Read Bum Lûk 14 Bible Online

Lûk 14 - Bum bible

Lûk 14

¹À ndùku mô wu tuk wu laku wule, Jisòs lo yen a wùt lè ndâ à mô kəbi to ghɨt a Falàsî hi yə̂, ghɨt ghe ghɨ ndùku mô afû lem yi se a wun wu wùn nâ haŋaŋ.

²Wùt lè mô wun ashyə̂ yafa nì kùhà.

³Jisòs ki buf ha chichàsu saksu nì ghɨt a Falàsî na, “Saki bimelò na ghɨ chwuk wùt wu tuk wu laku ma, yi tunhelò?”

⁴Biyani ghɨna china kə moŋ. Jisòs kum wùt àtɨ̂n, chwuk wûn, jyan na, lô ma wò hi kolê,

⁵ki kaha buf ha ghɨta na, “À mò nde a ghàn a fùtɨ̂n à wâ wûn makə nyàm à wûn ki fen a yi be yi mòli wu tuk wu laku ma wù faŋ hi fihi kə wu yu agha?”

⁶Ghɨna hì kəta wi gha hi jìs.

⁷Jisòs ki yen ghɨt ghe ghɨ laka na ghɨ ben a wu lùk wu yənu afû, ghɨna bên hì khɨŋa kə hi ndòkò wu lùk wu ngaŋtenu. Wù tobhi ghɨna na,

⁸“Wùt ki lâkà wò na wò ben a wu lùk ma ghɨ yə malâ, wò bên, kə wò ndòko a wu lùk wu ngaŋtenu beka à làhi tè mò ma wù ti lâkà wùt lè wu kokne chyâ wò.

⁹Ma wù lyi ma wù jis ha ghàn à jɨ̀m na, ‘Lòti fo luku ha wùt wunâ.’ Ni, ma wò nê wumi hi lòtì hi ndòko wu lùk wu tetanu.

¹⁰Wùt ki lâkà wò, wò yên, wò bɨlì ndokò wu lùk wu tetanu shyəma wù nê lyê jis ha wò na, ‘So mù, kokti bi ndòko wu lùk wu ngaŋtenu afân.’ Ni, ma wò nê hi ngaŋtê ha ghɨt ghe ghɨ mô a wu lùk wu yənu afû.

¹¹Nâbi nde we wù kokhe ngɨŋ à wûn a nyə̂, ma Yènfù nê chwohi wûn a chyə̂, ma nâbi nde we wù lye ngɨŋ à wûn a chyə̂, ma Yènfù nê kokhi wûn a nyə̂.”

¹²Jisòs kaha jîs ha wùt we tì wù làka wûn na, “Wò hì lâkà à ghɨ̂t na ben a wo lùk wu gha nâbi wùni yu, kə wò làka kə sun sasu nì wana na, nì ghɨt gha ghɨ sah yi nda nì ghɨt a chik ghe ghàn à ghɨna chyə bakhe, beka ghɨna nè boŋa lâkàlò wò a ghɨna gha, ma kahà lak wò.

¹³Wò lyi gha ya, wò bɨlì lâkà wù fèf nì ghɨt a fufana, nì ghɨt a ngəhana, nì ghɨt a kəblena.”

¹⁴“Wò ki nî ni ma bônhìnì ben ha wò beka ghɨna bè kahà lâkà wijə wò. Ma Yènfù bê lak wò wu tuk afa ghɨt ghe a chyə chilichili a wun ashyə̂ bè kahà lôtè a yi kpû.”

¹⁵À hì mô te wùt le atɨ̂n à nòn afû ywo gha ghɨ̂n ni, wù jis ha Jisòs na, “Saŋlînì bè hì mô ha ghɨt ghe ghɨ bè yə wu lùk wu fə̀n wù Fùyènù!”

¹⁶Jisòs jis ha wun na, “Wùt lè ndùku kəta bin yi chiki lâkà ghɨta, ghɨ dô kə ni.

¹⁷Yu kpên, wù tum wùt à wûn wù fèt na wù gbê fokti ha ghɨt ghe wù tì làka na ghɨna ben beka ghɨ ti fati mihì gha à jɨ̀m.

