Read Buku Lopatulik Mlaliki 1 Bible Online

Mlaliki 1 - Buku Lopatulik bible

Mlaliki 1

¹MAU a Mlaliki, mwana wa Davide, mfumu ya m'Yerusalemu.

²Zacabecabe, ati Mlaliki; zacabecabe zonse ndi cabe.

³Kodi nchito zace zonse munthu asauka nazo zimpindulira ciani?

⁴Mbadwo wina opita, mbadwo wina nufika; koma dziko lingokhalabe masiku onse,

⁵inde dzuwa lituruka, nililowa, nilifulumira komwe linaturukako.

⁶Kulowa kumwela ndi kuzungulira: kumpoto zungulire zungulire imaomba mphepo; ibweranso monga mwa mazunguliridwe ace.

⁷Mitsinje yonse ithira m'nyanja, koma nyanja yosadzala; komwe imukira mitsinjeyo, komweko ibweranso.

⁸Zinthu zonse zilemetsa; munthu sakhoza kuzifotokoza; maso sakhuta m'kuona, ndi makutu sakhuta m'kumva.

⁹Comwe cinaoneka cidzaonekanso; ndi comwe cinacitidwa cidzacitidwanso; ndipo palibe kanthu katsopano pansi pano.

¹⁰Kodi pali kanthu unganene kuti, Taona katsopano aka? Kanalipo kale, kale lomwe tisanabadwe ife.

¹¹Zoyamba zija sizikumbukiridwa; ngakhale zomwe zirinkudzazo, omwe adzakhalabe m'tsogolomo, sadzazikumbukirai.

¹²Ine Mlaliki ndinali mfumu ya: Israyeli m'Yerusalemu.

¹³Ndipo ndinapereka mtima kufunafuna ndi nzeru, ndi kulondetsa zonse zimacitidwa pansi pa thambo; nchito yobvuta imeneyi Mulungu apatsa ana a anthu akasauke nayo.

¹⁴Ndaona nchito zonse zipangidwa kunja kuno; ndipo zonsezo ndi cabe ndi kungosautsa mtima.

¹⁵Cokhotakhota sicingaongokenso; ndipo coperewera sicingawerengedwe.

¹⁶Ndinalankhula ndi mtima wanga, ndi kuti, Taona, ndakuza ndi kudzienjezera nzeru koposa onse anakhala m'Yerusalemu ndisanabadwe ine; inde mtima wanga wapenyera kwambiri nzeru ndi cidziwitso.

¹⁷Ndipo ndinapereka mtima kudziwa nzeru ndi kudziwa misala ndi utsiru; ndinazindikira kuti icinso cingosautsa mtima.

¹⁸Pakuti m'nzeru yambiri muli cisoni cambiri; ndi yemwe aenjezera cidziwitso aenjezera zowawa.