Read Bum Jon 12 Bible Online

Jon 12 - Bum bible

Jon 12

¹À tì faŋ kə mu tuk tufa shyəma tuk mù Dàŋa chyalamù yimi, Jisòs yen a Betanì a mô tèk yi Lasalòs we wù tì lohe a yi kpû yâ.

²Ghɨ kolo ghan mwə̀ mù yə̂mù ha Jisòs, Matà chyâhì ha wûn. Ghɨ shihi yə̂ Lasalòs boŋ yə̂.

³Mèli lyi fùshàŋ fu yûhì yì lɨ̀mtena ma ghɨ fati nì nât, a mô kə nâ yûhì yì jùŋ, yi lɨ̂mtè jwôfà kə ni, ta wu kâ nâ jùŋ, yuhi a Jisòs wu wù, yah nì nyuŋsu wunsu tusu. Te wù yuhe ni, yì lɨ̂m kə ndâ yì jɨ̀m.

⁴Jùmtìbàm yì Jisòs yìlè a ghɨ ndùku toŋte na Judàs Ìskaliyòt, a mô kəbi wun we wù ndùku mô hi bəkle Jisòs njaŋ jis na,

⁵“Ghɨ yê làhi bəkle yûhì yinâ wu ka wu dô kə ni hi fo ka tɨnu ha ghɨt a fufana.”

⁶Wù tà tì jis ni beka wù ndùku tôknè ha ghɨt a fufana. À ndùku mô ni, beka wù ndùku chwoŋa, lêmà bàlì wù kâ faŋa wi hi lyè wule hi nè gha wuni yi kòŋì atɨ̂n.

⁷Wù jis ni, Jisòs jis na, “Ghàn de wùt ywên wunâ,” fî jis na, “Wù ndùku lêmà yûhì yina hi yuhe mu a wu tuk afa ghɨ guma mu atɨ̂n.

⁸Ghɨt a fufana mò kə ghàn a fùtɨ̂n kə yu mù jɨ̀m. Biyani mu bu hi faŋ ghàhnà.”

⁹Ghɨt a Jûs tì yu dô kə ni na Jisòs mò a Betanì, lo yen afû hi yen a wûn nì hi fê yen a Lasalòs we wù tì lòhe a yi kpû yâ.

¹⁰Ngàŋsu ndâ Fùyènsu chiksu yen ni, hì bakte hi boŋa ywe Lasalòs,

¹¹beka ghɨt a dona ndùku jûmtè yênà kə Jisòs yì bàm, bime ha wun kum nì gha ye wù ne ha Lasalòs.

¹²Tuku bis yû, ghɨt ghe ghɨ tì be hi yə yi Dâŋà chyà, yu na Jisòs bênàlò a Jèlusalèm,

¹³gbət wu bâ somu fwu yen hi kwote wun a wu lûm, bwata jîsà yênà na, “Hòsanà! Yutìnì mò ha we wù bènà a Bâba yi yet. Yènfù bonhi fə̀n à ghɨt a Isalì!”

¹⁴Jisòs khɨŋ wâ jàkâs kwok a tû hì bênà, a mô kə yi gha ye ghɨ tì nyàka na,

¹⁵Ghɨt a tèk yi Sayòn, “Kə ghàn fan, fə̀n wânù wu bènà, gbê a tô wâ jàkâs.”

¹⁶À ndùku mô te gha ghɨ̂n gàna ni, jùmtìbàmsù Jisòs su yena khɨle wi. Ni te Jisòs tì lòte a yi kpû kahi yen a wun wu lùk wu kokhenu, ghɨna ki yɨ̂ŋtì na à mò a gha ma ghɨ tì nyak kum wûn nâ à jɨ̀m, ghɨta fê nê ha wûn.

¹⁷À ndùku mô ni, ma ghɨt ghe ghɨ ndùku mô ghê wûn ma ghɨ ti fâŋ hì fôktè yênà kə ha ghɨta na, wù ti yen toŋa Lasalòs yi sì, wù ti lôtì a yi kpû.

¹⁸Ghɨt a dona fwu hi yen a wûn beka ghɨna tì ywo na à mò yi gha kanani ye wù ne.

¹⁹Ghɨt a Falàsî hì jîsà ha ngɨŋsu ghɨna su na, “Yi ni chwùtè na gha yile fi wijə shyəma ghàhnà ni. Yen te mbyî yì jɨ̀m hì yênà kə wun a yi bàm!”

²⁰Ghɨt ale ti bên kəbi hi kokhe Yènfù a lùk wu yi yə afâ a bu ghɨt a Jûs,

²¹yen Filîb a mô wùt yi tèk yi yile a Galìlî ghɨ toŋte na Bèsadà chyati wûn jis na, “Bèbɨn ghàh kòŋàlò hi yen a Jisòs.”

²²Filîb yen fôktì ha Andùlù ghê wûn yen fôktì ha Jisòs.

²³Jisòs jis ha ghɨna na, “Yu ti kpên chin shyəma Yènfù lohi kpen wu Wâ Wùt a nyə̂.

²⁴Mu jìsà ha ghàn kə nâ hamok na, ghɨ ki faŋ hi tumhe a yi se ngwìk a chyə̂ ma yi faŋ à kə ha ngwìk. Biyani ma ghɨ ki tumhî, yì kpû ma yì mu saŋa ghɨ dô kə ni.

²⁵À koŋ nâbi nde hi tè chyə a mbye afân ma wù kpu. À hì bânà nâbi nde hi tè chyə a mbye afân ma wù bê khɨti chyəna ghe ghɨ bè mê wi.

