Read Buku Lopatulik Mlaliki 7 Bible Online

Mlaliki 7 - Buku Lopatulik bible

Mlaliki 7

¹Mbiri yabwino iposa zonunkhira zabwino; ndi tsiku lakumwalira liposa tsiku lakubadwa.

²Kunka ku nyumba ya maliro kupambana kunka ku nyumba ya madyerero; pakuti kujako ndi matsiriziro a anthu onse; ndipo omwe ali ndi moyo adzakumbukirapo.

³Cisoni ciposa kuseka; pakuti nkhope yakugwa ikonza mtima.

⁴Mtima wa anzeru uli m'nyumba ya maliro; koma mtima wa zitsiru uli m'nyumba ya kuseka.

⁵Kumva cidzudzulo ca anzeru kupambana kumva nyimbo ya zitsiru.

⁶Pakuti kuseka kwa citsiru kunga minga irikutetheka pansi pa mphika; icinso ndi cabe.

⁷Indetu nsautso iyarutsa wanzeru; ndi mtulo uipitsa mtima.

⁸Citsiriziro ca kanthu ciposa ciyambi cace; wofatsa mtima apambana wodzikuza mtima.

⁹Usakangaze mumtima mwako kukwiya; pakuti mkwiyo ugona m'cifuwa ca zitsiru.

¹⁰Usanene, Kodi bwanji masiku akale anapambana ano? Pakuti sulikufunsa mwanzeru pamenepo.

¹¹Nzeru iri yabwino pamodzi ndi colowa; akuona dzuwa apindula nayo.

¹²Pakuti nzeru icinjiriza monga ndalama zicinjiriza; koma kudziwa kupambana, cifukwa nzeru isunga moyo wa eni ace.

¹³Tapenya nchito ya Mulungu; pakuti ndani akhoza kulungamitsa comwe iye anacikhotetsa?

¹⁴Tsiku la mwai kondwera, koma tsiku la tsoka lingirira; Mulungu waika ici pambali pa cinzace, kuti anthu asapeze kanthu ka m'tsogolo mwao.

¹⁵Ndaona zonsezi masiku anga acabe; pali wolungama angofa m'cilungamo cace, ndipo pali woipa angokhalabe ndi moyo m'kuipa kwace.

¹⁶Usapambanitse kukhala wolungama; usakhale wanzeru koposa; bwanji ufuna kudziononga wekha?

¹⁷Usapambanitse kuipa, ngakhale kupusa, uferenji nthawi yako isanafike?

¹⁸Kuli kwabwino kugwira ici; indetu, usacotsepo dzanja lako pakuti yemwe aopa Mulungu adzaturuka monsemo.

¹⁹Nzeru ilimbitsa wanzeru koposa akuru khumi akulamulira m'mudzi.

²⁰Pakuti kulibe wolungama pansi pano amene acita zabwino osacimwa.

²¹Mau onsetu onenedwa usawalabadire; kuti usamve kapolo wako alikukutemberera;

²²pakuti kawiri kawiritu mtima wako udziwa kuti nawenso unatemberera ena.

²³Ndayesa zonsezi ndi nzeru; ndinati, Ndidzakhala wanzeru, koma inanditarikira.

²⁴Cakutari ndi cakuyadi adzacipeza ndani?

²⁵Ndinapotoka ndi mtima wanga womwe kudziwa ndi kusanthula ndi kufunafuna nzeru ndi malongosoledwe a zinthu, ndi kudziwa kuti udio ndiwo utsiru, ndi kuti kupusa ndi misala;

²⁶ndipo ndinapeza kanthu kowawa koposa imfa, ndiko mkazi amene ndiye msampha, mtima wace ukunga maukonde, manja ace ndiwo matangadza; yemwe Mulungu amuyesa wabwino adzapulumuka kwa iye; koma wocimwa adzagwidwa naye.

²⁷Taonani, ici ndacipeza, ati Mlalikiyo, m'kuphatikiza cinthu cina ndi cinzace, ndikazindikire malongosoledwe ao;

²⁸comwe moyo wanga ucifuna cifunire, koma osacipezai ndi ici, mwamuna mmodzi mwa cikwi ndinampezadi, koma mkazitu mwa onsewo sindinampeza.

²⁹Taonani, ici cokha ndacipeza kuti Mulungu analenga anthu oongoka mtima; koma iwowo afunafuna malongosoledwe a mitundu mitundu.