Read Bum Jon 9 Bible Online

Jon 9 - Bum bible

Jon 9

¹Jisòs tî lô hì gbê yênà, yen wùt wùlè ma wù tì fêf kə yi bwɨ̂.

²Jùmtìbàmsù wunsu toŋti wun buf ha wun na, “Chichà à ni be à nde na bə wuna fef kə yi bwɨ̂, a yì bè wûn ma à yì nè wûn ma kə nâ yì wûn agha?”

³Jisòs fîsì jis na, “À wijə kum be wûn, à wijə kum yì bè wûn nì yì nè wûn. Gha mi yîn gan ni shyəma ghɨta yen à mihi wo fètà kanana Fùyènà a wun wu wùn.

⁴Ghàhnà kəta hi tè nè yi fêt yi wùt we wù tuma mu, a baha mô nchwì beka bɨn a fina bênàlò, a mô wu yu we wùt wi hi fè fèt a shyə ale atɨ̂n.

⁵Mu kəta hi tè fo yi bân ha ghɨta a mbyî.”

⁶Jisòs jis ni, chwu a mchwâ a chyə̂ lamli wu bût yokle a wùt wù fèfana àtɨ̂n a sê,

⁷jis ha wun na, “Ndù ma wò ye su kə̂k ya a chɨ̀m a Silwàn.” Silwàn mi yinâ yi jìs yi laki ndùku mô na, “Tûm.” Wùt àtɨ̂n yen su a se wuna kaha kolo yena tu luk.

⁸Ghɨt ghe ghɨ ndùku chyə bakhe ha wûn nì ghê ghɨ chehì yena wûn wu lonâ hì bufa na, “Ba wùna mò wut wù lonana we?”

⁹Ghɨt ale hì bimî jîsà na, à mò wûn, ghɨ le tunhê jîsà na “Ngàŋ, wù fune yi funâ.” Nâ wùt àtɨ̂n nì ngɨŋ à wûn jis na, “À mò kə nâ mu.”

¹⁰Ghɨna buf ha wun na, “Wò gbi yàni hi tè yen a tu luk agha?”

¹¹Wùt àtɨ̂n fîsì na, “Wùt wuna ghɨ toŋte na Jisòs ni, ye lamli bûtù yokle a mu sê jis na mu yê su kə̂k yi mi a chɨ̀m a Silwàn, mu ti yen sû, kə wu yu hì yenâ!”

¹²Ghɨna buf ha wun na, “Wùt àtɨ̂n lâ?” Wù fîsì na yi khə wi.

¹³Ghɨ lyi yên nì wùt we ghɨ chwuka yâ ha ghɨt a Falàsî.

¹⁴À ndùku mô ni ma Jisòs tì lamli bût wûn chwuk wut mu wuna wu tuk wu laku.

¹⁵Ni ghɨt a Falàsî mu ghê ki buf ha wùt mu we na wù gbi yàni hi tè yen a tu luk agha? Wù jis na, “Jisòs ye lamli wu bût yokle a mu sê, mu ti yen su kə̂k yi mi kə wu yu hì yenâ.”

¹⁶Ghɨt a Falàsî ghɨ le jis na, “Wùt mu wuna wijə wut à Fùyèn beka wù bama wi tuk wu laku.” Biyani ghɨ le hì jîsà na wùt wù gha be wi hi tè nè gha kanana ni. Kə wu yu jyàhè wùna gan a ghɨna fùtɨ̂n.

¹⁷Ghɨ motì kə ni ghɨna fî kaha buf ha wùt we Jisòs tì chwuka ya na, “Nâ wò kwàktè na ghə kum wûn? À we wù ye chwuka se gha.” Wùt àtɨ̂n fîsì kə na, “Wù mò fòktì wù chìk.”

¹⁸Chichàsu ghɨt a Jûs hì bime wi na wùt wuna ndùku mô ma wù ti fêf shyəma wù kahè hi yena luktu. Yi ghak ghɨna, ghɨna toŋa bè wûn nì nè wûn,

¹⁹ki buf ha ghɨna na, “Wùna mò wan wânù? We a ghɨ jîsà na ghɨ tì bwɨ ma wù ti fêf, wù che gbi yàni hi tè yen a tu luk chin agha?”

²⁰Ghɨna bimî jis na, “Ghàh khəlò na à mò wan wâhù, khə na ghɨ tì bwɨ wun ma wù ti fêf.

