Read Buku Lopatulik Numeri 24 Bible Online

Numeri 24 - Buku Lopatulik bible

Numeri 24

¹Pamene Balamu anaona kuti kudakomera pamaso pa Yehova kudalitsa Israyeli, sanamuka, monga nthawi zija zina, ku nyanga zolodzera, koma anayang'ana nkhope yace kucipululu.

²Ndipo Balamu anakweza maso ace, naona Israyeli alikukhala monga mwa mafuko ao; ndipo mzimu wa Mulungu unadza pa iye.

³Pamenepo ananena fanizo lace, nati, Balamu mwana wa Beori anenetsa, Ndi munthuyo anatsinzina maso anenetsa;

⁴Wakumva mau a Mulungu anenetsa, Wakuona masomphenya a Wamphamvuyonse, Wakugwa pansi maso ace openyuka:

⁵Ha! mahema ako ngokoma, Yakobo; Zokhalamo zako, Israyeli!

⁶Ziyalika monga zigwa, Monga minda m'mphepete mwanyanja, Monga khonje waoka Yehova, Monga mikungudza m'mphepete mwa madzi.

⁷Madzi adzayenda naturuka m'zotungira zace, Ndi mbeu zace zidzakhala ku madzi ambiri, Ndi mfumu yace idzamveka koposa Agagi, Ndi ufumu wace udzamveketsa.

⁸Mulungu amturutsa m'Aigupto; Ali nayo mphamvu yonga ya njati; Adzawadya amitundu, ndiwo adani ace. Nadzaphwanya mafupa ao, Ndi kuwapyoza ndi mibvi yace.

⁹Anaunthama, nagona pansi ngati mkango, Ngati mkango waukazi; adzamuutsa ndani? Wodalitsika ali yense wakudalitsa iwe, Wotemberereka ali yense wakutemberera iwe.

¹⁰Pamenepo Balaki anapsa mtima pa Balamu, naomba m'manja; ndipo Balaki anati kwa Balamu, Ndinakuitana kutemberera adani ansa, ndipo unawadalitsa ndithu katatu tsopano.

¹¹Cifukwa cace thawira ku malo ako tsopano; ndikadakucitira ulemu waukuru; koma, taona, Yehova wakuletsera ulemu.

¹²Ndipo Balamu anati kwa Balaki, Kodi sindinauzanso amithenga anu amene munawatumiza kwa ine, ndi kuti,

¹³Cinkana Balaki akandipatsa nyumba yace yodzala ndi siliva ndi golidi, sindikhoza kutumpha mau a Yehova, kucita cokoma kapena coipa ine mwini wace; conena Yehova ndico ndidzanena ine?

¹⁴Ndipo tsopano, taonani, ndimuka kwa anthu a mtundu wanga; tiyeni, ndidzakulangizani, ndi kukuuzani zimene anthu awa adzacitira anthu anu, masiku otsiriza.

¹⁵Ndipo ananena fanizo lace, nati, Balamu mwana wa Beori anenetsa, Ndi munthu wotsinzina masoyo anenetsa;

¹⁶Anenetsa wakumva mau a Mulungu, Ndi kudziwa nzeru ya Wam'mwambamwamba, Wakuona masomphenya a Wamphamvuyonse, Wakugwa pansi wopenyuka maso;

¹⁷Ndimuona, koma tsopano ai; Ndimpenya, koma si pafupi ai; Idzaturuka nyenyezi m'Yakobo, Ndi ndodo yacifumu idzauka m'Israyeli, Nidzakantha malire a Moabu, Nidzapasula ana onse a Seti,

¹⁸Ndi Edomu adzakhala ace ace, Seiri lomwe lidzakhala lace lace, ndiwo adani ace;

¹⁹Koma Israyeli adzacita zamphamvu. Ndipo wina woturuka m'Yakobo adzacita ufumu; Nadzapasula otsalira m'mudzi.

²⁰Ndipo anayang'ana ku Amaleki, nanena fanizo lace, nati, Amaleki ndiye woyamba wa amitundu; Koma citsiriziro cace, adzaonongeka ku nthawi zonse.

²¹Ndipo anayang'ana Akeni, nanena fanizo lace, nati, Kwanu nkokhazikika, Wamanga cisa cako m'thanthwe.

²²Koma Kaini adzaonongeka, Kufikira Asuri adzakumanga nsinga.

²³Ndipo ananena fanizo lace, nati, Ha! adzakhala ndi moyo ndani pakucita ici Mulungu?

²⁴Koma zombo zidzafika kucokera ku doko la Kitimu, Ndipo adzasautsa Asuri, nadzasautsa Ebere, Koma iyenso adzaonongeka.

²⁵Ndipo Balamu anauka, namuka nabwerera kumalo kwace; ndi Balaki yemwe anamka njira yace.