Read Bum Lûk 18 Bible Online

Lûk 18 - Bum bible

Lûk 18

¹Jisòs tî fî ma kəbi ngàn yìlè ha jùmtìbàmsù wunsu yike ghɨna na ghɨna kəta hi tè jə̀m yu mù jɨ̀m bota wi.

²Wù jis na, “Tô sù sak ale ndùku mô yi tèk yile fânà wi Yènfù, lyê wi na wùt mò a shyə ale.

³Ywê nkwû wùlè hì mô kəbi yi tèk afû, yênà a wun a ndâ tuk mù jɨ̀m, jîsà na, ‘Sak fyi to ma ha bànà mì.’

⁴Wù bê jîsà to sak ghɨ̂n bukhe kə yi bukhî. Te wù faŋa hì yênà kə yi yên, à be kaha kwâktì kə wûn hi kâtà sak atɨ̂n, nâbi te yi fànà wijə Yènfù, lyê wijə na wùt mò a shyə ale,

⁵bu ni, ma bên yì wuni a mu ndâ yu mù jɨ̀m nê hi fo ngə̂k ma mu nê hi kəta wijə yutìnì.”

⁶Bâba jis ni, ki jîs ha jùmtìbàmsu wunsu na, “Ghàn yu lê na to sù sak ghɨ̂n tì jis ni yàni bu chilichili agha.

⁷À bɨlà mò lô hi faŋa Yènfù hi ywo jî ghɨt a wuna ghe wù mò ma wù ti chwokti ghɨ jyê ha wûn, ntuksu nì nchwì agha? Fu làhi tê wunhe kə yi wunhî ghɨna agha?

⁸Mu jìsà ha ghàn na, Yènfù wunhe wi hi sak a fo sak yâ. Nâbi yâ Wâ Wùt bè shihi kaha bèn a mbye afân ma wù yen ghɨta ghɨ baha samhe ha Yènfù agha?”

⁹Wù tì fî ma ngàn yìlè ha ghɨna ghe ghɨna ndùku ke ngɨŋsu ghɨna su na ghɨna mò chilichili, kehe ghɨt ale, jis na,

¹⁰“Ghɨt ale à bà tî kwok lyi yen a ndâ Fùyèn hi jə̀m, wù mòk mô wùt à Falàsî, wùlè kâtà ŋwàklànà.

¹¹Wùt à Falàsî we yen timi hanɨ̂ŋ hì jə̂mà, jyana, ‘Mu fo àyòŋnà ha Yènfù beka mu wijə ni te ghɨt ale ghe ghɨna nyâŋhè fye mwə̀ mù ghɨt halô, bu te ghê ghɨna khɨma saki, jûmtè wijə ywen a ghɨ̂tà. Mu wijə ni te wùt wunâ wù kàtà ŋwàklànà ni.

¹²Mu bama yi jwô a ghan à bà a ngâm, jyâtè mwə̀ mâmù wu bàh ìwûm, mu fo à mòk ha wò.’

¹³Wùt we wù ndùku kâtà ŋwàklànà yîmì hi jə̀m, timi kə hadà te kòŋ hi ke kwok a nyə̂ biyani lem wo wuna a ngàŋtù kwohe yi sên jîsà na, ‘Yènfù, kwohi seni ha mu, mu mò wùt wù be!’

¹⁴Mu jìsà ha ghàn na wùt mu we tì shihi kolo lye a wun a ndâ mô chilichili biyani wùt à Falàsî we kolo bu chilichili. Nâbi nde we wù kokhe ngɨŋ à wûn a nyə̂ ma Yènfù nê chwohi wûn a chyə̂, nâbi nde wù lye ngɨŋ à wûn a chyə̂ ma Yènfù nê kokhi wûn a nyə̂.”

¹⁵Ghɨta ndùku lye bê nì mwəlà ha Jisòs na wù kum ghɨna ma wù bonhi ghɨna. Jùmtìbàmsù wunsu yen yâ hì njaŋa ha ghɨt atɨna.

¹⁶Biyani wù toŋa mwəlà mù tɨ̂n jis na ghɨna ben, ki jîs ha jùmtìbàmsù wunsu na, “Ghàn de mwəlà ma ghɨna ben ha mu. Kə ghàn fi tamti ghɨna beka fə̂n wù Fùyènù kəta ghɨt ghe ghɨ mô te ghɨna.

¹⁷Mu jìsà ha ghàn hamok na, à faŋ nâbi nde hi bimî fə̂n wù Fùyènù te wan wù bot ma wù bê tê lye jə̀ wu lùk wu fə̀nù tɨnu.”

¹⁸Wùt wù tâ ghɨt a Jûs wùlè ki buf ha wun na, “Chichà wù jùŋ, mu mò hi nè nâ ghə hi khɨte bôn ye yi bè mê wi agha?”

