Read Buku Lopatulik Maliro 3 Bible Online

Maliro 3 - Buku Lopatulik bible

Maliro 3

¹Ine ndine munthuyu wakuona msauko ndi ndodo ya ukali wace.

²Wanditsogolera, nandiyendetsa mumdima, si m'kuunika ai.

³Zoonadi amandibwezera-bwezera dzanja lace monditsutsa tsiku lonse.

⁴Wagugitsa thupi langa ndi khungu langa, natyola mafupa anga.

⁵Wandimangira zitando za nkhondo, wandizinga ndi ulembe ndi mabvuto.

⁶Wandikhalitsa mumdima ngati akufakale.

⁷Wanditsekereza ndi guta, sindingaturuke; walemeretsa unyolo wanga.

⁸Inde, popfuula ine ndi kuitana andithandize amakaniza pemphero langa.

⁹Watsekereza njira zanga ndi miya la yosema, nakhotetsa mayendedwe anga.

¹⁰Andikhalira cirombo colalira kapena mkango mobisalira.

¹¹Wapambutsa njira zanga, nanding'amba; nandipululutsa.

¹²Wathifula uta wace, nandiyesa polozetsa mubvi.

¹³Walowetsa m'imso mwanga mibvi ya m'phodo mwace.

¹⁴Ndasanduka wondiseka mtundu wanga wonse, ndi nyimbo yao tsiku lonse.

¹⁵Wandidzaza ndi zowawa, wandikhutitsa civumulo.

¹⁶Watyolanso mano anga ndi tinsangalabwi, wandikuta ndi phulusa.

¹⁷Watarikitsanso moyo wanga ndi mtendere; ndinaiwala zabwino.

¹⁸Ndipo ndinati, Mphamvu yanga yatha, osayembekezanso kanthu kwa Yehova.

¹⁹Kumbukirani msauko Wanga ndi kusocera kwanga, ndizo civumulo ndi ndulu.

²⁰Moyo wanga uzikumbukirabe nuwerama mwa ine,

²¹Ndiri naco ciyembekezo popeza ndilingalira ici ndiyembekeza kanthu.

²²Cifukwa cakusathedwa ife ndico cifundo ca Yehova, pakuti cisoni cace sicileka;

²³Cioneka catsopano m'mawa ndi m'mawa; mukhulupirika ndithu.

²⁴Moyo wanga uti, Gawo langa ndiye Yehova; cifukwa cace ndidzakhulupirira.

²⁵Yehova akhalira wabwino omlindirira, ndi moyo womfunafuna.

²⁶Nkokoma kuti munthu ayembekeze ndi kulindirira modekha cipulumutso ca Yehova.

²⁷Nkokoma kuti munthu asenze gori ali wamng'ono.

²⁸Akhale pa yekha, natonthole, pakuti Mulungu wamsenzetsa ilo.

²⁹Aike kamwa lace m'pfumbi; kapena ciripo ciyembekezo.

³⁰Atembenuzire wompanda tsaya lace, adzazidwe ndi citonzo.

³¹Pakuti Yehova sadzataya kufikira nthawi zonse,

³²Angakhale aliritsa, koma adzacitira cisoni monga mwa kucuruka kwa zifundo zace.

³³Pakuti samasautsa dala, ngakhale kumvetsa ana a anthu cisoni.

³⁴Kupondereza andende onse a m'dziko,

³⁵Kupambutsa ciweruzo ca munthu pamaso pa Wam'mwambamwamba,

³⁶Kukhotetsa mlandu wa munthu, zonsezi Ambuye sazikonda.

³⁷Ndani anganene, conena cace ndi kucitikadi, ngati Ambuye salamulira?

³⁸Kodi m'kamwa mwa Wam'mwambamwamba simuturuka zobvuta ndi zabwino?

³⁹Kodi munthu wamoyo adandauliranji pokhala m'zocimwa zace?

⁴⁰Tisanthule ntiyese njira zathu ntibwerenso kwa Yehova.

⁴¹Titukulire mitima yathu ndi, manja athu omwe kwa Mulungu ali kumwamba.

⁴²Ife tilakwa ndi kupikisana nanu, ndipo Inu simunatikhululukira.

⁴³Mwadzikuta ndi mkwiyo ndi kutilondola, mwatipha osacitira cisoni.

⁴⁴Mwadzikuta ndi mtambo kuti pemphero lathu lisapyolemo.

⁴⁵Mwatiika pakati pa amitundu ngati zinyalala ndi za kudzala.

⁴⁶Adani athu onse anatiyasamira,

⁴⁷Mantha ndi dzenje zitifikira, ndiphokose ndi cionongeko.

⁴⁸M'diso mwanga mutsikamitsinje ya madzi cifukwa ca mwana wamkazi wa anthu amtundu wanga woonongedwa,

⁴⁹Diso langa lingotsanulira osaleka, osapumula,

⁵⁰Kufikira Yehova adzazolika kumwamba ndi kuona;

⁵¹Diso langa limvetsa moyo wanga zowawa cifukwa ca ana akazi onse a m'mudzi mwanga.

⁵²Ondida opanda cifukwa anandiinga ngati mbalame;

⁵³Anaononga moyo wanga m'dzenje, naponya mwala pamwambapaine;

⁵⁴Madzi anayenda pamwamba pa mutu panga, ndinati, dalikhidwa.

⁵⁵Ndinaitana dzina lanu, Yehova, ndiri m'dzenje lapansi;

⁵⁶Munamva mau anga; musabise khutu lanu popuma ndi popfuulaine.

⁵⁷Munayandikira tsiku la kukuitanani ine; munati, Usaope.

⁵⁸Ambuye munanenera moyo wanga mirandu yace; munaombola moyo wanga.

⁵⁹Yehova, mwaona coipa anandicitiraco, mundiweruzire;

⁶⁰Mwaona kubwezera kwao konse ndi zopangira zao zonse za pa ine.

⁶¹Mwamva citonzo cao, Yehova, ndi zopangira zao zonse za pa ine,

⁶²Milomo ya akutsutsana nane ndi zolingalira zao za pa ine tsiku lonse.

⁶³Taonani kukhala ndi kunyamuka kwao; ndine nyimbo yao.

⁶⁴Mudzawabwezera cilango, Yehova, monga mwa macitidwe a manja ao;

⁶⁵Muphimbe mtima wao ndi kuwatemberera;

⁶⁶Mudzawalondola mokwiya ndi kuwaononga pansi pa thambo la Yehova.