Read Buku Lopatulik Miyambi 29 Bible Online

Miyambi 29 - Buku Lopatulik bible

Miyambi 29

¹Yemwe aumitsa khosi atadzudzulidwa kwambiri, Adzasweka modzidzimuka, palibe comciritsa.

²Pocuruka olungama anthu akondwa; Koma polamulira woipa anthu ausa moyo.

³Mwamuna wokonda nzeru akondweretsa atate wace; Koma wotsagana ndi akazi adama amwaza cuma.

⁴Mfumu akhazikitsa dziko ndi ciweruzo; Koma wosonkhetsa anthu mphatso alipululutsa.

⁵Wosyasyalika mnzace Acherera mapazi ace ukonde.

⁶M'kulakwa kwa woipa muli msampha; Koma wolungama ayimba, nakondwera.

⁷Wolungama asamalira mlandu wa osauka; Koma woipa alibe nzeru yakuudziwa.

⁸Anthu onyoza atentha mudzi; Koma anzeru alezetsa mkwiyo.

⁹Munthu wanzeru akatsutsana ndi munthu wopusa, Ngakhale akwiya, ngakhale aseka, palibe mtendere.

¹⁰Anthu ankhanza ada wangwiro; Koma oongoka mtima asamalira moyowace.

¹¹Citsiru cibvumbulutsa mkwiyo wace wonse; Koma wanzeru auletsa nautontholetsa.

¹²Mkuru akamvera cinyengo, Atumuki ace onse ali oipa,

¹³Waumphawi ndi wotsendereza akumana; Yehova apenyetsa maso a onse awiriwo.

¹⁴Mfumu yolamulira osauka mwantheradi, Mpando wace udzakhazikika kufikira nthawi zonse.

¹⁵Ntyole ndi cidzudzulo zipatsa nzeru; Koma mwana womlekerera acititsa amace manyazi.

¹⁶Pocuruka oipa zolakwa zicuruka; Koma olungama adzaona kugwa kwao.

¹⁷Langiza mwana wako, ndipo adzakupumitsa; Nadzasangalatsa moyo wako.

¹⁸Popanda cibvumbulutso anthu amasauka; Koma wosunga cilamulo adalitsika.

¹⁹Kapolo sangalangizidwe ndi mau, Pakuti azindikira koma osabvomera.

²⁰Kodi uona munthu wansontho m'mau ace? Ngakhale citsiru cidzacenjera, koma ameneyo ai.

²¹Yemwe alera kapolo wace mwa ufulu kuyambira ubwana wace, Pambuyo pace adzadziyesa mwana wobala.

²²Mwamuna wamkwiyo aputa makangano; Waukali acuruka zolakwa.

²³Kudzikuza kwa munthu kudzamcepetsa; Koma wokhala ndi mtima wodzicepetsa adzalemekezedwa.

²⁴Woyenda ndi mbala ada moyo wace wace; Amva kulumbira, koma osaulula kanthu.

²⁵Kuopa anthu kuchera msampha; Koma wokhulupirira Yehova adzapulumuka,

²⁶Ambiri afunafuna ciyanjano ca mkuru; Koma ciweruzo ca munthu cicokera kwa Yehova.

²⁷Munthu woipa anyansa olungama; Ndipo woongoka m'njira anyansa wocimwa.