Read Bum Jon 8 Bible Online

Jon 8 - Bum bible

Jon 8

¹À hì mô te ghɨta kole, Jisòs lo kwok a kùn à sù Olìfs.

²Tuku hì bɨsa yula bê kə ni ma wù hì mô a ndâ Fùyèn, ghɨta ben ndokò kat a wun a ngwùŋ wù chwo ndokò hì yike ghɨna.

³Chichàsu saksu ghɨt a Falàsî lyi bên nì wùt ywen ma ghɨ kwo ghê wùt lɨmà chyə̂. Ghɨ ben tom wùt ywên àtɨ̂n a ghɨta ashyə̂,

⁴ki jîs ha Jisòs na, “Chichà, ghɨ kwo wùt ywên wuna wù chyə ghê wùt lɨmà a bu lɨm à wûn.

⁵Musìs tî nyak a ghàhnà yi sak na ghɨ kwo wùt ywên ni, ghɨ tumli ywi nì te. Wò jis nâ ya na ghə?”

⁶Ghɨna ndùku bufa ni tama na Jisòs jis à njah ma ghɨ khɨli gha ye ghɨ mô hi ngane wûn atɨ̂n. Biyani, Jisòs ngumti yen a chyə̂ hì nyâkà gha wuna wu bùt nì wan à wô.

⁷Ghɨna hì bufa kə yi bûf gha yîn ha wûn, wù kaha lôhì wu wun jis ha ghɨna na, “Wùt shìki mô a ghàn a fùtɨ̂n teka wù timè ni be wu yitì tum wûn nì ti.”

⁸Te wù jìsa ni kaha ngumti yen kə a chyə̂ hi nyaktè a gha wuna.

⁹Ghɨna yu ni hì lô kə fù mòk, fù mòk hi yìmì ha ləmanà, ghɨna lô kə ni, à faŋ kə Jisòs ghê wùt ywên àtɨ̂n.

¹⁰Jisòs fî kaha lôhì wu wun buf ha wùt ywên àtɨ̂n na, “Ghɨt ghe yen afa? Nâ wùt wù mòk tà faŋ hi jìs na wò ti fen sak agha?”

¹¹Wùt ywên àtɨ̂n fîsì jis na, “Nâ wùt wù mòk tà faŋ jə̂ a Bâba.”[3] Jisòs jis ha wun na, “Nâbi mu tà boŋ jis jə̂ na wò ti fen sak. Lô ma wò hi kolê. Wò kolô, kə fî ni be.”

¹²Jisòs hi fê jîsà ha ghɨt a Falàsî na, “Mu mò ban yi mbyi. À jùmti nâbi nde mu ma wù khɨti bani a wun a chyənà ma wù hi fê gbê wijə a bɨn a finana.”

¹³Ghɨt a Falàsî mu ghê jis ha wûn na, “Ba wò khə na wò mò ni jîsà kə kum ngɨŋ yâ, jîs ya kəta wi luku.”

¹⁴Jisòs jis ha ghɨna na, “Gha ye mu jìsà mò kə nâ hamok nâbi te mu jìsà kum ngɨŋ à mì, beka mu khəlò luk we mu lo atɨ̂n khə we mu yènà atɨ̂n. Biyani wùt ha ghàn khə wi na mu lo afa agha yènà afa agha.

¹⁵Ghàn saka nì tofu mbyi, mu saka wi wùt.

¹⁶Biyani, mu shìki mô hi sak a wût ma mu hi saka kə hamok beka mu wijə mù nɨ̂ŋ. Mu mò ghàh à Bom we wù tuma mu.

¹⁷Saki jìsà na, ghɨta ki time bɨ̀n à sak yi ghâ à bà ma ghɨ hi kəta hi yute gha ye ghɨna jìsà.

¹⁸Mu mò jìsà kum ngɨŋ à mì, Bì we wù tuma mu fê jîsà kum mu.”

¹⁹Ghɨna buf ha wun na, “Ba wù tɨ̂n mò afa?” Jisòs fîsì jis na, “Ghàn khə wi mu, khə wi Bôm. Ghàn yê hì khə mu ma ghàn khəlò Bôm.”

