Read Bum Jon 20 Bible Online

Jon 20 - Bum bible

Jon 20

¹Te tuku yula bênà a tuk wu shyə a ngâm, Mèli wù Màtalà lo bɨn a baha fina kə ni, yen a Jisòs yi jwô yì sì yen ma ghɨ ti bɨŋhi châkhì ti ye yi jwô àtɨ̂n.

²Wù kahi kə nì nyiŋi yen yen Bità nì jùmtìbàm we a wù ndùku kôŋà yâ, jis ha ghɨna na, “Ghɨ ti fihi Bâba a yi sì, ghàh khə wi na ghɨ yen lem afa wun agha!”

³Bità ghê jùmtìbàm yìlè lô hì yênà a jwô yi sì afû,

⁴ghɨna à jɨ̀m hì gbê nyiŋa kə yi nyîŋ biyani, jùmtìbàm yìlè yê nyiŋ chya Bità yen tan yi jwô yi sì ashyə̂.

⁵Te wù ye time ni, ngumti ki yi sì, yen bâh wu sùnju we ghɨ tì lima Jisòs atɨ̂n, biyani tê lye jə̀.

⁶Samùn Bità ben yi bàm chya lyi ki yi lyî atɨ̂n à yi sì yen kə bâh wu sùnju we afû,

⁷kəbi nì gûm ghe ghɨ tì lima to wuna atɨ̂n, ghɨ mô kə yi ghəl te ghɨ tì limte mô kə hanɨ̂ŋ.

⁸Jùmtìbàm à Jisòs yê yì ye bena ashyə yâ ki boŋa lyi a yu mefû hi yen, ki bimî.

⁹Ghɨna hì baha mô teka ghɨna tòkà khɨli luk wu ŋwàklù we wu jîsà na Jisòs ndùku kəta hi lòtè a yi kpû.

¹⁰Jùmtìbàmsù Jisòs yen yâ, kahi hì kolê.

¹¹Biyani, Mèli faŋ ki yi jwô yi sì hi jyê, shihi ki lihi atɨ̂n à yi sì,

¹²yen anjèlsu Fùyènsu sùbà, ma su ti mak njumù fufamù, su mô a lùk afa ngun yi Jisòs chehì mô atɨ̂n. Anjèl yìlè ndùku mô a lùk afa to wuna ndùku mô, yìlè mô a lùk afa wulu wunu chehì mô.

¹³Anjèlsu tɨnsu buf ha Mèli na, “Wùt ywen, wò jyè ghə?” Wù fîsì jis na, “Ghɨ ti lyi lo nì Bâba mù, mu khə wi na ghɨ yen lem afa wûn agha?”

¹⁴Mèli jis ni shihi bɨ̀nhì wu wun yen Jisòs, wu boŋa mô afû biyani tê khɨlî jə̀ na à mò wûn.

¹⁵Jisòs buf ha wun na, “Wò jyè ghə a wùt ywên? Wò khɨŋa nde?” Mèli hì kwâktè na à mò wut wù fètana a fùk à mu tama afû, jis ha wun na, “À hì mô ma à lyi lo wò nì wûn, a bèbɨn, wò fôktì luk we wò ye lema wûn atɨ̂n ha mu, ma mu kahè yê lyi.”

¹⁶Jisòs fî toŋti kə wun yi yet na, “Mèli!” Mèli kahi ki wun a yu mefû bwat jis a jìs yi Hibùlùs na, “Làbonì!” Ma wù ya toŋti wun na, ‘Chichà’.

¹⁷Jisòs jis ha wun na, “Kə khɨti mu beka mu tà kaha yen jə ha Bì. Bɨ̀li ndù ma wò jis ha wana noma na mu kaha yênà hi yen a Bôm, a mô kəbi Bè à ghɨna, Yèn famfu mô kəbi Fùyèn fu ghɨna fu.”

¹⁸Mèli wù Màtalà kahi yen ha jùmtìbàmsù Jisòs su jis ha ghɨna na, yi ti kək Bâba, wù ti fôktì gha mɨ ghɨ̂n ha yi.

¹⁹À ndùku mô a leŋ a yu kolô, a tuk wu shyə a ngâm, jùmtìbàmsù Jisòs sù mô kə wu luk wù mòk, ma ghɨna ti sen ndâ a ghɨna a tû beka ghɨna ndùku fânà ghɨt a Jûs. Jisòs bûŋhì fwu timi a ghɨna fùtɨ̂n jis na, “Yutìnì mò ha ghàn.”

²⁰Te wù jìsa ni, kahi chwûtì wu wo wunu nì lâ wuni ha ghɨna. Jùmtìbàmsù Jisòs yen wûn hì saŋle nâ haŋaŋ.

²¹Jisòs fî jis kpenhi ha jùmtìbàmsu wunsu na, “Yutìnì mò ha ghàn! Mu tuma ghàn kəbi te Bom che tuma mu.”

²²Wù jis ni, yohnà a ghɨna a tû, jis na, “Ghàn ko Yòhnà Yulena.

²³Ghàn ki lêhèfo nâbi be nde, ma Yènfù lêhèfo wûn, ghàn ki faŋ hi lèhèfo wùt, ma Yènfù tê lèhèfo jə̀ wûn.”

²⁴Te Jisòs tì bèna ha jùmtìbàmsu wunsu, yìlè ye yet yi wuni ndùku mô Tomòs, a mô kəbi wùt wù mòk atɨ̂n à se njwòsù bà ghɨ toŋte kəbi na Didimùs, bu ghê ghɨna.

²⁵Jùmtìsùbàmsu lesu fôktì ha Tomòs na ghɨna ti yen Bâba. Tomòs jis na, “Mu ki faŋ hi yen bûk wù mbanu a wun a wô nì wulu, hi lihe wana ma ghɨ wo atɨ̂n hi fè mòmtè bî là wuni, ma mu nê tê bimî.”

²⁶À hì mô te ngàm chyàla, jùmtìbàmsu wunsu hì mô a ndâ ghê Tomòs, Jisòs bûŋtì timi a ghɨna fùtɨ̂n, nâbi te jwô ndâ ndùku mô ma ghɨ ti sen falò, wù fî jis na, “Yutìnì mò ha ghàn.”

²⁷Wù jis ha Tomòs na, “Lèm wan à wo wâ a wu lùk afân. À mò wo mu ni. Nàhi bî nì wo gha ma lem a mu yi bi là. Bimî, kə fi kanti yi kantî.”

²⁸Tomòs toŋti wûn jis na, “Bâba mù, Yèn famfu!”

²⁹Jisòs jis ha wun na, “Wò ti bimî chîn beka wò yena mu. Biyani, jùŋ mò ha ghê ghɨna tà yen, bimilò.”

³⁰Gha kanana ghɨ le làwû dô kə ni te Jisòs tì nê kə nâ a jùmtìbàmsu wunsu ashyə̂ teka ghɨ nyak a ŋwàklù afân.

³¹Ghɨ nyak ghɨ̂n ni shyəma ghàn yu, ma ghɨ bimi na Jisòs mò kə nâ Klistù a Wâ Fùyèn, ma bimî mi yîn ni na ghàn khɨti chyəna ghe ghɨ bè mê wi.