Read Bum Jon 11 Bible Online

Jon 11 - Bum bible

Jon 11

¹Wùt lè ndùku yafalò yet yi wuni mô Lasalòs, wu chyə yi tèk yi Betanì, a mô kəbi tèk ye Mèli ghê wâ nè wûn ndùku chyə atɨ̂n.

²Lasalòs wuna a wù ndùku yafa ni, à ndùku mô wâ nè Mèli, Mèli wuna ndùku mô kəbi Mèli we wù tì sùha yûhì ye a Jisòs wu wù yah nì nyuŋsu wunsu tusu yâ.

³Jâmtì sîn ki tuma tum ha Jisòs jîsà na, “Bâba wùt we wò kòŋà yâ, yafalò.”

⁴Jisòs yu tum àtɨ̂n jis na, “Wù yafa kəbi ni, bu hi kpû. Yaf yi tɨni ben shyəma Yènfù chwuti jyak a wuna. Wâ Fùyèn nè chwûtèlò jyak ghe ghɨ fo ha wun tohne a yi yaf afân.”

⁵Jisòs ndùku kôŋàlò Matà ghê wâ nè wûn Mèli nì Lasalòs,

⁶biyani yu na Lasalòs yafalò faŋ kə wu lùk afa wù ndùku mô, tuk mù bà chyâ,

⁷wù ki jîs ha jùmtìbàmsu wunsu na, “Ghàhnà kahà yen a Jùdiyà.”

⁸Jùmtìbàmsu wunsu toŋti wun jis na, “Chichà, à ndùku mô kə yi bàm yi mu tuklâ ni ghɨt a Jûs hì khɨŋa hi tumle wò nì te, wò wu hì fê khɨŋa hi yè nè ghə afû agha?”

⁹Jisòs buf ha ghɨna na, “Ba tuku kəta mbɨŋlu njwòsù bà agha? Wùt wi hi damta gbì nchwì beka wu gbè yena ban yi mbyi.

¹⁰Wù mò kə hi damta a wu yu afa wù gbè ntuksu beka wù kəta wijə bani, yena wi.”

¹¹Jisòs jis ni ki jîs na, “Sô ghàhnà Lasalòs ti bwunî biyani mu kəta hi yè yèmhè wûn.”

¹²Jùmtìbàmsu wunsu toŋti wûn jis na, “Bâ, à shìki mô ma wù ti bwunî ma à hi mô na wù nè yemàlò.”

¹³Jisòs ndùku jîsà ni, jîsà na Lasalòs ti kpû, jùmtìbàmsu wunsu yu ni hì khə na wù jìsà kə kàntè sù bwuni.

¹⁴Jisòs fôktì mihì ha ghɨna na, “Lasalòs ti kpû,

¹⁵kum ghàn. Mu saŋlê beka mu yê hì wijə afû. Ghàn ti yimèlò hi bimi chîn. Ghàhnà yê yen wûn.”

¹⁶Kə wu yu Tomòs we ghɨ ndùku toŋte kəbi na Didimùs jis ha jùmtìbàmsu Jisòs sulesu na, “Ghàhnà boŋà yen kə a chichà yi bàm, wù hì mô hi kpû ma ghàhnà boŋà kputè yen.”

¹⁷Jisòs yen tan a Betanì yen ma Lasalòs ti chyə a yi sì a mu tuk mù kìk.

¹⁸À ndùku mô hi lò a Betanì hi yèn a Jèlusalèm yaka wi mâl sù bà,

¹⁹ghɨt a Jûs mô afû dô kə ni te ghɨna bèna hi kukte Matà ghê Mèli a wâ nè ghɨna yi kpû.

²⁰Matà yu na Jisòs wu hì bênà, fwu yen hi yè fye wûn, Mèli faŋ kə a ndâ.

²¹À hì mô te Matà ye yena Jisòs jis na, “Bâ, wò chehì mô afân ma wâ nôm tà che kpu jə̂.

²²Nâbi yani, mu khəlò na wò buf nâbi ghə ha Yènfù chin ma fu nê kə ha wò.”

²³Jisòs jis ha wun na, “Wâ nâ nè kaha lôtèlò ma wù hi chyə̂.”

²⁴Matà jis ha wun na, “Mu khəlò na ghɨ bè shihi kaha lòtì a yi kpû wù tuk wu gokhenu ma wù boŋà loti.”

²⁵Jisòs jis ha wun na, “À mò mu we mu lòhè ghɨta a yi kpû fo a jyak na ghɨna hi chyə̂. À bimi nâbi nde ha mu kpu kəbi yi kpû ma wù bê kaha loti ma wù hi chyə̂.

²⁶À hì chyə nâbi nde bimi ha mu ma wù bê tè kpû nâ hakoh.” Jisòs jis ni buf ha Matà na, “Wò ti bimi yina agha?”

²⁷Matà bimî jis na, “Mu ti bimî a Bâ, na wò mò we ghɨ chwoka lema, Wâ Fùyèn we wù ndùku mô hi bèn a mbyî.”

²⁸Matà jis ni kaha yen nyamti jis ha wâ nè wûn Mèli na, “Chichà ti ben hì bufa wò.”

²⁹Mèli yu ni nyâŋhì fwu hi yè yen a Jisòs.

³⁰À ndùku mô ni Jisòs baha yè mò kə wu lùk afa Matà tì kwòna ghê wûn wu lum yâ teka wù lyi atɨ̂n à yì tèk.

³¹Mèli shihi fwo yèn, ghɨt ghe ghɨ tì bèna hi kukte wûn a ndâ fwu hì yênà kə wun a yi bàm kwâktè na wù yè a yi sì hi tè jyè wâ nè wûn afû.