²¹Biyani khə wi na wù gbi yàni hi tè yen a tu luk chin khə wi na à wûn chwuk nde agha? Ghàn buf ha wûn, wù fi wijə wan wù bot. Nâ wûn làhi fòktì gha ye yi gana.”

²²Bè wûn ghê nè wûn ndùku jîsà ni beka ghɨna ndùku fânà chichàsu ghɨt a Jûs. Chichàsu ghɨt a Jûs ndùku mô ma ghɨ ti lem na à tok nâbi nde na Jisòs mò wùt we ghɨ chwoka lema ma ghɨ jum wûn ma wù nê hi fê lye wi a ndâ yi yùŋtì.

²³À nì mò gha ye bè wûn ghê nè wûn tì fise na, “Wù fi wijə wan wù bot. Ghàn buf ha wûn.”

²⁴Ghɨna fî kunti toŋa wùt wù fèfana àtɨ̂n jis ha wun na, “Fo kokhînì ha Yènfù beka ghàh khəlò na Jisòs wunâ mò wut à gha be.”

²⁵Wù fî fîsì kə na, “Kə à mò wut à gha be makə wù jùŋ, mu khə kə yi gha yì mòk, na mu chehì yena wi luktu, mu wu hì yena chîn!”

²⁶Ghɨna fî buf na, “Wù ye ni nâ ghə ha wò na wò hi yena luktu?”

²⁷Wùt àtɨ̂n jis na, “Mu ye hì mô ma mu ti fôktì ha ghàn, ghàn kôŋà wi hi yû. Ghàn fè bufa hi nè ghə? Yi kə̂kà te ghàn boŋa khɨŋa hi gàn a jùmtìbàmsù wunsu ma?”

²⁸Ghɨna hì sûlè wun jîsà na, “À mò kəbi wò jùmtìbàm à wùt wunâ! Ghàh mò jùmtìbàmsù Musìs sù.

²⁹Ghàh khə na Yènfù ti jis ha Musìs, biyani khə wi nâ Jisòs mu wuna lo afa agha?”

³⁰Wùt wu fèfana àtɨ̂n fîsì na, “À mò yi gha yi kanani na ghàn khə wi na wù lo afa, biyani ma wù ti ni mu wu hì yena luktu!

³¹Ghàhnà khəlò na Yènfù yute wi ha ghɨt a be, biyani ywô ha ghɨt ghe ghɨna ngumle wûn gbê te wù khɨŋa.

³²Nâ te mbyî tì yìme, ghɨ tà yu jə na ghɨ ti bwɨ wùt wu yena wi luktu, wùt nî wù hì yenâ.

³³Wùt mu wuna ye hì bu wut à Fùyèn ma wù wi hi nè a gha ni.”

³⁴Ghɨt atɨ̂na jis na, “Wò mò ni ma ghɨ tì bwɨ wò atɨ̂n à be wo ləma kwôk kə atɨ̂n, wò wu hì khɨŋa hi tè yike ghàh.” Te ghɨna jìsa ni jum fihi wun a ndâ yì yùŋtì.

³⁵Jisòs yu na ghɨ ti jum fihi wùt we wù tì chwuka ya a ndâ yi yùŋtì, khɨŋ yen yen wûn buf ha wun na, “Wò ti bimi ha Wâ Wùt agha?”

³⁶Wù fîsì na, “Wâ Wùt mu we mò nde a bèbɨn? Fokti ha mu ma mu bimi ha wûn.”

³⁷Jisòs jis ha wun na, “Wò hì mô ma wò ti yen wûn. À mò kə nâ wun we wù jìsà ha wò chin ni.”

³⁸Wùt wù fèfana àtɨ̂n ki jîs na, “Mu ti bimî a Bâba!” Hì kokhe Jisòs.

³⁹Jisòs ki jîs ha wun na, “Mu ben a mbye afân hi banhe sah a ghɨ̂tà hi nì na ghɨta fefana hi yena luktu, ma ghe ghɨna khə na ghɨna yenalò, ma ghɨ hi fê yena wijə.”

⁴⁰Ghɨt a Falàsî ale ghe ghɨna ndùku mô afû buf ha wun na, “Wò jìsà ni yi chwûtè na ghàh ti boŋ fef ma?”

⁴¹Jisòs jis ha ghɨna na, “Ghàn ye hì bime na ghàn yena wi ma be sanisu wijə a ghàn a tû. Biyani chin te ghàn lèma na ghàn yenalò be sanisu ti faŋ a ghàn a tû.”