Read Buku Lopatulik Miyambi 6 Bible Online

Miyambi 6 - Buku Lopatulik bible

Miyambi 6

¹Mwananga, ngati waperekera mnzako cikole, Ngati wapangana kulipirira mlendo,

²Wakodwa ndi mau a m'kamwa mwako, Wagwidwa ndi mau a m'kamwa mwako.

³Cita ici tsono; mwananga, nudzipulumutse; Popeza walowa m'dzanja la mnzako, Pita nudzicepetse, numdandaulire mnzako,

⁴Usaone tulo m'maso mwako, Ngakhale kuodzera zikope zako.

⁵Dzipulumutse wekha ngati mphoyo ku dzanja la msaki, Ndi mbalame ku dzanja la msodzi.

⁶Pita kunyerere, wolesi iwe, Penya njira zao nucenjere;

⁷Ziribe mfumu, Ngakhale kapitao, ngakhale mkuru;

⁸Koma zitengeratu zakudya zao m'malimwe; Nizituta dzinthu zao m'masika.

⁹Udzagona mpaka liti, wolesi iwe? Udzauka ku tulo tako liti?

¹⁰Tulo ta pang'ono, kuodzera pang'ono, Kungomanga manja pang'ono, ndi kugona;

¹¹Ndipo umphawi wako udzafika ngati mbala, Ndi kusauka kwako ngati munthu wacikopa.

¹²Munthu wopanda pace, mwamuna wamphulupulu; Amayenda ndi m'kamwa mokhota;

¹³Amatsinzinira ndi maso ace, napalasira ndi mapazi ace, Amalankhula ndi zala zace;

¹⁴Zopotoka ziri m'mtima mwace, amaganizira zoipa osaleka; Amapikisanitsa anthu.

¹⁵Cifukwa cace tsoka lace lidzadza modzidzimuka; Adzasweka msanga msanga, palibe compulumutsa.

¹⁶Ziripo zinthu zisanu ndi cimodzi Mulungu azida; Ngakhale zisanu ndi ziwiri zimnyansa:

¹⁷Maso akunyada, lilime lonama, Ndi manja akupha anthu osacimwa;

¹⁸Mtima woganizira ziwembu zoipa, Mapazi akuthamangira mphulupulu mmangu mmangu;

¹⁹Mboni yonama yonong'ona mabodza, Ndi wopikisanitsa abale.

²⁰Mwananga, sunga malangizo a atate wako, Usasiye malamulo a mako;

²¹Uwamange pamtima pako osaleka; Uwalunze pakhosi pako.

²²Adzakutsogolera ulikuyenda, Ndi kukudikira uli m'tulo, Ndi kulankhula nawe utauka.

²³Pakuti malangizo ndi nyali, malamulo ndi kuunika; Ndi zidzudzulo za mwambo ndizo njira ya moyo;

²⁴Zikucinjiriza kwa mkazi woipa, Ndi ku lilime losyasyalika la mkazi waciwerewere.

²⁵Asakucititse kaso m'mtima mwako, Asakukole ndi zikope zace.

²⁶Pakuti ukayamba ndi mkazi wadama, udzamariza ndi nyenyeswa; Ndipo mkazi wa mwini amasaka moyo wa mtengo wapatari.

²⁷Kodi mwamuna angatenge moto pa cifuwa cace, Osatentha zobvala zace?

²⁸Pena kodi mwamuna angayende pa makala oyaka, Osapsya mapazi ace?

²⁹Comweco wolowa kwa mkazi wa mnzace; Womkhudzayo sadzapulumuka cilango.

³⁰Anthu sanyoza mbala ikaba, Kuti ikhutitse mtima wace pomva njala;

³¹Koma ikapezedwa idzabwezera kasanu ndi kawiri; Idzapereka cuma conse ca m'nyumba yace.

³²Wocita cigololo ndi mkazi alibe nzeru; Wofuna kuononga moyo wace wace ndiye amatero.

³³Adzalasidwa nanyozedwa; Citonzo cace sicidzafafanizidwa.

³⁴Pakuti nsanje ndiyo ukali wa mwamuna, Ndipo sadzacitira cifundo tsiku lobwezera cilango.

³⁵Sadzalabadira ciombolo ciri conse, Sadzapembedzeka ngakhale ucurukitsa malipo,