³²Wù yen tan wu lùk afa Jisòs ndùku mô, te wù yena ye nì Jisòs ni, fen a wun ashyə̂ jis na, “Bâ, wò chehì mô afân ma wâ nôm tà che kpu jə̂.”

³³Jisòs yen te wù jyè ghê ghɨt ghê ghɨna yê hì mô, gha tɨni hì fo ngə̂k ha wûn yafa wûn nâ haŋaŋ.

³⁴Wù buf ha ghɨna na, “Ghàn che guma afa wûn.” Ghɨna jis na, “Bî ma wò yê yen a Bâ.”

³⁵Jisòs jî.

³⁶Ghɨta yen te wù jyè jis na, “Wù chehì kôŋà wûn nâ haŋaŋ!”

³⁷Biyani ghɨt ale hì jîsà na, “À wi wun we wù jìmè se ghɨt a fefana, wù che faŋ hi nì na kə Lasalòs kpu njwô ghə?”

³⁸Jisòs lo yen tan a Lasalòs yi sì gha tɨni baha yê fo ngə̂k ha wûn. Sî tɨni ndùku mô wu tə̂n ma ghɨ chuf a yi wo.

³⁹Jisòs jis na, “Ghàn chyàkhi ti tɨni.” Biyani Matà a mô wâ nè wùt wù kpona, Lasalòs jis na, “Tuk mù ti chyâ chîn mù kìk a Bâ, te ghɨ guma wûn, ma yuk yi be làhi fwu atɨ̂n bəmâ.”

⁴⁰Jisòs jis ha wun na, “Ba mu ye jis ha wò na wò bimi ma wò yen jyak a Fùyènà agha?”

⁴¹Wù jis ni, ghɨ jîhì ti tɨni. Wù ki kokhi a nyə̂ jis na, “Mu fo àyòŋnà gha a Bâ, beka wò yè yusa yute ki yi yutî ha mu,

⁴²mu khə kə nâ na mu yè jîsà wo ywô. Biyani mu jìsà chîn kum jùŋ à ghɨt ghe ghɨ mô afân shyəma ghɨna ywô bimi na à tum wò mu!”

⁴³Wù jis ni, toŋa jis a jyə̂ yi tâ na, “Lasalòs, fwu bî!”

⁴⁴Wù fwu bên, ma ghɨ ti kwut wo nì wulu wunu nì bâh wù sùnju fî kwut kə̂k yi wuni nì njusu lesu. Jisòs jis na, “Ghàn yenti gûm wûn a wun wu wùn ma wù lo.”

⁴⁵Ghɨt a Jûs a dona ghe ghɨ tì bèna hi yena Mèli tì yen gha ye Jisòs tì ne bimi ha wûn.

⁴⁶Biyani ghɨta kahi yen fôktì gha ye Jisòs ne ha ghɨt a Falàsî.

⁴⁷Ghɨna khɨti yi yûŋtì ghê ngàŋsu ndâ Fùyènsu chiksu nì ghɨt a sakana buf na, “Ghàhnà gbè yàni, yen gha kanana ghe wùt wuna mòmà.

⁴⁸Ghàhnà ki dê wûn ma ghɨt à jɨ̀m nê ghaŋ gha ma bimi ha wûn. Yi bàm àtɨ̂n ma ghɨt a Lûmà nê bè bobhi ndâ Fùyèn yì ghàhnà yi chìk ma fê bobhi nâ ghɨt a ghàhnà ghɨ laka.”

⁴⁹Wùt lè a ghɨna fùtɨ̂n ghɨ toŋte na Kàyafàs, a mô ngàŋ à ndâ Fùyèn yì ngaŋtena a lɨ̀m afû jis na, “Ghàn khə wi gha nâ hakoh!

⁵⁰Ba yi mô na ghàn yena wi na yi bɨlà jwôfà na wùt wù mòk kpu a ghɨt à jɨ̀m a tû chyâ shyəma ghɨ bobhi lak yì jɨ̀m agha?”

⁵¹Wù ndùku jîsà ni bu a wun wu tof biyani fôktè tum à Fùyèn te ngàŋ à ndâ Fùyèn yì ngaŋtena a lɨ̂m afû na Jisòs kpu a ghɨt a Jûs a tû.

⁵²Wù tà tì kpu jə kə ha ghɨna. Wù tì kpu kəbi a wana Fùyènà a tû ghe ghɨ jyahe mbyî, shyəma ghɨna kahà yûŋtè ben ma ghɨ hi mô ha shyə̀ à mòk.

⁵³Hi yìmì wu tuk afû ghɨna hì bakte hi ywe Jisòs.

⁵⁴Jisòs yen ni, hì fê lye wijə wu lùk afa ghɨt a Jûs mò hi yen a wûn. Wù bɨlì tet yen yi tèk yile ghɨ toŋte na Efèlèm, a bàh a lak ale ghɨ bakhe yênà yi lak yi sùsi hì chyə afû ghê jùmtìbàmsù wunsu.

⁵⁵Tuk mù Dàŋa chyalamù ghɨt a Jûs hì bakhe bênà, ghɨta kolo kwoka a Jèlusalèm dô kə ni, hi yè sò ngɨŋsu ghɨnasu a ghɨna chyənà yì lak shyəma tuk wu Daŋa chyalanu ben.

⁵⁶Ghɨna yen ya faŋ hì bufa kə Jisòs, yen timi a bɨn a ndâ Fùyènà bufa kə ghɨna sù ngɨŋ na, “Wò yena yàni? A wù nè bènàlò wu lùk wu yi yə afân agha?”

⁵⁷À ndùku mô ni ma ngàŋsu ndâ Fùyènsu chiksu nì ghɨt a Falàsî ma ghɨ ti chyâhì saki na, à khə nâbi nde luk we Jisòs mò atɨ̂n wu fôktì ma kwo wûn.