Read Bum Lûk 11 Bible Online

Lûk 11 - Bum bible

Lûk 11

¹À ndùku mô tuk lefu Jisòs hì jə̂mà wu lùk. À hì mô te wù jə̀ma mihe, jùmtìbàmsù wunsu lesu jis ha wun na, “Bâba, yiki ghàh nì gha ghe ghàh kəta hi tè jìs a wu yu afa ghàh jə̂mà, kəbi yi ghəl te Jon tì yike jùmtìbàmsù wunsu.”

²Jisòs jis ha ghɨna na, “Ghàn mò hi jə̀m, ghàn hi jîsà na: ‘Bâ, nì ma ghɨta hi kokhe yet ya, nì ma fə̂n wa ben.

³Yəhi ghàh lân, ma wò yəhi ghàh tuk mù jɨ̀m.

⁴Lèhifo ghàh a ghàh a gha a be beka ghàh lèhèfo lò nâbi nde we wù ne be ha ghàh. Kə wò de na mômhìnì ben ha ghàh.’”

⁵Wù fî jis ha ghɨna na, “Wùt a ghàn a fùtɨ̂n làhi yèn a sô wùn a ndâ ntên ntuksu hi jìs ha wûn na, ‘Sô mù, fo mu nì ban wù tât,

⁶beka sô mù wùlè ti lyi ben a mô ndâ chyâ yênà gbî, mu kəta wi shyə yəna hi fo ha wûn.’

⁷Sun wâ we làhi kaha fîsì kə fùtɨ̂n à ndâ na, ‘Kə wò fi fo ngə̂k ha mu. Mu ti nîŋì nì mwəlà mâmù, mu wijə hi kaha lòtì hi fo a shyə ha wò,’

⁸ma wò ni ghə? Mu fòktè ha ghàn na, wù shìki bu hi lòte fô a shyə ha wò kum wu sun, ma wù nê lòtê fo nâbi ghə te wò khɨŋa beka wò mò kə afû chyate kə wûn.

⁹Kum ni, mu jìsà ha ghàn na, ghàn hi bufa kə yi bûf, ma ghɨ nê fo ha ghàn, khɨŋa kə yi khɨ̂ŋ, ma ghàn nê yen, kûmtè kə yi kûmtì ndâ ma ghɨ nê jimi ha ghàn.

¹⁰Beka à buf nâbi nde, ma ghɨ fo, à khɨŋa nâbi nde wù yen lò, à kùmti nâbi nde jwo ndâ, ma ghɨ jimi ha wûn.

¹¹À mò wùni bè wan a ghàn a fùtɨ̂n a we wù mò hi fô ywò ha wan, a wu yu afa wan bufa yili agha,

¹²à mò wùni wù mò hi fô nyakfu chyəfu ha wan, a wu yu afa wan bufa wumi agha?

¹³Ghɨt a be te ghàn hì khə hi fô mwə̀ mù jùŋ ha mwəlà, nâ Bì wânù we wù mò a nyə̂ nê faŋ hi fo Yohnà Yulena ha ghɨt ghe ghɨ bufa ha wûn agha?”

¹⁴À ndùku mô tuk lefu Jisòs hì jûmà fihe yohnù wu be a wùt wu wùn, a mô yani, wù nê na wùt àtɨ̂n hi mô jîsà wi. Te wù jùma ya, wùt àtɨ̂n yîmì hi tè jìs. Nôn à ghɨ̂t ghe ghɨ ndùku mô afû, hì mô nì kani.

¹⁵Biyani ghɨt ale jis na, “Wù jùmà fihe yohnù wu be a Bèlsibùl a jyak, fə̀n wù yohnù wu be.”

¹⁶Ghɨta kəbi a nòn afû, hì khɨŋa lumu hi kwo Jisòs atɨ̂n, ki jîs na wù ni gha kanani yile hi chwûtì na jyak a wuna lo kə nâ ha Yènfù.

¹⁷Jisòs khɨli kwâktì tu ghɨna tu jis ha ghɨna na, “À mò nâbi yìni laki a yi kəta jyàhè wùna, ma yi nê fen. Sah yi nda shìki bu jwo yì mòk, ma yi bê jyahi.”

¹⁸Kum ni, Satàn shìki nô ngɨŋ à wûn, ma fə̂n wù wunu nê timi yàni? Mu jìsà ni, beka ghàn jìsà na mu jùmà fihe yohnù wu be a jyak a fo Bèlsibùl.

