Read Buku Lopatulik Nyimbo 6 Bible Online

Nyimbo 6 - Buku Lopatulik bible

Nyimbo 6

¹Bwenzi lako wapita kuti, Mkaziwe woposa kukongola? Bwenzi lako wapambukira kuti, Tikamfunefune pamodzi nawe?

²Bwenzi langa watsikira kumunda kwace, Ku zitipula za mphoka, Kukadya kumunda kwace, ndi kuchera akakombo.

³Ndine wace wa wokondedwa wanga, wokondedwa wanganso ndiye wa ine; Aweta zace pakati pa akakombo.

⁴Wakongola, bwenzi langa, namwaliwe ngati Tiriza, Wokoma ngati Yerusalemu, Woopsya ngati nkhondo ndi mbendera.

⁵Undipambutsire maso ako, Pakuti andiopetsa. Tsitsi lako likunga gulu la mbuzi, Zigona pambali pa Gileadi.

⁶Mano ako akunga gulu la nkhosa zazikazi, Zikwera kucokera kosamba; Yonse iri ndi ana awiri, Palibe imodzi yopoloza.

⁷Palitsipa pako pakunga phande la khangaza Patseri pa cophimba cako.

⁸Alipo akazi akulu a mfumu makumi asanu ndi limodzi, Kudza akazi ang'ono makumi asanu ndi atatu, Ndi anamwali osawerengeka.

⁹Nkhunda yanga, wangwiro wangayu, ndiye mmodzi; Ndiye wobadwa yekha wa amace; Ndiye wosankhika wa wombala. Ana akazi anamuona, namucha wodala; Ngakhale akazi akulu a mfumu, ndi akazi ang'ono namtamanda.

¹⁰Nati, Ndaniyo aturuka ngati mbanda kuca, Wokongola ngati mwezi, Woyera ngati dzuwa, Woopsya ngati nkhondo ndi mbendera?

¹¹Ndinatsikira ku munda wa ntedza, Kukapenya msipu wa m'cigwa, Kukapenya ngati pamipesa paphuka, Ngati pamakangaza patuwa maluwa.

¹²Ndisanazindikire, moyo wanga unandiimika Pakati pa magareta a anthu anga aufulu.

¹³Anati, Bwera, bwera, Msulamiwe; Bwera, bwera, tiyang'ane pa iwe. Muyang'aniranji pa Msulami, Ngati pa masewero akuguba?