Read Buku Lopatulik Miyambi 30 Bible Online

Miyambi 30 - Buku Lopatulik bible

Miyambi 30

¹Mau a Aguri mwana wa Yake; uthenga. Munthuyo anati, Ndadzitopetsa, Mulungu; Ndadzitopetsa, Mulungu, ndathedwa;

²Pakuti ndipambana anthu onse kupulukira, Ndiribe luntha la munthu.

³Sindinaphunzira nzeru Ngakhale kudziwa Woyerayo.

⁴Ndani anakwera kumwamba natsikanso? Ndani wakundika nafumbata mphepo? Ndani wamanga madzi m'maraya ace? Ndani wakhazikitsa matsiriziro onse a dziko? Dzina lace ndani? dzina la mwanace ndani? kapena udziwa.

⁵Mau onse a Mulungu ali oyengeka; Ndiye cikopa ca iwo amene amkhulupirira.

⁶Usaoniezere kanthu pa mau ace, Angakudzudzule, nungatsutsidwe kuti ulikunama.

⁷Zinthu ziwiri ndakupemphani, Musandimane izo ndisanamwalire:

⁸Mundicotsere kutari zacabe ndi mabodza; Musandipatse umphawi, ngakhale cuma, Mundidyetse zakudya zondiyenera;

⁹Ndingakhute ndi kukukanani, ndi kuti, Yehova ndani? Kapena ndingasauke ndi kuba, Ndi kuchula dzina la Mulungu wanga pacabe.

¹⁰Usanamizire kapolo kwa mbuyace, Kuti angakutemberere nawe ndi kutsutsidwa.

¹¹Pali mbadwo wotemberera atate ao, Osadalitsa amao.

¹²Pali mbadwo wodziyesa oyera, Koma osasamba litsilo lao.

¹³Pali mbadwo wokwezatu maso ao, Zikope zao ndi kutukula.

¹⁴Pali mbadwo mano ao akunga malupanga, zibwano zao zikunga mipeni; Kuti adye osauka kuwacotsa kudziko, ndi aumphawi kuwacotsa mwa anthu.

¹⁵Msundu uli ndi ana akazi awiri ati, Patsa, patsa, Pali zinthu zitatu sizikhuta konse, Ngakhale zinai sizinena, Kwatha:

¹⁶Manda, ndi cumba, Dziko losakhuta madzi, Ndi moto wosanena, Kwatha.

¹⁷Diso locitira atate wace ciphwete, ndi kunyoza kumvera amace, Makungubwi a kumtsinje adzalikolowola, ana a mphungu adzalidya,

¹⁸Zinthu zitatu zindithetsa nzeru, Ngakhale zinai, sindizidziwa:

¹⁹Njira ya mphungu m'mlengalenga, Njira ya njoka pamwala, Njira ya ngalawa pakati pa nyanja. Njira ya mwamuna ndi namwali.

²⁰Comweco njira ya mkazi wacigololo; Adya, napukuta pakamwa, nati, Sindinacita zoipa,

²¹Cifukwa ca zinthu zitatu dziko linthunthumira; Ngakhale cifukwa ca zinai silingathe kupirira nazo:

²²Cifukwa ca kapolo pamene ali mfumu; Ndi citsiru citakhuta zakudya;

²³Cifukwa ca mkazi wodedwa wokwatidwa; Ndi mdzakazi amene adzalandira colowa ca mbuyace.

²⁴Ziripo zinai ziri zazing'ono padziko; Koma zipambana kukhala zanzeru:

²⁵Nyerere ndi mtundu wosalimba, Koma zitengeratu zakudya zao m'malimwe.

²⁶Mbira ndi mtundu wopanda mphamvu, Koma ziika nyumba zao m'matanthwe.

²⁷Dzombe liribe mfumu, Koma lituruka lonse mabwalo mabwalo.

²⁸Buluzi ungamgwire m'manja, Koma ali m'nyumba za mafumu.

²⁹Pali zinthu zitatu ziyenda cinya cinya; Ngakhale zinai ziyenda mwaufulu:

³⁰Mkango umene uposa zirombo kulimba, Supambukira cinthu ciri conse;

³¹Kavalo wolimba m'cuuno, ndi tonde, Ndi mfumu yokhala ndi ankhondo ace.

³²Ngati wapusa podzikweza, Ngakhale kuganizira zoipa, tagwira pakamwa.

³³Pakuti potakasa mkaka, mafuta ayengekapo; Ndi popsinja mpfuno, mwazi uturukamo; Ndi potimbikira mkwiyo ndeu ionekamo.