Read Buku Lopatulik Nyimbo 3 Bible Online

Nyimbo 3 - Buku Lopatulik bible

Nyimbo 3

¹Usiku pamphasa panga ndinamfunafuna amene moyo wanga umkonda: Ndinamfunafuna, koma osampeza.

²Ndinati, Ndiuketu, ndiyendeyende m'mudzi, M'makwalala ndi m'mabwalo ace, Ndimfunefune amene moyo wanga umkonda: Ndimfunafuna, koma osampeza.

³Alonda akuyendayenda m'mudzi anandipeza: Ndinati, Kodi munamuona amene moyo wanga umkonda?

⁴Nditawapitirira pang'ono, Ndinampeza amene moyo wanca umkonda: Ndinamgwiriziza, osamfumbatula, Mpaka nditamlowetsa m'nyumba ya amai, Ngakhale m'cipinda ca wondibala.

⁵Ndikulumbirirani, ana akazi inu a ku Yerusalemu, Pali mphoyo, ndi nswala ya kuthengo, Kuti musautse, ngakhale kugalamutsa cikondi, Mpaka cikafuna mwini.

⁶Ndaniyu akwera kuturuka m'cipululu ngati utsi wa tolo, Wonunkhira ndi nipa ndi mtanthanyerere, Ndi zonunkhiritsa zonse za wogulitsa?

⁷Taonani, ndi macila a Solomo; Pazingapo amuna amphamvu makumi asanu ndi limodzi, A mwa ngwazi za Israyeli.

⁸Onsewo agwira lupanga, nazolowera nkhondo: Yense ali ndi lupanga lace pancafu pace, Cifukwa ca upandu wa usiku.

⁹Solomo mfumu anadzipangira macila okhalamo tsonga Ndi matabwa a ku Lebano.

¹⁰Anapanga timilongoti tace ndi siliva, Ca pansi pace ndi golidi, mpando wace ndi nsaru yakuda, Pakati pace panayalidwa za cikondi ca ana akazi a ku Yerusalemu.

¹¹Turukani, ana akazi inu a Ziyoni, mupenye Solomo mfumu, Ndi korona amace anambveka naye tsiku la ukwati wace, Ngakhale tsiku lakukondwera mtima wace.