Read Buku Lopatulik Nyimbo 2 Bible Online

Nyimbo 2 - Buku Lopatulik bible

Nyimbo 2

¹Ndine duwa lofiira la ku Saroni, Ngakhale kakombo wa kuzigwa.

²Ngati kakombo pakati pa minga Momwemo wokondedwa wanga pakati pa ana akazi.

³Ngati maula pakati pa mitengo ya m'nkhalango, Momwemo wokondedwa wanga pakati pa ana amuna. Ndinakondwa pakukhala pa mthunzi wace, Zipatso zace zinatsekemera m'kamwa mwanga.

⁴Anandifikitsa ku nyumba ya vinyo, Mbendera yace yondizolimira inali cikondi.

⁵Mundilimbikitse ndi mphesa zouma, munditonthoze mtima ndi maula, Pakuti ndadwala ndi cikondi.

⁶Dzanja lace lamanzere anditsamiritse kumutu, Dzanja lace lamanja ndi kundifungatira.

⁷Ndikulumbirirani, ana akazi inu a ku Yerusalemu, Pali mphoyo, ndi nswala za kuthengo, Kuti musautse, ngakhale kugalamutsa cikondi, Mpaka cikafuna mwini.

⁸Mau a wokondedwa wanga mnyamatayo! Taona, adza, Alikulumpha pamapiri, alikujidimuka pazitunda.

⁹Wokondedwa wanga akunga mphoyo, pena mwana wa mbawala: Taona, aima patseri pa khoma pathu, Apenyera pazenera, Nasuzumira pamade.

¹⁰Wokondedwa wanga analankhula, nati kwa ine, Tauka, bwenzi langa, wokongola wanga, tiye.

¹¹Pakuti, taona, cisanu catha, Mvula yapita yaleka;

¹²Maluwa aoneka pansi; Nthawi yoyimba mbalame yafika, Mau a njiwa namveka m'dziko lathu;

¹³Mkuyu uchetsa nkhuyu zace zosakhwima, Mipesa niphuka, Inunkhira bwino. Tauka, bwenzi langa, wokongola wangawe, tiyetu.

¹⁴Nkhunda yangawe, yokhala m'ming'alu ya thanthwe, mobisika motsetsereka, Ndipenye nkhope yako, ndimve manako; Pakuti mau ako ngokoma, nkhope yako ndi kukongola.

¹⁵Mutigwirire ankhandwe, ngakhale ang'ono, amene akuononga minda yamipesa; Pakuti m'minda yathu yamipesa muphuka biriwiri.

¹⁶Wokondedwa wanga ndi wa ine, ine ndine wace: Aweta zace pakati pa akakombo,

¹⁷Mpaka dzuwa litapepa, mithunzi ndi kutanimpha, Bwera, bwenzi langawe, nukhale ngati mphoyo pena mwana wa mbawala Pa mapiri a mipata.