²⁰Jisòs ndùku yike gha ghɨ̂n mô a bàh a ndâ Fùyènà afa ghɨ ndùku lêmà fotu atɨ̂n. Biyani wùt tê kwo wûn beka yu we Yènfù lèma na ghɨ kwo wûn atɨ̂n ndùku mô teka wu kpen.

²¹Jisòs fî jis kpenhi na, “Mu nè lôlò ma ghàn khɨŋ mu, ma ghàn tê yên, ma ghàn kputi a ghàn a sùbe. Mu yènà wu lùk ghàn bu hi bèn afû.”

²²Chichàsù ghɨt a Jûs hì bufa na, “Wù ni jìsà na ghàhnà wi hi yèn wu lùk afa wù yènà yi chwûtè na ghə? Wù khɨŋa hi ywe ngɨŋ à wun ma?”

²³Biyani Jisòs fî jis na, “Ghàn mò ghɨt a mbye afân, biyani mu mô ma mu lo a nyə̂. Ghàn mò ghɨt a mbye mu wijə wut à mbyî.

²⁴Mu ti jis ha ghàn na ghàn nè kputelò a ghàn a sùbe. Ghàn ki faŋ hi bimî na mu mò wùt we mu jìsà na mu mò wûn, ma ghàn nê kputi a ghàn a sùbe ni te mu jìsa.”

²⁵Ghɨna buf ha Jisòs na, “Wò mò nâ nde?” Jisòs fîsì na, “Mu mò kə wut we mu che jisa yi fiti na mu mò wûn.

²⁶Gha dô kə ni a mu mò hi jìs kum ghàn hi fè fo ngə̂k ha ghàn atɨ̂n. Biyani mu nè nê wijə ni beka we wù tuma mu wù jìsà kə hamok, mu jîsà kə gha ye wù jìsa na mu jis ha ghɨt a mbye.”

²⁷Wù jis ni, ghɨna tê ywo khɨli na wù jìsà kum Bè wûn.

²⁸Jisòs jis ha ghɨna na, “Ghàn bè kokhe lò Wâ Wùt a tô kàkfùtàfù ma banti nâbi wùni yu ma ghàn khɨli na à mò mu we mu mò, ma fê khɨli na mu nè wijə gha a mu ngɨŋ, biyani jîsà kə gha ye Bom yike mu nì yini.

²⁹We wù tuma mu wù mò ghàh à wûn. Wù tà de jə mù nɨ̂ŋ beka mu nè kə gha ye wù kòŋà.”

³⁰Ghɨt a dona yu jis yi Jisòs bimi ha wûn kə wu yu mefû.

³¹Jisòs tî jis ha ghɨt a Jûs ghe ghɨ tì bime ha wun na, “Ghàn ki khɨte yikî mi, ma ghàn hi mô kə nâ jùmtìbàm samsu hamok.

³²Ghàn ki khɨle gha ye yi mô hamok kum Yènfù, ma hamok à Fùyèn nê ni ma ghàn hi fê bu wu kwôs.”

³³Wù jis ni, ghɨna buf ha wun na, “Wò jis na hamok mò hi fihe ghàh a yìni ngə̂k agha? Ghàh mò ghɨt a yi sah yi nda Ablàhâm, teka ghàh timè hi mô wu kwôs ha wùt.”

³⁴Jisòs jis ha ghɨna na, “Mu jìsà ha ghàn kə nâ hamok na, nâbi nde we wu nè be wù mò a kwôs ha be.

³⁵Kwôsà tà timi hì mô wut à yi sah yi nda, biyani wan wi hi fwu ha wùt à yi sah yi nda.

³⁶Yi ni chwûtè na Wâ Wùt ki jîs na wò fi wijə a kwôs, ya mò na, wò fi wijə a kwôs hamok.

³⁷Mu khəlò kə nâ na ghàn fwu a Ablàhâm yi sah yi nda, biyani hi khɨŋa hi ywe mu beka ghàn kòŋà wi hi ywo yikî mi.

³⁸Mu fòktè kə gha ye a Bom chwùte ha mu, ghàn nê kə yi gha ye ghàn ywo ha bì wânù.”

³⁹Ghɨna fîsì na, “Ghàh mò wana wana Ablàhâm.” Jisòs fîsì jis ha ghɨna na, “Ghàn ye hì mô wana wana Ablàhâm ma ghàn nè kə gha ghe Ablàhâm ndùku nê.