¹⁹Jisòs buf ha wun na, “Njwô ghə te wò toŋte mu na wùt wù jûŋ agha? Nâ wùt wù jùŋ wi a bu kə Fùyèn.

²⁰Wò khəlò sak te tu jîsà na, ‘Kə wùt chyə nì ywê wùt makə nì lɨm à wùt, kə wò ywi, kə wùt chwoŋ, kə wùt timi bɨ̀n à sak yì fə̂m, ngumli bâ nì nâ.’”

²¹Wùt tâ we ki jîs na, “Mu ti lem sak tɨ̂n hi yìmì ha wan wù bot.”

²²Jisòs yu ni ki jîs ha wun na, “Wò baha kətalò gha yì mòk hi nì, ndù bəkli mwə̀ mâ nâ mù jɨ̀m ma wò fo ka tɨnu ha ghɨt a fufana ma wò tahi khɨte ghaki a nyə̂. Wò ni yâ, wò ben jûmtì mu.”

²³Wùt wù ta we yu gha ghɨ̂n ni, wun wu wunu bôt beka wù ndùku mô nâ wùt wù chìk.

²⁴Jisòs ki wun ni ki jîs na, “Yi ta nâ haŋaŋ ha ghɨt a chika shyəma ghɨna bê lye lùk wu fə̀n wù Fùyènù!

²⁵Yi bonelò ha nyàm à kwaŋ hi lye tohna a bùk à saka chyâ shyəma wùt wù chìk lye yi lak yi fə̀n wù Fùyènù.”

²⁶Ghɨt ghe yu jis yîn ki buf ha wun nâ, “Yi hì mô ni, ma à bê bon nâ nde?”

²⁷Wù jis ha ghɨna na, “Gha ye yi ghaka wùt yi bone kə ni ha Yènfù.”

²⁸Bità buf ha wun na, ba wò ti yen te ghàh de mwə̀ mâhù hì jûmtè kə wò agha.

²⁹Jisòs kahi fîsì ha ghɨna na, “Mu jìsà ha ghàn hamok na, wùt chin ma wù ti de bɨn a wuna, de ywê wûn nì wana ne wuna, kəbi bè wùn nì nè wûn, kəbi mwəlà mù wûn kum gha fə̂n wù Fùyènù,

³⁰ma Yènfù nê kpenhi mwə̀ mù tɨ̂n ha wûn nâ hidù a chyə afân, ma wù bê hi kəta bôn ye yi bè mê wi a mbye afa yì bè bênà.”

³¹Jisòs lyi lô nì ghɨt a tuma wuna njwòsù bà jis ha ghɨna na, “Ghàn hi khə na ghàhnà kwok a yênà a Jèlusalèm chin ni, nâbi ghə fòktìsù chiksu tì nyàka kum Wâ Wùt mô hi kpên.

³²Ghɨ nè lyê folò wûn ha tumu, ma ghɨna nyikhi wûn, ma ni gha wumena ha wûn, ma fê chwuli chwâmù à wun wu wùn.

³³Ghɨ nê sam wûn nì wànsù ma khɨtè ywi wûn, ma à nê hi mô yi bàm mu tuk mù tât, ma wù kahà lòti a yi kpû.”

³⁴Te wù jìsa ni, ghɨna tê khɨlî na wù jis nâ ghə agha, beka tof ye yi ndùku mô atɨ̂n à gha tɨna ndùku mô ma ghɨ ti lêt ha ghɨna.

³⁵Te Jisòs ndùku bakhe yê a Jèlikù, wùt wu fèfana wùlè mô yi bi lumi lonâ.

³⁶Wù yu te nôn à ghɨ̂tà chyàlà buf nâ, à gànà ghə agha?

³⁷Ghɨ jis ha wun na a chyàlà Jisòs wâ wùt a Nasalì.

³⁸Wù bwat jis na, “Jisòs Wâ Fə̀n Defìt, kwohi seni ha mu!”

³⁹Ghɨt ghe ghɨ ndùku yênà ashyə̂ kântì wûn jîsà na wù china moŋ. Wù fî bɨlì bwat yen kə ashyə̂ jîsà kə na, “Wâ Fə̀n Defìt, kwohi seni ha mu!”

⁴⁰Jisòs timi jis na ghɨ lyê ben nì wûn ha yi. Ghɨ lyi bakhi bên nì wûn a wun ashyə̂, Jisòs buf ha wun nâ,

⁴¹“Wò khɨŋa na mu ni ghə ha wò?” Wù jis na, “Bâba, nê ma mu kahà yen luktu!”

⁴²Wù ki jîs ha wun na, “Bimi ya ti nî wò ti tâ. Kaha yen luktu.”

⁴³Kə wu yu tɨnu, wù kahi yen tu luk lô hì jûmtè yê nì Jisòs, kokhe yênà nì Yènfù. Nâbi nde ndùku ywo gha ye yi gana, hì boŋa kokhe yê Yènfù.