Read Bum Jon 6 Bible Online

Jon 6 - Bum bible

Jon 6

¹Jisòs ni mihì gha mɨ ghɨ̂n lo daŋ yen yi jin yi lwi Galìlî yê, kəbi wu lwî we ghɨ ndùku toŋte na Tàbeliyàs yâ.

²Shihi dàŋ, ghɨta daŋ a wun a yi bàm dô kə ni, beka ghɨna ndùku mô ma ghɨna ti yen chwesu gha kana se wù ndùku nê ha ghɨt a yablena, ghɨna tâ.

³Jisòs daŋ ni, yen kwok ndokò a tô kùn ghê jùmtìbàmsu wunsu.

⁴À ndùku mô ni, ma tuk mù Yə Daŋa Chyalani mù ghɨt a Jûs hì bakhe bênàlò.

⁵Kə ni wù shihi kî yen ghɨta ghɨ dô kə ni, ghɨ bênà, wù buf ha Filîp na, “Ghàhnà nè yuna afa mwə̀ mù yə̂mù hi fo na ghɨt ghɨ̂n yə?”

⁶Wù ndùku bufa ni khɨŋa kə hi mòm a Filîb, khə kə nâ gha ye wù mò hi nì.

⁷Wù buf ni, Filîb jis na, “Ghɨ ki fêt wu ka a sù njoŋ fama wu wi hi kpên hi yun à mwə̀ mù yə̂mù shyəma nâbi nde afân môm a kə yi môm.”

⁸Jùmtìbàm yì wûn yìlè ghɨ toŋte na Andùlù a mô wâ nè Samùn Bità ki jîs na,

⁹“Wan wù tetana wùlè làwû afân, ma wù ye hì gbê nì tuk wu ban wù tân a mô ban a saŋa balì nì yila à bà. Biyani mwə̀ mù yə̂mù munâ kpene wi ha ghɨt ghɨ̂n.”

¹⁰Jisòs jis ha jùmtìbàmsù wunsu na, “Ghàn jis ma ghɨt atɨna ndoko a chyə̂.” À ndùku mô ni wəlânù dô kə lùk wu tɨnu ni. Ghɨt atɨna chwo ndokò a chyə̂, lɨmànà mô a ghɨna fùtɨ̂n te kamsù tân.

¹¹Jisòs ki fye wu ban we fo àyòŋnà ha Yènfù, fo na ghɨ jyati ha ghɨta. Wù fî fyi yila ghê fo àyòŋnà ha Yènfù jyâtì ha ghɨta, nâbi nde yə kwut kə te wù kòŋà.

¹²À hì mô te ghɨna yə kwuta, Jisòs jis ha jùmtìbàmsù wunsu na, “Ghàn kumti chyàk se su faŋa kə shyə ale lə̀ha halô.”

¹³Ghɨna kumti chyàk se ghɨta tì yə behe, su lun kàsù njwòsù bà.

¹⁴Ghɨt mɨ yen chwena gha kanana yîn a Jisòs ne, hì jîsà na, “À mô kə nâ fòktì yì chìk ye ghɨ tì chwùne na yì bè bênàlò a mbyî ni.”

¹⁵Jisòs yen na ghɨ nè bê khɨte lèmàlò yi ha fə̀n a jyak, fî tok tet kwok yen a tô kùn kə wù nɨ̂ŋ.

¹⁶À hì mô a wu yu kolô, jùmtìbàmsù wunsu kaha chwo yen a wu lwì,

¹⁷lye a ngwùk hì kaha dâŋà yênà a Kàbanùm, tuku hì jyə bênà, Jisòs baha mò teka wù kwoti ghɨna.

¹⁸A mô ni fufa ta ale chyâ shikà jwô nâ haŋaŋ.

¹⁹Jùmtìbàmsu wunsu gbî hì tânà yênà mâlsu kìk, shihi kî yen Jisòs wu gbê bakha bênà ha ghɨna a tô mòlû. Ghɨna hì fânà nâ haŋaŋ.

