Read Buku Lopatulik Miyambi 8 Bible Online

Miyambi 8 - Buku Lopatulik bible

Miyambi 8

¹Kodi nzeru siitana, Luntha ndi kukweza mau ace?

²Iima pamwamba pa mtunda, Pa mphambano za makwalala;

³Pambali pa cipata polowera m'mudzi, Polowa anthu pa makomo ipfuula:

⁴Ndinu ndikuitanani, amuna, Mau anga ndilankhula kwa ana a anthu.

⁵Acibwana inu, cenjerani, Opusa inu, khalani ndi mtima wozindikira;

⁶Imvani, pakuti ndikanena zoposa, Ndi zolungama potsegula pakamwa panga,

⁷Pakuti m'kamwa mwanga mudzalankhula ntheradi, Zoipa zinyansa milomo yanga.

⁸Mau onse a m'kamwa mwanga alungama; Mwa iwo mulibe zokhota ndi zopotoka.

⁹Onsewo amveka ndi iye amene azindikira; Alungama kwa akupeza nzeru.

¹⁰Landirani mwambo wanga, si siliva ai; Ndi nzeru kopambana ndi golidi wosankhika.

¹¹Pakuti nzeru iposa ngale, Ndi zonse tizifunitsa sizilingana nayo,

¹²Ine Nzeru ndikhala m'kucenjera, ngati m'nyumba yanga; Ndimapeza kudziwa ndi zolingalira.

¹³Kuopa Yehova ndiko kuda zoipa; Kunyada, ndi kudzikuza, ndi njira yoipa, ndi m'kamwa mokhota, ndizida.

¹⁴Ndine mwini uphungu ndi kudziwitsa; Ndine luntha; ndiri ndi mphamvu.

¹⁵Mwa ine mafumu alamulira; Akazembe naweruza molungama.

¹⁶Mwa ine akalonga ayang'anira, Ndi akuru, ngakhale oweruza onse a m'dziko,

¹⁷Akundikonda ndiwakonda; Akundifunafuna adzandipeza.

¹⁸Katundu ndi ulemu ziri ndi ine, Cuma cosatha ndi cilungamo.

¹⁹Cipatso canga ciposa golidi, ngakhale golidi woyengeka; Phindu langa liposa siliva wosankhika.

²⁰Ndimayenda m'njira ya cilungamo, Pakati pa mayendedwe a ciweruzo,

²¹Kuti ndionetse cuma akundikonda, cikhale colowa cao, Ndi kudzaza mosungira mwao.

²²Mulungu anali nane poyamba njira yace, Asanalenge zace zakale.

²³Anandiimika cikhalire ciyambire, Dziko lisanalengedwe.

²⁴Pamene panalibe zozama ndinabadwa ine, Pamene panalibe akasupe odzala madzi.

²⁵Mapiri asanakhazikike, Zitunda zisanapangidwe, ndinabadwa;

²⁶Asanalenge dziko, ndi thengo, Ngakhale ciyambi ca pfumbi la dziko.

²⁷Pamene anakhazika mlengalenga ndinali pompo; Pamene analemba pazozama kwete kwete;

²⁸Polimbitsa Iye thambo la kumwamba, Pokula akasupe a zozama.

²⁹Poikira nyanja malire ace, Kuti madzi asapitirire pa lamulo lace; Polemba maziko a dziko,

³⁰Ndinali pa mbali pace ngati mmisiri; Ndinamsekeretsa tsiku ndi tsiku, Ndi kukondwera pamaso pace nthawi zonse;

³¹Ndi kukondwera ndi dziko lace lokhalamo anthu, Ndi kusekerera ndi ana a anthu.

³²Ndipo tsopano, ananga, mundimvere ine, Ngodala akusunga njira zanga.

³³Imvani mwambo, mukhale anzeru osaukana.

³⁴Ngwodala amene andimvera, nadikira pa zitseko zanga tsiku ndi tsiku, Ndi kulinda pa mphuthu za makoma anga;

³⁵Pakuti wondipeza ine apeza moyo; Yehova adzamkomera mnma.

³⁶Koma wondicimwira apweteka moyo wace; Onse akundida ine akonda imfa.