Read Bum Jon 17 Bible Online

Jon 17 - Bum bible

Jon 17

¹Jisòs jis mihì gha mɨ ghɨ̂n ki kokhi a nyə̂ jəm na, “Bâ, yu ti kpen chîn. Nì ma ghɨta yen jyak a Wan wâ ghɨ kanana shyəma wù ni ma ghɨta yen jyak gha,

²beka wò ti fo jyaka ha wûn nâ a ghɨt à jɨ̀m a tû shyəma wù ni ma ghe wò fo ha wûn khɨti chyəna ghe ghɨ bè mê wi.”

³Hi khɨte chyənà ye yì bè mê wi, mò na, ghɨna hi khə wò we wò mò Fùyèn fù mòk a fe fu mô hamok, fê khə Jisòs Klistù we wò tuma.

⁴Mu ti chwûtì jyak gha a chyə̂ wu lum na, mu ti ni mihì fêt ye wò che fo na mu ni.

⁵Bâ mù, lyi mu chîn a wo ngwùŋ shyəma ghɨta hi fo kokhînì ha mu a ye ghàh à wò ndùku kəta shyəma ghɨ fati mbyî.

⁶“Mu ti chwûtì wò ha ghe wò che chwokte fihe a mbyi fo ha mu. À chehì mô ghɨt gha ghe wò fo ha mu a ghɨna ywo tum yâ.

⁷Chîn wu hì mô ghɨna khə nâbi ghə ghe mu kəta mò ma ghɨ lo ha wò,

⁸beka mu ti fôktì tum yâ ye a wò che lakne na mu fokti ha ghɨna, ghɨna che yû bimilò. Ghɨna chehì khəlò hamok na mu lo a wo ngwùŋ, bimi na à tum wò mu.”

⁹Mu jə̀mà wi ha ghɨt a mbyî. Mu jə̀mà ha ghɨ̂n ghe wò fo ha mu, a mô a ghɨt gha.

¹⁰Nâbi ghə ghe a mu kəta a mò gha, nâbi ghə gha a mô ghama. Ghɨna ti nî mu wu hì kəta kokhînì.

¹¹Chin wu hì mô mu bu hi faŋ a mbyî, biyani ghɨna baha mô kə a mbyî. Bom wù yulena tòkna nì ghɨna a wo a jyak, a mô a jyak ghe wò che fo ha mu shyəma ghɨna hi mô ha shyə̀ a mòk kəbi yi ghəl te ghàh à wò mò ha shyə̀ à mòk.

¹²Mu che tôknà ha ghɨna te ghàh à ghɨna chehì baha mô amok, lem ghɨna a jûŋ nì jyak ghe wò fo ha mu. Nâ wù mòk tê lə̀hà a bu kə we wù chehì mô hi bè lə̀hà shyəma gha ye ŋwàklù jìsa ni kpen.

¹³Chîn mò mu bênà ha wò, biyani jîsà a gha mɨ ghɨ̂n baha mô kə a mbyî hi nì na ghɨna hi kəta saŋlînì a ghɨna təm, yi kpene kəbi yi ghəl te mu kəta.

¹⁴Mu ti fôktì tum yâ ha ghɨna, ghɨta mbye ghɨ hì bânà ghɨna beka ghɨna wijə te ghɨt a mbye, kəbi yi ghəl te mu wijə wut à mbyî.

¹⁵Mu jə̀mà wi na wò lye fihi ghɨna a mbyî, mu jə̀mà na wò tokna ma wò tesi ghɨna ha deblì.

¹⁶Ghɨna wijə ghɨt a mbye, kəbi yi ghəl te mu wijə wut à mbyî.

¹⁷Gha ya jìsà kə hamok. Nì ghɨna ma ghɨna hi mô nì yulînì, tohne a wo yi gha afa yi mô hamok.

¹⁸Mu ti tum ghɨna a mbyî kəbi yi ghəl te wò che tuma mu na mu yen a mbyî.

¹⁹Mu ti fo ngɨŋ à mì ha wò shyəma ghɨna boŋà fo ngɨŋsu ghɨna su ha wò hamok.

²⁰Mu jə̀mà wi kə ha ghɨna. Mu jə̀mà kəbi ha ghe ghɨ bè ywo tum à mì ha ghɨna ma bimi ha mu.

²¹Mu jə̂mà a Bâ na ghɨna nê hi chîntè mô ha shyə̀ à mòk nâ à jɨ̀m kəbi yi ghəl te ghàh à wò mò kəbi ha shyə̀ à mòk. Nê ma ghɨna faŋ ha ghàh à wò shyəma ghɨt a mbyi ghɨ̂n bimi na wò ti tum mu.

²²Mu ti fo ban yi chiki ha ghɨna a mô ye a wò che fo ha mu shyəma ghɨna hi mô kə ha shyə̀ à mòk, kəbi yi ghəl te ghàh à wò mò kəbi ha shyə̀ à mòk.

²³Mu jə̀mà hi tè mò kə ha shyə̀ à mòk ghàh à ghɨna, ghàh à wò mô kə ha shyə̀ à mòk shyəma ghɨna kahè hi mô kə ha shyə̀ à mòk kə nâ ha ghɨna sù ngɨŋ, hi nì na mbyî hi khə na wò che tum mu, kôŋà ghɨna kəbi yi ghəl te wò kòŋà mu.

²⁴“Mu khɨŋa a Bôm na ghe wò fo ha mu bê hi mô kə wù lùk wù mòk shyəma ghɨna yen ghak yi mi, a mô ye wò tì kòŋa mu fo ha mu, shyəma wò fati mbyî.

²⁵Bì wù jùŋ we wù saka chilichili, ghɨt a mbye khə wi wò biyani mu khə, ghɨ̂n a wò fo ha mu ni khə na à tum wò mu.

²⁶Mu ti chwûtì wò ha ghɨna, mô kə hi tê baha chwùtè yèn kə ashyə̂ shyəma ghɨna hi kəta kôŋì ha ngɨŋsu ghɨna su, beka mu mò a ghɨna fùtɨ̂n. Kôŋ mi yîn mò kəbi yi kôŋ ye wò kəta ha mu.”