukole, nusanze.

¹⁷Phazi lako lilowe m'nyumba ya mnzako kamodzi kamodzi; Kuti angatope nawe ndi kukuda.

¹⁸Wocitira mnzace umboni wonama Ndiye cibonga, ndi lupanga, ndi mubvi wakuthwa.

¹⁹Kukhulupirira munthu wa ciwembu tsiku latsoka Kunga dzino lotyoka ndi phazi loguluka.

²⁰Monga wobvula maraya tsiku lamphepo, Ngakhale kuthira vinyo wosasa m'soda, Momwemo woyimbira nyimbo munthu wacisoni.

²¹Mdani wako akamva njala umdyetse, Akamva ludzu ummwetse madzi,

²²Pakuti udzaunjika makala amoto pamtu pace; Ndipo Yehova adzakupatsa mphotho,

²³Mphepo ya kumpoto ifikitsa mvula; Comweco lilime losinjirira likwiyitsa nkhope.

²⁴Kukhala pa ngondya ya tsindwi kufunika Kuposa kukhala m'nyumba ndi mkazi wolongolola.

²⁵Monga madzi ozizira kwa munthu wotopa, Momwemo mau abwino akucokera ku dziko lakutari.

²⁶Monga kasupe wopondedwa, ndi citsime cobvonongeka, Momwemo wolungama ngati akonjera woipa.

²⁷Kudya uci wambiri sikuli kwabwino; Comweco kufunafuna ulemu wako wako sikuli ulemu.

²⁸Wosalamulira mtima wace Akunga mudzi wopasuka wopanda linga,