²⁰Biyani, Jisòs jis ha ghɨna na, “Kə ghàn fan, à mò mu.”

²¹Ghɨna hì saŋlê hi lyè wûn a ngwùk, chin kə ma ghɨna ti daŋ mihì a yi jin afû.

²²Tuku yû, ghɨt ghe yen na à chehì mô ngwùk yì mòk a yi jin yi lwi afû, a mô ye jùmtìbàmsù Jisòs su ye daŋa atɨ̂n, shihi dàŋ ni, Jisòs tê yènà jə̀ ghê ghɨna.

²³Ngwùksu lesu a Tàbeliyàs ben time a ngwùŋ wù lùk afa Jisòs tì bonhe mwə̀ mù yə̂mù yâ fo ha ghɨta na ghɨna yə.

²⁴Ghɨta dona ghe yen nâbi wùni yu na Jisòs fi wijə afû nì jùmtìbàmsu wunsu, lye a su ngwùk afû hì khɨŋa dâŋà yênà nì wûn a Kàbanùm.

²⁵Ghɨt atɨ̂na daŋ ni, yen Jisòs buf ha wun na, “Chichà wò ye bena afân a wùni yu?”

²⁶Jisòs fîsì jis ha ghɨna na, “Mu jìsà ha ghàn kə nâ hamok na, ghàn yê hì khɨŋa mu beka ghàn che yə̂ kwût, à bu njwo ghàn yena khɨle gha kanana ghe mu ne.

²⁷Kə ghàn hi nyɨŋa yi bàm yi mwə̀ mù yə̂mù mu mô hi bêf. Ghàn hi bɨlà nyɨŋa yi bàm yi mwə̀ mù yə̂mù me mù fo chyəna ghe ghɨ bè mê wi, a mô wûn Wâ Wùt hi fo ha ghàn, beka Bom Yènfù mò ma fu ti chwûtì a ndan na mu kətalò jyak atɨna.”

²⁸Ghɨna buf ha wun na, “Ghàh mò hi nè ghə hi tè nè gha ye Yènfù khɨŋa agha?”

²⁹Jisòs fîsì na, “Fêt yì Fùyènì mò na ghàn bimi ha we a ghɨ tuma a mbyî.”

³⁰Ghɨna fî buf ha wûn na, “Wo te nê nâ yìni chwena gha kanani shyəma ghàh yen ma ghɨ bimi wò? Wò te nê nâ ghə?”

³¹Be be ghaha ti yə̂ mwə̀ mù yə̂mù me ghɨ toŋte na manà yâ yi lak yi sùsi, kə yi ghəl te ghɨ mô ma ghɨ ti nyak a ŋwàklù Fùyèn na, ‘Wù tî fo mwə̀ mù yə̂mù ma mù lo a nyə̂ ghɨna yə̂.’

³²Jisòs jis ha ghɨna na, “Mu jìsà ha ghàn kə nâ hamok na, à tà tì fo jə Musìs mwə̀ mù yə̂mù me mù lo a nyə̂ ha ghàn. À tì bɨ̀li fo Bom mwə̀ mù yə̂mù ma mù lo a nyə̂.

³³Mwə̀ mù yə̂mù Fùyèn mò wut we wù lo a nyə̂, ben hi fo chyəna a mbyî.”

³⁴Ghɨna toŋti wun jis na, “Bâba, fo mwə̀ mù yə̂mù ha ghàh kə yu mù jɨ̀m.”

³⁵Jisòs jis ha ghɨna na, “Mu mò mwə̀ mù yə̂mù me mù fo chyə ha ghɨta. À mò ma à ben nâbi nde ha mu ma jìŋ bê tè fè yafa jə̀ wûn, ma à bimi nâbi nde ha mu, ma kuŋ à mòlû bê tè fè yima jə̀ wûn.