¹⁹Mu shìki jûmà fihe yohnù wu be nì jyaka a fo Bèlsibùl, ghɨt ghana ghê jûmà fihe ya, a fo nde jyaka ha ghɨna agha? À nè chwûtè kə ghɨt ghɨ̂n na ghàn wàmalò, ma ghàn jìsà hamok kum mu.

²⁰À fo Yènfù jyaka na mu hi jûmà fihe yohnù wu be wûn. Yi chwûtè na fə̂n wù Fùyènù ti ben ha ghàn.

²¹“À hì mô wu yu afa wùt à jyak bakte mwə̀ mù wûn mù wòŋ hì chînà bɨn a wuna, mwə̀ mù wûn mù jɨ̀m bonlò.”

²²Wùt à jyak wùlè ki bên, tâ chyâ wûn, nô yə wûn, ma wù kumti mwə̀ mù wòŋ mù wun me wù ndùku samhe atɨ̂n bakhe nì mwə̀ mù wûn mù jɨ̀m, ma wù jyàtê yen ha ngwàk à wûn.

²³“À shìki bu nâbi nde a wô mòk ghàh à wûn, ma yi nê hi chwûtè na wù nòlò mu. À shìki gâmtè wi nâbi nde mu hi tè chìntè ghɨt a Fùyènà, ma wù hi sahà yi sâh.”

²⁴“À yè mô a wu yu afa yohnà be fwo a wùt wù wùn, ghɨ yen hi gbê kata kə luktu yim tù jɨ̀m, khɨŋa wu luk hi yutì, ghɨ faŋ hi yên, ghɨ jis a wun a ngɨŋ na, ‘Mu nè kaha yênàlò a ndâ afa mu ye fwo atɨ̂n.’

²⁵Ghɨ kaha yen a ndâ afû, ma ghɨ ti fî fati yah bakti mwə̀lû atɨ̂n,

²⁶wù kaha yen lyi ben nì yohnù wu be wùlè sàmba, wù bəma chya ghê ma wu lyê hi chyə a wùt atɨ̂n wu wùn. Yi gan ni, wùt atɨ̂n hi bəma chyâ te wù ndùku mô ashyə̂.”

²⁷A ndùku mô te Jisòs jìsa mihe gha ghɨ̂n, wùt ywên wùlè atɨ̂n à nòn afû bwat jis na, “Jùŋ mò ha we wù tì bwə wò nyoŋhi kwok nì wò!”

²⁸Jisòs fîsì na, “Jùŋ bɨlà mô ha ghɨt ghe ghɨ ywo gha Fùyènì, nê te yi jîsà!”

²⁹Nôn à ghɨ̂tà hì dûtè bênà a Jisòs a ngwùŋ, wù jis na, “Ghɨt a mbyî chîn yinâ mò kə nâ ngwàk yì be. Ghɨ khɨŋa hi yena chwena ha mu. Ghɨna nè yena wi chwena ale, a bu kə yì Jonà.

³⁰Wâ Wùt boŋa mô chwena ha ngwàk kəbi yi ghəl te Jonà ndùku mô chwena ha ghɨt a Ninifì.

³¹À bè hì mô a Yènfù tuk wu saku, ma nè fə̀n, a mô wùt we wù saka lak yi bûlà mbyi, bàh à nchwô, timi hi ngane ngwàk yina beka, wù tî lô a wun yi lak a lum wu dâ hi yute yikî tofini fə̀n Sòlomùn. Biyani ngwàk yinâ kəta wùt lè wù chyâ Sòlomùn ywo wi yikî wuni.

³²À bè hì mô a Yènfù tuk wu saku, ghɨt a Ninifì bê timi ma ghɨ hi ngane ngwàk yinâ beka ghɨna tì yu yikî Jonà kahi a təm a ghɨna sùbe. Ngwàk yinâ kəta wùt lè wù chyâ Jonà, kahe wi təm a ghɨna a sùbe.”

³³Jisòs fî kaha jis ha ghɨna na, “Wùt tà timi dan lâm hi baŋ a kà. Wù dan, wù tum a lùk wu ngaŋtenu, shyəma à hi lye nâbi nde a ndâ wu yen ban yi tɨni.

³⁴Se ya mò te lâm a wò wùn. Se ya shìki mô a jûŋ, ma wun wa wù jɨ̀m hi mô nì bani. Biyani se gha ki fêf, ma wun wa nê hi mô finâ.

³⁵Ghàn hi tôknè kə ban ye ghàn kəta nê kahi a yi fîn.

³⁶Wun wa wù jɨ̀m hì kəta yi bân, ma fini hi fê bu atɨ̂n, ma wu nê hi bana kəbi te lâm a wu yu afa ghɨ dana mihe, yi hì bana ha wò.”

