Read Buku Lopatulik Miyambi 7 Bible Online

Miyambi 7 - Buku Lopatulik bible

Miyambi 7

¹Mwananga, sunga mau anga, Ukundike malangizo anga;

²Sunga malangizo anga, nukhale ndi moyo; Ndi malamulo anga ngati mwana wa diso lako.

³Uwamange pa zala zako, Uwalembe pamtima pako;

⁴Nena kwa nzeru, Ndiwe mlongwanga; Nuche luntha mbale wako.

⁵Kuti zikucinjirizire kwa mkazi waciwerewere, Kwa mlendo wamkazi wosyasyalika ndi mau ace.

⁶Pakuti pa zenera la nyumba yanga Ndinapenyera pa made ace; Ndinaona pakati pa acibwana,

⁷Ndinazindikira pakati pa ang'ono Mnyamata wopanda nzeru,

⁸Alikupita pakhwalala pafupi ndi mphambano ya pa mkaziyo, Ndi kuyenda pa njira ya ku nyumba yace;

⁹Pa madzulo kuli sisiro, Pakati pa usiku pali mdima,

¹⁰Ndipo taona, mkaziyo anamcingamira, Atabvala zadama wocenjera mtima,

¹¹Ali wolongolola ndi wosaweruzika, Mapazi ace samakhala m'nyumba mwace.

¹²Mwina ali kumakwalala, mwina ali kumabwalo, Nabisalira pa mphambano zonse.

¹³Ndipo anagwira mnyamatayo, nampsompsona; Nati kwa iye ndi nkhope yacipongwe,

¹⁴Nsembe za mtendere ziri nane; Lero ndacita zowinda zanga.

¹⁵Cifukwa cace ndaturuka kudzakucingamira, Kudzafunitsa nkhope yako, ndipo ndakupeza.

¹⁶Ndayala zopfunda pakama panga, Nsaru zamangamanga za thonje la ku Aigupto,

¹⁷Ndakapiza pamphasa panga mankhwala onunkhira A mvunja ndi cisiyo ndi mtanthanyerere.

¹⁸Tiye tikondwere ndi cikondano mpaka mamawa; Tidzisangalatse ndi ciyanjano.

¹⁹Pakuti mwamuna kulibe kwathu, Wapita ulendo wa kutari;

²⁰Watenga thumba la ndalama m'dzanja lace, Tsiku lowala mwezi adzabwera kwathu.

²¹Amkakamiza ndi kukoka kwa mau ace, Ampatutsa ndi kusyasyalika kwa milomo yace.

²²Mnyamatayo amtsata posacedwa, monga ng'ombe ipita kukaphedwa; Ndi monga unyolo umadza kulanga citsiru;

²³Mpaka mubvi ukapyoza mphafa yace; Amtsata monga mbalame yotamangira msampha; Osadziwa kuti adzaononga moyo wace.

²⁴Ndipo tsopano, ananga, mundimvere ine, Labadirani mau a m'kamwa mwanga.

²⁵Mtima wako usapatukire ku njira ya mkaziyo, Usasocere m'mayendedwe ace.

²⁶Pakuti amagwetsa ambiri, atawalasa; Ndipo ophedwa ndi iye acurukadi.

²⁷Nyumba yace ndiyo njira ya kumanda, Yotsikira ku zipinda za imfa.