Read Buku Lopatulik Miyambi 9 Bible Online

Miyambi 9 - Buku Lopatulik bible

Miyambi 9

¹Nzeru yamanga nyumba yace, Yasema zoimiritsa zace zisanu ndi ziwiri;

²Yaphera nyama yace, nisanganiza vinyo wace, Nilongosolanso pa gome lace.

³Yatuma anamwali ace, iitana Pa misanje ya m'mudzi.

⁴Wacibwana yense apambukire kuno; Iti kwa yense wosowa nzeru,

⁵Tiyeni, idyani cakudya canga; Nimumwe vinyo wanga ndamsanganiza.

⁶Lekani, acibwana inu, nimukhale ndi moyo; Nimuyende m'njira ya nzeru.

⁷Woweruza munthu wonyoza adzicititsa yekha manyazi; Yemwe adzudzula wocimwa angodetsa mbiri yace yace.

⁸Usadzudzule wonyoza kuti angakude; Dzudzula wanzeru adzakukonda.

⁹Ukacenjeza wanzeru adzakulitsa nzeru yace; Ukaphunzitsa wolungama adzaonjezera kuphunzira,

¹⁰Ciyambi ca nzeru ndico kuopa Yehova; Kudziwa Woyerayo ndiko luntha;

¹¹Pakuti mwa ine masiku ako adzacuruka, Zaka za moyo wako zidzaonjezedwa.

¹²Ukakhala wanzeru, si yako yako nzeruyo? Ndipo ukanyoza udzasauka wekha.

¹³Utsiru umalongolola, Ngwa cibwana osadziwa kanthu.

¹⁴Ukhala pa khomo la nyumba yace, Pampando pa misanje ya m'mudzi

¹⁵Kuti uitane akupita panjira, Amene angonkabe m'kuyenda kwao,

¹⁶Wacibwana ndani? Apambukire kuno. Ati kwa yense wopanda nzeru,

¹⁷Madzi akuba atsekemera, Ndi cakudya cobisika cikoma.

¹⁸Ndipo mwamunayo sadziwa kuti akufa ali konko; Omwe acezetsa utsiru ali m'manda akuya.