⁴⁰Ghàn mò ni ma ghàn ti lem hi ywe mu, mu fôktè a gha ha ghàn ghɨ mô kə hamok, ma mu yu ha Yènfù. Ablàhâm ndùku nê wi nki gha ghɨ̂n.

⁴¹Ghàn nè kə gha ghe bì wânù nè.” Ghɨna fîsì na, “Yènfù mò kə Bì wù mòk we ghàh kəta, ghàh mô kə wana wuna bâtà wi yi bât.”

⁴²Jisòs jis ha ghɨna na, “Yènfù yê hì mô kə nâ Bì wânù ma ghàn kòŋàlò mu beka mu lo kə nâ a funfu a ngwùŋ. Mu tà che bèn jə̂ a mu ngɨŋ, à che tum funfu mu.

⁴³Njwô ghə te ghàn ywo khɨle wi gha ghe mu jìsà agha? Ba à mò njwo ghàn kòŋà wi hi yû.

⁴⁴Ghàn mò wana deblì, khɨŋa kə hi tè nè gha ghe a wù kòŋà na ghàn hi nê. Wù ndùku ywitelò ghɨta kə ha yìmi, jîsà wi hamok beka wù mò wut à tu fə̂m. Nâbi yini te wù wama fəmi a hi mô chyənà à wûn beka wù mò wut à tu fə̂m, mô kə nâ bè tu fə̂m.

⁴⁵Mu wu hì jîsà kə nâ hamok ghàn bime wi gha ye mu jìsà kum yì yîn

⁴⁶Wùt a ghàn a fùtɨ̂n làhi chwùtì na mu ti ni be agha? Mu wu hì jîsà hamok, ghàn bime wi gha ghe mu jìsà njwô ghə?

⁴⁷À mò nâbi nde Wâ Fùyèn wu hi ywo gha ghe Yènfù jìsà. Ghàn ywo wi beka ghàn wijə wana Fùyènà.”

⁴⁸Ghɨt a Jûs ale ki jîs ha Jisòs na, “Ghàh tê jis kəbi na wò mò wut à Sàmaliyà kəta a yohnà be.”

⁴⁹Jisòs jis ha ghɨna na, “Mu kəta wi yohnà be. Mu ngumle Bôm biyani ghàn chaha mu.

⁵⁰Mu khɨŋa wi na ghàn hi kokhe mu biyani wùt làwû a wù khɨŋa na ghɨ hi kokhe mu a saka fo wûn sak à mì.

⁵¹Mu jìsà ha ghàn kə nâ hamok na, à yu nâbi nde yikî mi ma wù chyə̂ faŋ.”

⁵²Ghɨt a Jûs mu ghê yu ni jis na, “Ba ghàh tê jis kəbi na wù mò ni kəta a yohnà be! Nâ Ablàhâm tî kpû fòktìsu chiksu boŋ kputî wò wu hì jîsà na à yu nâbi nde yikî ya ma wù chyə̂ faŋ agha.

⁵³Ba wò jìsà hi chwùtì na wò chyàlò Ablàhâm bì wâhù ma? Ablàhâm ghe fòktìsu chiksu hì mô ma su ti kputî, wò wu hì mô nâ nde?”

⁵⁴Jisòs fîsì jis na, “Mu ye hì kokhe ngɨŋ à mì ma yi hi chwûtè wi gha yile. Bom we a ghàn lyè na mò Yèn fanifu à mò we wù kokhe mu.

⁵⁵Ghàn khə wi wûn, biyani mu khə. Mu ki jîs na mu khə wi wûn ma à hi mô na mu wama kəbi te ghàn. Mu khəlò wûn, ywo ha wûn.

⁵⁶Bì wânù ndùku khəlò na mu nè bênàlò, gha tɨni nî wù hì saŋle nâ haŋaŋ.”

⁵⁷Ghɨt atɨna buf na, “Wò baha yê mô teka wò tan lɨ̀m mtân wo wu hì khə Ablàhâm ma wò tì yen afa wûn?”

⁵⁸Jisòs fîsì jis na, “Mu jìsà ha ghàn hamok na, ghɨ tì shihi bwə Ablàhâm Mu mô!”

⁵⁹Kə wu yu ghɨna kumti a ti hì khɨŋa hi tumle Jisòs atɨ̂n biyani wù lêt. Nyam lo a bɨn a nda Fùyènà.