Read Buku Lopatulik Nyimbo 5 Bible Online

Nyimbo 5 - Buku Lopatulik bible

Nyimbo 5

¹Ndalowa m'munda mwanga, mlongwanga, mkwatibwi: Ndachera nipa yanga ndi zonunkhiritsa zanga; Ndadya uci wanga ndi cisa cace; Ndamwa vinyo wanga ndi mkaka wanga. Idyani, atsamwalinu, Imwani, mwetsani cikondi.

²Ndinagona tulo, koma mtima wanga unali maso: Ndi mau a bwenzi langa mnyamatayo agogoda, nati, Nditsegulire, mlongwanga, wokondedwa wanga, nkhunda yanga, wangwiro wanga: Pakuti pamtu panga padzala mame, Patsitsi panga pali madontho a usiku.

³Ndinayankha kuti, Ndabvula maraya anga, ndiwabvalenso bwanji? Ndatsuka mapazi anga; ndiwadetserenii?

⁴Bwenzi langa analonga dzanja lace pazenera, Mtima wanga ndi kuguguda cifukwa ca iye,

⁵Ndinauka ndikatsegulire bwenzi langa; Pamanja panga panakha nipa. Ndi pa zala zanga madzi a nipa, Pa zogwirira za mpikizo,

⁶Ndinamtsegulira bwenzi langalo; Koma ndinampeza, bwenzi langa atacoka. Moyo wanga unalefuka polankhula iye: Ndinamfunafuna, osampeza; Ndinamuitana, koma sanandibvomera.

⁷Alonda akuyenda m'mudzi anandipeza, Nandikantha, nanditema; Osunga maguta nandicotsera cophimba canga.

⁸Ndikulumbirirani, ana akazi inu a ku Yerusalemu, Mukapeza bwenzi langa, mudzamuuza ciani? Kuti ndadwala ndi cikondi.

⁹Bwenzi lako aposa abwenzi ena bwanji, Mkaziwe woposa kukongola? Bwenzi lako aposa abwenzi ena bwanji, Kuti utilumbirira motero?

¹⁰Wokondedwa wanga ali woyera ndi wofiira, Womveka mwa zikwi khumi.

¹¹Mutu wace ukunga golidi, woyengetsa, Tsitsi lace lopotana, ndi lakuda ngati khungubwi.

¹²Ana a maso ace akunga nkhunda pambali pa mitsinje ya madzi; Otsukidwa ndi mkaka, okhala pa mitsinje yodzala.

¹³Masaya ace akunga citipula cabzyalamo ndiwo, Ngati mitumbira yoyangapo masamba onunkhira: Milomo yace ikunga akakombo, pakukhapo madzi a nipa.

¹⁴Manja ace akunga zing'anda zagolidi zoikamo zonyezimira zoti biriwiri: Thupi lace likunga copanga ca minyanga colemberapo masafiro.

¹⁵Miyendo yace ikunga zoimiritsa za mwala wonyezimira, Zogwirika m'kamwa mwa golidi: Maonekedwe ace akunga Lebano, okometsetsa ngati mikungudza.

¹⁶M'kamwa mwace muli mokoma: inde, ndiye wokondweretsa ndithu. Ameneyu ndi wokondedwa wanga, ameneyu ndi bwenzi langa, Ana akazi inu a ku Yerusalemu.