²⁶À fètà nâbi nde ha mu, ma wù nê hi kəta hi tè jùmtè mu, shyəma ghàh à wùt fètana mù nê hi mô wu luk wù mòk. Bom màktèlò wùt we wù fètà ha mu.”

²⁷Jisòs fî jis na, “Chin mò ni, təm a ma fo ngə̂k ha mu nâ haŋaŋ, mu khə wi na mu ti jîsà na ghə agha. Mu ti jìsà na, ‘Bôm, kə wò bimî na ngə̂k mi yinâ ben ha mu ma?’ Nâ biyani mu che ben a chyə̂ kə hi yena ngə̂k mi yìnâ.

²⁸Chwùti jyak gha ha ghɨta a Bâ!” Kə ni jyə̀ fwu a nyə̂ jîsà na, “Mu mò ma mu ti chwûtì, fê mò hi chwùtè kpenhî.”

²⁹Ghɨt ghe ghɨ ndùku mò afû yu jyə̀ atɨ̂n, ghɨ le hì jîsà na à bwat wuli, ghɨ le jîsà na à jìsà anjèl à Fùyèn ha wûn.

³⁰Biyani Jisòs jis ha ghɨna na, “Jyə̀ yinâ tà ben hi gàmtè mu, yì jis hi gàmtè ghàn.

³¹Yu ti kpên shyəma Yènfù bobhi ghɨta a mbyî kum besu ghɨna su, nì hi fê jùmà fihe fə̀n à mbyî chîn.

³²Ghɨ bè lôhè mu a yi kpû ma mu toŋa nâ ghɨt à jɨ̀m ma ghɨ ben ha mu.”

³³Wù ndùku jîsà ni, fôktè nki kpû ye wù nè kpo.

³⁴Ghɨt ghe buf na, “Sak yahi yike na Klistù kəta hi chyə fâŋ, wò ti gbi yàni hi jìs na ghɨ kətalò hi lòhè Wâ Wùt a nyə̂ agha? Wâ Wùt mu wùna mô nâ nde?”

³⁵Jisòs ki jîs ha ghɨna na, “Ghàn baha kəta yi ban kə a fu yulâ ni. Ghàn hi gbê luktu baha banâ kə bɨn a finana nê baŋ ghàn. Wùt shìki gbî a bɨn a finana ma wù nê hi khə wi na yi yènà afa agha?

³⁶Ghàn bimi bani baha mô a ghàn a fùtɨ̂n shyəma ghàn hi mô wana yi bana.” Jisòs jis gha mɨ ghɨ̂n ni, tet yen let lò.

³⁷Jisòs ndùku nê nâ gha kanana ghɨ̂n à jɨ̀m ni ghɨna tunhi hi bimi ha wûn.

³⁸Yi tì gan ni, shyəma tum à Fùyèn ye fòktì Ìsayà tì jìsa kpen na, “Bâ, à bimi nde tum yâhì? À yen nde jyak a Bâba?”

³⁹Ghɨna tì faŋ hi bime wu lûm na Ìsayà tî jîs kəbi na,

⁴⁰“Yènfù ti nî ghɨna ti fêf fî tahi a təm a ghɨna shyəma ghɨna nê hi ke kəbi yi kî yena wi, kwàktè kəbi gha khɨle wi, beka ghɨna shìki yên fè khɨle a ghâ ma ghɨna kahà ben ha Yènfù ma fu chwuk ghɨna.”

⁴¹Ìsayà ndùku jîsà a gha mɨ ghɨ̂n kum Jisòs beka wù ndùku mô ma wù ti yen jyak a wuna.

⁴²Nâ biyani, chichàsu ghɨt a Jûs sulesu bimi ha Jisòs dô kə ni biyani tê chwùtè jə̀ ngɨŋsu ghɨna su beka ghɨna ndùku fânà na ghɨna ki chwûtè ngɨŋsu ma ghɨt a Falàsî nê jum ghɨna a ndasu yuŋtesu.

⁴³Ghɨt a Falàsî ndùku kôŋàlò na ghɨta hi kokhe ghɨna chyâ te ghɨ kokhe Yènfù.

⁴⁴Jisòs ti fî jîs nâ a jyə̂ yì tâ na, “À bimi nâbi nde ha mu ma à hi mô na wù ti bimî ha wùt we wù tuma mu.

⁴⁵À yen nâbi nde mu, ma à hi mô na wù ti yen wùt we wù tuma mu.

⁴⁶Mu ben a mbyî te yi bân, ma à bimi nâbi nde ha mu ma wù tè faŋa jə̀ a bɨn a finana.

⁴⁷À yu nâbi nde jîs yi mi faŋ hi nì te mu jìsà, mu wi hi saka wûn beka mu tà ben jə a mbyî hi sak à ghɨ̂t, mu bɨ̀li ben na ghɨta bon.

⁴⁸À ki mana kəbi nde mu, faŋ hi ywo jîs yi mi, ma gha ghe mu jìsà ma ghɨ bê sak wûn wu tuk wu gokhenu.

⁴⁹Mu ndùku jîsà wijə gha ma ghɨ ngɨŋa, à tum Bom mu na mu jis, fî fôktì lum we mu mò hi jìs atɨ̂n.

⁵⁰Mu khə na gha ye Bom jìsa kəta chyə ye yi bè mê wi. Mu bè jîsà nâbi ghə a mô kə gha ye Bom jìsa na mu jis.”