Read Bum Jon 15 Bible Online

Jon 15 - Bum bible

Jon 15

¹Jisòs tî jis na, “Mu mò kə nâ kàntè fùkàk, Bom mô bè fùk.

²Wu gbêtà mâkà kpoŋ te tu mo wi tamu a mu wùn, chwokte tosu a tu kpoŋ afa tu mo tamu, shyəma tu hi tôkà mo tamu.

³Ghàn mò nì yulînì a yi yike afa mu yike ghàn.

⁴Ghàn faŋ à kə ha mu ma mu faŋ à kə ha ghàn. Kpoŋtu fù kàktù wi hi mo jə tamu kə ha wun a ngɨŋ, fu kəta kə hi tè mò a fùkàk shyəma wu mu tamu. Yi ni mò kəbi yi ghəl te ghàn wi hi mo tamu a bu na ghàn faŋ a mu wùn.”

⁵“Mu mò fùkàk, ghàn mô tu kpôŋ. Wùt ki fâŋ a mu wùn, ma mu faŋ ha wûn ma wù mu tamu wu dô kə ni. À hì bu ha mu, ghàn wi hi nè gha yile.”

⁶À faŋ nâbi nde hi tè mò a mu wùn ma wù hi mô kəbi te kpoŋ wu fùkàkù a wu yu afa ghɨ gbet a maka, wu yimlò, ghɨ boŋti kpoŋtu tɨntu ghɨ nyok a wù wùs.

⁷Ghàn ki faŋ kə a mu wùn, yikî mi faŋ kə ghàn a tû, ghàn buf nâbi ghə te ghàn kòŋà ha Bôm, ma wù fo ha ghàn.

⁸À mò a wu yu afa ghàn mo tamu hidù, yi hi chwûtè na ghàn mò jùmtìbàm samsu, nâ mbyî yì jɨ̀m hi yena jyak a Boma.

⁹Mu kòŋà ghàn kə yi ghəl te Bom kòŋà mu. Ghàn faŋ à kə a mu yi kòŋ.

¹⁰Ghàn ki lêmà sak tamtu, ma ghàn faŋ a mu yi kòŋ, kəbi yi ghəl te mu faŋa a Bom yi kòŋ beka mu lèmà saktu wun tu.

¹¹Mu fòktè gha mɨ ghɨ̂n ha ghàn shyəma ghàn hi kəta saŋlî ye mu kəta, a mô yi saŋlî ma yi ti lûn kpên.

¹²Yìna mò sak yi mi na, ghàn hi kòŋà ngɨŋ sanisu kəbi yi ghəl te mu kòŋà ghàn.

¹³Wùt wi hi fè chwùtì yi kôŋ yi chyâ yìna na, wùt koŋ sunsu wunsu ma wù kpu ha ghɨna.

¹⁴Ghàn hì nê te sak yi mi jìsà ma ghàn hi mô sun samsu.

¹⁵Mu fè toŋte wi ghàn chin na ghɨt a fetana beka wùt wù fètana wi hi tè khə gha ye bì yi fèt à wûn nè. Mu toŋte ghàn chin na sun samsu beka mu ti fôktì ha ghàn gha ghe mu ywo ha Bôm nâ à jɨ̀m.

¹⁶À tà ghàn mu chwôk, à che lo mu chwok ghàn tum na ghàn yê mu tam we wu bè mê wi. Ghàn ni ma Bom fo nâbi ghə ghe ghàn bufa ha wûn tohna a mu yi yet.

¹⁷Yìna mò sak yi mi na, ghàn hi kôŋà ngɨŋ sanisu.

¹⁸Ghɨt a mbye hì bânà ghàn, ghàn yɨ̂ŋtì te ghɨ ndùku bânà mu ashyə̂.

¹⁹Ghàn yê hì mô ghɨt a mbye ma ghɨna kòŋàlò ghàn. Chin hì mô mu ti chwokti fihi ghàn a mbyî, ghàn fê bu ghɨt a mbye. À mò yi gha ye ghɨt a mbye bànà ghàn.

²⁰Kə ghàn yìta gha ye mu che yike ghàn atɨ̂n na ‘Wùt fètana tà timî hì chyâ bì yi fèt à wûn.’ Ghɨ mô ma ghɨ chehì bânàlò mu, ma ghɨ nê hi bânà ghàn kəbi yâ. Ghɨ shìki mô ma ghɨ chehì yutelò yikî mi, ma ghɨ nê hi boŋa yute yani kəbi yâ.

²¹Ghɨ nè hì nêlò gha mɨ ghɨ̂n ha ghàn à jɨ̀m ni, kə kum mu beka ghɨna khə wijə wùt we wù tuma mu.

²²Mu ndùku faŋa hi bèn hi jìs ha ghɨna kum besu ghɨna su ma yi chwûtè wijə na ghɨna ti ni be te yi chwûtè chîn. Ghɨna fè kəta wijə gha yile chin hi jìs kum besu ghɨna su.

²³À bànà nâbi nde mu ma yi nê hi chwûtè na wù bànàlò kəbi Bôm.

²⁴À ndùku mô na mu faŋ hi nè yi ghâ a ghɨna fùtɨ̂n, teka wùt timè ni, ma yi chwûtè wijə na ghɨna ti nî be te yi chwûtè chîn. Chin mò ma ghɨna ti yen gha kanana ghɨ̂n biyani fî ban kə yi bân mu bakha kə nì Bôm.

²⁵Nâbi ni, yi chehì kətalò hi gàn ni, shyəma gha ye ghɨ nyaka a ghɨna yi sâk kpen na, ‘Ghɨ che ban mu kə halô.’

²⁶Gàmtì nè bênàlò ma à tum mu ma wù nê hi jîsà kə hamok kum mu. Wù nè lô a Bom a ngwùŋ, a mô a Yohnà wun ghe ghɨ jîsà kə hamok.

²⁷Ghàn nè boŋa jîsà kə hamok ha ghɨta kum mu, beka ghàhnà chehì mô amok kə a yìmi.