Read Bum Jon 21 Bible Online

Jon 21 - Bum bible

Jon 21

¹Jisòs tì fî fwu kpenhi a jùmtìbàmsu wunsu yì kə̀k sàmba tuk lefu yi bi lwi Tàbeliyàs. Gha tɨni tì gan wu lum afân ni.

²Jùmtìbàmsù Jisòs ndùku chîntè mò kə wu lùk wù mòk sàmba, a mô Samùn Bità ghê Tomòs we ghɨ ndùku toŋte kəbi na Didimùs nì Nàtanyèl a wâ wùt a yi tèk yi Kanà a lak yi Galìlî nì wana Sebedì, kəbi nì jùmtìbàmsu wunsu lesu sùbà.

³Samùn Bità jis ha ghɨna na, “Mu shika yênà hi kwo a yi.” Ghɨna fîsì na, “Ghàhnà nè shika kə amok.” Ghɨna jis ni yen lye a ngwùk, biyani tuku yû teka ghɨna kwo shyə ale.

⁴Chwì hì sate bênà kə ni, Jisòs ben timi a bi jwôlì, biyani jùmtìbàmsu wunsu tà khɨlî jə na à mò wûn.

⁵Wù toŋti buf ha ghɨna na, “Ghàn tà kwo jə shyə ale, a bə ghɨ̂n?” Ghɨna fîsì na, “Ghɨna tà kwo jə̂.”

⁶Wù jis na, “Ghàn tum wə wanu a bàh à kpen wu wo ta ma ghàn kwo.” Ghɨna tûm kwo a yi nâ hidù wəlu tɨnu hì jîtà ghaka ghɨna hi sèn à lihi a ngwùk.

⁷Jùmtìbàm à Jisòs we wù ndùku kôŋà hanɨ̂ŋ yâ, jis ha Bità na, “Wùt we mò yani a mô Bâba!” Samùn Bità yu ben ni, lyi mak njusu wunsu chem chwo a jwô. Wù ndùku mô ya ma wu ye chwok nju se wù ye maka.

⁸Jùmtìbàmsu lesu boŋ yen kə Bità yi bàm gufà yênà nì wəlu yì wê. À ndùku mò ni, a fê dàfà wi hi yè tàn a yi bi jwôlì.

⁹Ghɨna yen fwu yi bi jwôlì yen wusu bamê yila mô a tô atîn nì bana.

¹⁰Jisòs jis ha ghɨna na, “Ghàn ben nì yila le ghe ghàn kwola kə chîn ni.”

¹¹Samùn Bità kahi lye a ngwùk guf ben nì wəlu yì we a bi jwôlì. Yila ndùku chîntè mô atɨ̂n wu wə nì mtân jwòsù tât, ghakle kə ni. Ghɨ ndùku dô yâ wəlu tɨnu tà tentî.

¹²Jisòs ki jîs ha ghɨna na, “Ghàn ben ma yə shyə mbisìmbisi.” Wù ndùku jîsà ni, nâ jùmtìbàm à wûn yì mòk tà môm jə̂ hi buf na, “À mô wò nde?” Beka ghɨna ndùku khə na à mò Bâba.

¹³Jisòs yen lyi a ban ghe fo ha ghɨna fî ni kəbi ya nì yila.

¹⁴Jisòs tì chwùti ngɨŋ à wûn ha jùmtìbàmsu wunsu a lùk afân na à hi mô a ghan à tât te wù kahe lote a yi kpû.

¹⁵À ndùku mô te ghɨna yə mihe, Jisòs toŋti Samùn Bità buf ha wun na, “Samùn, wâ Jon, wò fate kôŋàlò mu hamok chyâ ghɨt ale ghɨ̂n agha?” Wù bimî jis na, “Bâ, wò khəlò na mu kòŋàlò wò.” Jisòs jis ha wun na, “Wo yəhe wana ma ghɨ njyə̀là.”

¹⁶Jisòs fî buf kpenhi ha wun na, “Samùn, wâ Jon wò fate kôŋàlò mu hamok agha?” Wù bimî jis na, “Bâ wò khəlò na mu kòŋàlò wò.” Jisòs jis ha wun na, “Wo kine njyə̀ samsu.”

¹⁷Jisòs fî toŋti wûn na à hi mô a ghan à tât, “Samùn, wâ Jon, wò kòŋàlò mu?” Gha tɨni hì fo ngə̂k ha Bità te Jisòs fe kunte bufa ni beka wù tì buf a ghan à tât na, “Wò kòŋàlò mu?” Wù ki jîs ha Jisòs na, “Bâ, wò khə nâbi ghə. Wò khəlò na mu kòŋàlò wò.” Jisòs jis ha wûn na, “Wo yəhe njyə̀ samsu.

¹⁸Mu jìsà ha wò hamok na, à ndùku mô te wò baha mô ha walà, wo lafa yênà nâbi afa te wò kòŋà. Biyani, a wu yu afa wò jùna wo nâhè kpen wa wùt hi labhe wò lyê yênà nì wò wu lùk wo kôŋà wi.”

¹⁹Jisòs ndùku jîsà ni, hi fôktì lum we Bità bè kpo atɨ̂n yi bênà nì kokhînì ha Yènfù. Jisòs tì jis ni, kahi jis na, “Jùmti mu.”

²⁰Bità kahi ki yen jùmtìbàm ye Jisòs ndùku kôŋà hanɨ̂ŋ yâ, yi bênà a ghɨna yi bàm, a mô kəbi we wù tì yikte yena a Jisòs wù wùn a yu yənu yâ, buf ha wun na, “Bâ, à bəkli nde wò?”

²¹Bità yen ni buf ha Jisòs na, “Yi bè hì mô yàni ha wùna a Bâ?”

²²Jisòs fîsì jis na, “Mu ki de na wù hi chyə kə yi chyə̂ nâ hi yaka te mu bè kahe bênà, ma ngə̂k yâ hi mô ghə atɨ̂n? Wò kəta hi jûmtè mu.”

²³À mò gha ye yi tì ne shyəma jùmtìbàmsù Jisòs hi jîsà yênà kə na wùna meti bè kpo wi. Biyani, Jisòs tà tì jis jə na wù bè kpo wi. Wù tì jis na, “Mu ki de na wù hi chyə kə yi chyə̂ ma ngə̂k yâ atɨ̂n hi mô nâ ghə?”

²⁴Jùmtìbàm à Jisòs mu yîn ndùku mô ye yì fòktè gha mɨ ghɨ̂n, a mô kəbi wun we wu tì nyàka gha mɨ ghɨ̂n. Ghàh khə na gha ye wù jîsà mò kə hamok.

²⁵Gha baha mò kə nâ hidù te Jisòs tì ne, ma ghɨ ndùku mô hi nyàk kə à jɨ̀m, mu kwâktè na mbyî yîn yì jɨ̀m ndùku ghaka kpene wi hi lèma ŋwàklù àtɨ̂n.