³⁶Mu che jis ha ghàn na, ghàn ti yen kəbi mu, biyani tè bime jə̀.

³⁷Ghɨt ghe Bom fo ha mu bè kə yi bên ha mu, mu bè jûmà wijə wùt we wù bèna ha mu,

³⁸beka mu lo a nyə̂ chwo ben a chyə̂ hi nè gha ye we wù tuma mu khɨŋa. A bu gha ye mu khɨŋa a mu ngɨŋ.

³⁹Wùt we wù tuma mu kòŋà wi na nâ wùt wù mòk te wù fo ha mu ləha. Wù khɨŋa na wù bê kahà lohi ghɨna a yi kpû a tuk wu gokhenu.

⁴⁰Bom khɨŋa na nâ ghɨt à jɨ̀m te ghɨ yena mu bime ha mu, chyə̂ faŋ. Ma mu bê kahà lohi ghɨna a yi kpû a tuk wu gokhenu.”

⁴¹Wù jis ni, ghɨt a Jûs yû hì dûmlè kum gha ye wù jìsa na yi mò mwə̀ mù yə̂mù me mù lo a nyə̂.

⁴²Ghɨna buf na, “Ba wùna mò Jisòs kə nâ wâ Josèf, ghàh khə bè wûn nì nè wûn? Wù gbi yàni hi tè jìs na yi lo ben a nyə̂?”

⁴³Jisòs jis ha ghɨna na, “Kə ghàn hi fê dûmlè njaŋâ kum nì gha ye mu jìsa.

⁴⁴Bì we wù tuma mu ki fâŋ hi gùf a wut na wù ben ha mu, ma wù tê bênà jə̀. Wù ki bên ma mu bê kahà lohi wûn a yi kpû a tuk wu gokhenu.

⁴⁵Fòktì yì chìk yìlè ti nyak na, ‘Yènfù bè yike lò ghɨt à jɨ̀m.’ Nâ ghɨt à jɨ̀m ghe ghɨ ywo gha ye Bom jìsa bè lò ha mu.

⁴⁶Wùt tà timi yen jə bâ a bu kə we wù lo a Yènfù a ngwùŋ. A mô kə wûn we wù time yena bâ.

⁴⁷Mu jìsà ha ghàn kə nâ hamok na, à bimi nâbi nde ma wù chyə faŋ.

⁴⁸Mu mò mwə̀ mù yə̂mù me mù fo chyə ha ghɨta.

⁴⁹Be be ghana tî yə mwə̀ mù yə̂mù me ghɨ ndùku toŋte na manà a lak yi sùsi, biyani kputi lò.

⁵⁰Mwə̀ mù yə̂mù munâ mu jìsà chin ni, à mò mwə̀ mù yə̂mù ma mù chwo ben a nyə̂, ma wùt ki yə̂ ma wù bê tè fê kpû.

⁵¹À mò kə nâ mu mwə̀ mù yə̂mù munâ mù fo chyə ni, te mù chwo bena a nyə̂. À yə nâbi nde mwə̀ mù yə̂mù munâ, ma wù chyə faŋ. Mwə̀ mù yə̂mù munâ a mô wun wu mu we mu fo shyəma ghɨta mbye hi chyə̂.”

⁵²Jisòs tì jis ni, gha yaf ghɨt a Jûs mu ghê, ghɨna njaŋ nâ haŋaŋ buf na, “Wùt wunâ jìsà na yi làhi fo yàni wun wu wunu ha mwə̀ mù yə̂mù ma ghàhnà yə agha?”

⁵³Jisòs ki jîs ha ghɨna na, “Mu jìsà ha ghàn kə nâ hamok na, ghàn ki faŋ hi yə wun wu Wâ Wùt ha mwə̀ mù yə̂mù hi fè nyo mu luŋ mù wûn ma hi mô na ghàn chyə wi yi chyə̂.

