Read Buku Lopatulik Numeri 21 Bible Online

Numeri 21 - Buku Lopatulik bible

Numeri 21

¹Pamene Mkanani, mfumu ya Aradi, wokhala kumwela, anamva kuti Israyeli anadzera njira ya azondi, anathira nkhondo pa Israyeli, nagwira ena akhale ansinga.

²Ndipo Israyeli analonjeza cowinda kwa Yehova, nati, Mukadzaperekatu anthu awa m'dzanja langa, ndidzaononga midzi yao konse.

³Ndipo Yehova anamvera mau a Israyeli, napereka Akanani; ndipo anawaononga konse ndi midzi yao yomwe; nacha dzina lace la malowo Horima.

⁴Ndipo anayenda ulendo kucokera ku phiri la Hori, nadzera njira ya Nyanja Yofiira, kupaza ku dziko la Edomu; ndi mtima wa anthu unada cifukwa ca njirayo.

⁵Ndipo anthu ananena motsutsana ndi Mulungu, ndi Mose, ndi kuti, Mwatikwezeranji kuticotsa ku Aigupto kuti tifere m'cipululu? pakuti mkate ndi madzi palibe, ndi mtima wathu walema nao mkate wacabe uwu.

⁶Pamenepo Yehova anatumiza njoka zamoto pakati pa anthu, ndipo zinaluma anthu; nafapo anthu ambiri a Israyeli.

⁷Ndipo anthu anadza kwa Mose, nati, Tacimwa, popeza tinanena motsutsana ndi Yehova, ndi inu; pempherani kwa Yehova kuti aticotsere njokazi. Ndipo Mose anawapempherera anthu.

⁸Pamenepo Yehova anati kwa Mose, Upange njoka yamoto; nulike pa mtengowace; ndipo kudzali, kuti onse olumwa, akuipenya njokayo, adzakhala ndi moyo.

⁹Ndipo Mose anapanga njoka yamkuwa, naiika pamtengo; ndipo kunali, njoka itamluma munthu ali yense, nakapenyetsetsa iye pa njoka yamkuwa, nakhala ndi moyo.

¹⁰Pamenepo ana a Israyeli anayenda ulendo, namanga mahema m'Oboti.

¹¹Ndipo anacoka ku Oboti, namanga mahema ku Iyebarimu, m'cipululu cakuno ca Moabu, koturukira dzuwa.

¹²Pocokapo anayenda ulendo, namanga mahema m'cigwa ca Zaredi.

¹³Atacokako anayenda ulendo, namanga mahema tsidya tina la Arinoni, wokhala m'cipululu, wogwera ku malire a Aamori; popeza Arinoni ndiwo malire a Moabu, pakati pa Moabu ndi Aamori.

¹⁴Cifukwa cace, ananena m'buku la Nkhondo za Yehova, Vahebi m'Sufa, Ndi miyendo ya Arinoni;

¹⁵Ndi zigwa za miyendoyo Zakutsikira kwao kwa Ari, Ndi kuyandikizana ndi malire a Moabu.

¹⁶Ndipo atacokapo anamuka ku Been, ndico citsime cimene Yehova anacinena kwa Mose, Sonkhanitsa anthu, ndipo ndidzawapatsa madzi.

¹⁷Pamenepo Israyeli anayimba nyimbo iyi: Tumphuka citsime iwe; mucithirire mang'ombe;

¹⁸Citsime adakumba mafumu, Adacikonza omveka a anthu; Atanena mlamuli, ndi ndodo zao. Ndipo atacoka kucipululu anamuka ku Matana;

¹⁹atacoka ku Matana ku Nahaliyeli; atacoka ku Nahaliyeli ku Bamoti;

²⁰atacoka ku Bamoti ku cigwa ciri m'dziko la Moabu, ku mutu wa Pisiga, popenyana ndicipululu.

²¹Ndipo Israyeli anatuma amithenga kwa Sihoni mfumu ya Aamori, ndi kuti,

²²Ndipitire pakati pa dziko lako; sitidzapatuka kulowa m'munda, kapena m'munda wampesa, sitidzamwako madzi a m'zitsime; tidzatsata mseu wacifumu, kufikira tapitirira malire ako.

²³Ndipo Sihoni sanalola Israyeli apitire m'malire ace; koma Sihoni anamemeza anthu ace onse, nadzakomana naye Israyeli m'cipululu, nafika ku Jahazi, nathira nkhondo pa Israyeli.

²⁴Ndipo Israyeli anamkantha ndi lupanga lakuthwa, nalanda dziko lace likhale lao lao, kuyambira Arinoni kufikira Yaboki, kufikira ana ai Amoni; popeza malire a ana a Amoni ndiwo olimba.

²⁵Ndipo Israyeli analanda midzi iyi yonse; nakhala Israyeli m'midzi yonse ya Aamori; m'Hesiboni ndi miraga yace yonse.

²⁶Popeza Hesiboni ndiwo mudzi wa Sihoni mfumu ya Aamori, imene idathira nkhondo pa mfumu idafayo ya Moabu, nilanda dziko lace m'dzanja lace kufikira Arinoni.

²⁷Cifukwa cace iwo akunena mophiphiritsa akuti, Idzani ku Hesiboni, Mudzi wa Sihoni umangike, nukhazikike:

²⁸Popeza moto unaturuka m'Hesiboni, Cirangali ca mota m'mudzi wa Sihoni; Catha Ari wa Moabu, Eni misanje ya Arinoni.

²⁹Tsoka kwa iwe, Moabu! Mwaonongeka, anthu a Kemosi inu, Anapereka ana ace amuna opulumuka, Ndi ana ace akazi akhale ansinga, Kwa Sihoni mfumu ya Aamori.

³⁰Tinawagwetsa; Hesiboni waonongeka kufikira ku Diboni, Ndipo tinawapululutsa kufikira ku Nofa, Ndiwo wakufikira ku Medeba.

³¹Comweco Israyeli anakhala m'dziko la Aamori.

³²Ndipo Mose anatumiza anthu akazonde Yazere, nalanda miraga yace, napitikitsa Aamori a komweko.

³³Ndipo anatembenuka nakwera kudzera njira ya ku Basanu; ndipo Ogi mfumu ya ku Basana anaturuka kukumana nao, iye ndi anthu ace onse, kudzacita nao nkhondo ku Edreyi.

³⁴Ndipo Yehova anati kwa Mose, Usamuopa; popeza ndampereka m'manja mwako, iye ndi anthu ace onse, ndi dziko lace; umcitire monga umo unacitira Sihoni mfumu ya Aamori anakhalayo ku Hesiboni.

³⁵Ndipo anamkantha iye, ndi ana ace amuna ndi anthu ace onse, kufikira sanatsala ndi mmodzi yense; nalanda dziko lace likhale lao lao.