¹⁸Biyani ghɨna yîmì kə wù mòk wù mòk hi lona wu lûm. Wùt ashyə̂ jis na, ‘Mu ti yun fukà kəta hi yè kinâ. Ndù ma chyati ba wâ na kə wù bàŋhi lâ.’

¹⁹Wùt lè jis na, ‘Mu ti yun mbòŋsù ìwûm na su fêt fûk a ma, mu yè hi mòmhè sù sîn. Ndù chyati ba wâ na kə wù bàŋhi lâ ha mu.’

²⁰Wù yen ha wùt lè, wù jis na, ‘Mu bè wi beka ghàh à ywê mù ti kwuk malâ kə ni.’

²¹Wùt fètana wùna kaha yen fôktì gha ghɨ̂n ha bì wûn wù fèt. Lâ baŋ wûn, wù jis ha wan àtɨ̂n na, ‘nyàŋhi fwu ndù a lumtu tatu nì tu tetatu yi tèk ma kumtè ben nì fèfù we wu mô afû nì ghɨt a fufana nì ghɨt a ngəhana nì ghɨt a kəblena.’

²²Wùt fètana àtɨ̂n yen kaha ben jis ha wun na, ‘Bèbɨn, mu ti ni nâbi ghə ghe wò jìsa, biyani ndâ tà lun jə̂.’

²³Ni, bè wûn wù fèt fî jis ha wun na, ‘Fwu ma wò yen a lumtu fùktù nì lumtu tetatu a nki ghɨt ghɨ̂n mò hi tè mò atɨ̂n ma wò laka ghɨna ma ghɨ ben ma ndâ mì tahi lûn.

²⁴Mu jìsà ha wò na, nâ wùt nè mômà wi shyə yəna atɨ̂n à ghɨ̂t afa mu ye laka ghɨna ti têt yâ.’”

²⁵À ndùku mô te wù lo hì gbê yênà, nôn à ghɨ̂tà lô hì jûmtè yênà wûn. Wù kahi bɨnhì wu wun jis ha ghɨna na,

²⁶“Wùt kpene wi hi tè mò jùmtìbàm à mì a bu kə na wù kòŋàlò mu chyâ te wù kòŋà bè wûn nì nè wûn nì ywê wûn nì wana wuna nì wana ne wuna, nâbi nì ngɨŋ à wûn.”

²⁷À faŋ nâbi nde hi bèkà kâkfùtàfù wun fu hi jùmtè mu, wù wi hi tè mò jùmtìbàm à mì.

²⁸Kî, à mò nâbi nde a ghàn a fùtɨ̂n a we wù khɨŋa hi ba ndâ yì chìk ki faŋ hi ndòko hi khɨli na yi nè lyê afa ka hidù hi mìhè ndâ yîn atɨ̂n agha?

²⁹Wù ki faŋ hi nì ni biyani lem a chyə ndâ, faŋ hi ba mìhè ndâ àtɨ̂n ma à nê hi chyâ nâbi nde wu lûm yena chəka yê nì wûn,

³⁰jîsà na, ‘Wùt wunâ ti yîmì ba hì bu hi mìhì.’

³¹Bu ni, à mò wùni fə̀n wù bakte hi shika yi woŋ ghê fə̀n wù wùlè kəta kə ghɨta yi wòŋa kam ìwûm, ma wù faŋ hi ndòkò hi yên nâ ghɨt ghɨ̂n ta kpenelò hi nò ghɨt a fə̀n wùlè we kam mbà agha?

³²Wù ki yen na wù wi hi mòm, ma wù tum ghɨt a tuma ma ghɨ yê yen fə̀n wùlè we, wu baha yê bè hadà, hi fate gha tɨni.

³³Yi mô kəbi yi ghəl te nâbi nde a ghàn a fùtɨ̂n we wù tê faŋ hi dè nâbi ghə te wù kəta ma wù hi bu hi tè mò jùmtè à mì.

³⁴“Ghàn hi khə na mbaŋfu jwòfàlò, biyani ma fu shìki fê tofa wi, ma ghɨ nê ni nâ ghə na fu fê tof agha?

³⁵Fu nè hì jwôfà wi na ni gha yile atɨ̂n, bu kə na ghɨ suh à màka. À tofa nâbi nde wù hi tòkà yutê.”