⁵⁴À yə nâbi nde wun wu mu fî nyu luŋ mâmù ma à hi mô na wu kəta lò chyə ye yi mê wi, ma mu bê fê lohi wûn a yi kpû a wu tuk wu gokhenu,

⁵⁵beka wun wu mu mò kə nâ mwə̀ mù yə̂mù, luŋ mâmù mô kə nâ a shyə nyona.

⁵⁶À yə nâbi nde wun wu mu, fî nyu luŋ mâmù, ma wù hi chyə ha mu, mu chyə ha wûn.

⁵⁷À ki yə nâbi nde wun wu mu, ma wù hi chyə kum mu, kə yi ghəl te mu chyə beka we wù tuma mu chyə.

⁵⁸Mu mò mwə̀ mù yə̂mù me mù chwo bena a nyə̂. Be be ghàhnà ti yə mwə̀ mù yə̂mù me ghɨ toŋte na manà yani kputilò, biyani à ki yə nâbi nde wun wu mu wunâ ma wù chyə faŋ.”

⁵⁹Jisòs hì jìsà ni, yike à ghɨ̂t a ndâ yì yùŋtì à ghɨt a Jûs a Kàbanùm.

⁶⁰Jùmtìbàmsu Jisòs su dosu yu yikî yinâ hì jîsà na, “Yikî yinâ ta nâ a be. À mò hi bime nde gha tɨni?”

⁶¹Jisòs khɨle a wun a ngɨŋ na à mò gha ye ghɨna dùmlè kum yini, buf ha ghɨna na, “Yikî yinâ fo ngə̂k ha ghàn nâ a be agha?

⁶²Ghàn ki yena Wâ Wùt wu kaha lô yênà a nyə̂ a lùk afa wù ndùku mô atɨ̂n ashyə̂, ghàn ni nâ ghə?

⁶³À fo kə Yohnà Fùyènà chyə faŋani ha ghɨta. Wùt kəta wi gha yile hi nì a wun a ngɨŋ hi chyə fâŋ. Mu hi mò ma mu ti fôktì gha ye ghàn kəta hi nì hi khɨte chyə ye yi bè mê wi a Yohnà Fùyènà fo ni.

⁶⁴Mu fòktè kəbi ni, ghàn ale bime wi.” Jisòs ndùku jîsà ni beka wù ndùku khəlò ghɨt ghe ghɨ bè bime wi ha wûn kə nâ a yìmi, fê khə we wù ndùku mô hi bè bəkle wûn.

⁶⁵Jisòs fî jis ha ghɨna na, a ni mò gha ye wù jìsa ha ghɨna na, wùt wi hi bèn ha yi a bu kə na à fo Bì jyaka na wù ben.

⁶⁶Kum ni, jùmtìbàmsu wunsu dosu tet hì fè jûmtè wijə wûn.

⁶⁷Te su teta yâ, wù ki buf ha se njwòsù bà na, “Ghàn boŋa khɨŋa kəbi hi tet à dè mu ma?”

⁶⁸Samùn Bità fîsì ha wun na, “Hi fè yèn ha nde a Bâ, à mò hi fòktè nde gha ye yi fo chyə ye yi bè mê wi a bu kə wò?

⁶⁹Ghàh bimelò fê khə na a mò wò wùt wù yulena wu Fùyèn we wù lo bena a nyə̂.”

⁷⁰Jisòs jis ha ghɨna na, “Ba ghàn khəlò na à che chwok kə nâ mu ghàn ghɨ̂n njwòsù bà biyani wùt wù mòk mô a ghàn a fùtɨ̂n a mô deblì.”

⁷¹Wù ndùku jîsà kum Judàs a wâ Samùn Ìskaliyòt a we wù ndùku mô kəbi atɨ̂n à jùmtìbàmsu wunsu njwòsù bà biyani mô hi bè bəkle wûn.