³⁷À ndùku mô te Jisòs jìsa mihe, wùt à Falàsî wùlè jis ha wun na, wù ben ma ghê wûn yê yə a wun a bɨn.

³⁸Wùt à Falàsî we hì mô nì kani hi yen na Jisòs ti yə teka wù su wo.

³⁹Bâba ki jîs ha wun na, “Ghàn ghɨt a Falàsî, ghàn lyè kaŋ wanu nì bom sanisu, ghàn tôk su kə jumsu tɨnsu, biyani tɨna atɨna mô ma ghɨ lun kə nì gha be.

⁴⁰Ghàn mò kə nâ wù ngwò ghɨ̂tù! Ghàn kwàktè na Yènfù tì fati kə jumsu tê fate jə̀ fùtɨ̂n ma?

⁴¹Ghàn hi fô fihe mwə̀ me ghàn kəta ha ghɨt a fufana nì təm a jûŋà, ma nâbi ghə hi mô nì yulînì ha ghàn.”

⁴²“Ngə̂k yì chìk mò ha ghàn ghɨt a Falàsî, beka ghàn lyè nâbi mwə̀ mù tetamù me mù fwo a ghàn a fùk, ghàn jyâtì luktu ìwûm ghàn lyi bâh à mòk ghɨ fo ha Yènfù, nê wi gha ghe ghɨ mô chilichili ha ghɨt ale, kəta wi kôŋì ha Yènfù, ghàn hi nê gha ghɨ̂n de wijə yile.”

⁴³“Ngə̂k yì chìk mô ha ghàn, ghɨt a Falàsî, beka ghàn kòŋà hi yèn a ndâ su chintesu kwoka ndokò kə ashyə̂, fê fwo yênà wu fwəh, ghàn hi kôŋà na ghɨta hi nyiŋa bê toŋte ha ghàn.

⁴⁴Ngə̂k yì chìk mô ha ghàn, a ghàn mò te tusî te ghɨ gumà ghɨta atɨ̂n, teka lem chwena, ghɨta gbê chyâ a tû khə wi.”

⁴⁵Chichà wùlè jis ha Jisòs na, “Chichà, wò jìsà gha ghɨ̂n sûlè nâbi ghàh.”

⁴⁶Jisòs jis ha ghɨna na, “Ngə̂k yì chìk mò kəbi ha ghàn, chichàsu saksu, beka ghàn tòktè na ghɨta hi nê gha ghe, ghɨ ta ghaka ghɨna, ghɨna bêkà ghɨ jîtà kə ni, kôŋà wi hi gàmtì nâbi fùjiti.

⁴⁷Ngə̂k yì chìk mô ha ghàn ghe ghàn bwɨma Sîtù fòktìsù chiksu se bì ghana tì ywite.

⁴⁸Yi chwûtè kə nâ na ghàn tòkàlò gha ghe bì ghana ndùku nê, beka ghɨna tì ywite fòktì mu se, ghàn ghɨ hì ba Sîtù ghɨna tu.”

⁴⁹Kum ni, ye ghɨ toŋte na, ‘Tof wu Fùyènù’ jis na, ‘Wù nè tumalò fòktìsù chiksu nì ghɨt a tuma ha ghɨna, ma ghɨna nê ywiti ghɨna, ma fo ngə̂k ha ghɨna.’

⁵⁰Kum yìna, mbyê chin yina bè fòktè jwo ghɨna kum mu luŋ mù fòktìsù chiksu sù jɨ̀m se ghɨ ywite, hi yìmì kə te ghɨ tì fate mbyî,

⁵¹hi yìmì a Abèl hi kwok à tàn a Sàkàliyà we ghɨ tì ywi a faklu su baŋ nì luk we wu lye a ndâ Fùyèn. Mu jìsà ha ghàn na ngwàk yinâ bè fòktèlò jwo ghɨna ha Yènfù.

⁵²“Ngə̂k yì chìk mò ha ghàn chichàsu saksu beka ghàn ti letì chwok ghe ghɨ chwoka jwo yi tofi, nâ ghàn bè lye wi atɨ̂n, fê tâmtè ghɨt ghe ghɨ khɨŋa hi lye a ndâ yi tof afân.”

⁵³À hì mô te Jisòs lô a ndâ afû, chichàsu saksu ghê ghɨt a Falàsî yîmì hi tè fumhe wûn, bufte agha dona,

⁵⁴jîsà, tama hi kwo jyə̂ wûn, hi khɨte wûn.