Read Buku Lopatulik Nyimbo 1 Bible Online

Nyimbo 1 - Buku Lopatulik bible

Nyimbo 1

¹NYIMBO yoposa, ndiyo ya Solomo.

²Mnyamatayo andipsompsonetse ndi m'kamwa mwace; Pakuti cikondi cako ciposa vinyo.

³Mafuta ako anunkhira bwino; Dzina lako likunga mafuta onunkhira otsanulidwa; Cifukwa cace anamwali akukonda.

⁴Undikoke; tikuthamangire; Mfumu yandilowetsa m'zipinda zace: Tidzasangalala ndi kukondwera ndi iwe. Tidzachula cikondi cako koposa vinyo: Akukonda molungama.

⁵Wakuda ine, koma wokongola, Ana akazinu a ku Yerusalemu, Ngati mahema a Kedara, Ngati nsaru zociriga za Solomo.

⁶Musayang'ane pa ine, pakuti ndada, Pakuti dzuwa landidetsa. Ana amuna a amai anandikwiyira, Anandisungitsa minda yamipesa; Koma munda wanga wanga wamipesa sindinausunga.

⁷Ndiuze, iwe amene moyo wanga ukukonda, Umaweta kuti gulu lako? Umaligonetsa kuti pakati pa usana? Pakuti ndikhalirenji ngati wosocera Pambali pa magulu a anzako?

⁸Ngati sudziwa, mkaziwe woposa kukongola, Dzituruka kukalondola bande la gululo, Nukawete ana a mbuzi zako pambali pa mahema a abusa.

⁹Ndakulinganiza, wokondedwa wanga mnyamatawe, Ngati akavalo a magareta a Farao.

¹⁰Masaya ako akongola ndi nkhata zatsitsi, Ndi khosi lako ndi zinganga za mkanda wonyezimira.

¹¹Tidzakupangira nkhata zagolidi Ndi njumu zasiliva.

¹²Pokhala mfumu podyera pace, Mphoka yanga inanunkhira.

¹³Wokondedwa wanga mnyamatayo ali kwa ine ngati thumba la nipa, Logona pakati pa maere anga.

¹⁴Wokondedwa wanga ali kwa ine ngati cipukutu ca maluwa ofiira M'minda yamipesa ya ku Engedi.

¹⁵Taona, wakongolatu, bwenzi langa; namwaliwe taona, wakongola, Maso ako akunga a nkhunda.

¹⁶Taona, wakongolatu, bwenzi langa, mnyamatawe, inde, wakongoletsa; Pogona pathu mpa msipu.

¹⁷Mitanda ya nyumba zathu nja mikungudza, Ndi mapaso athu nga mlombwa.