Read Bum Fêt 1 Bible Online

Fêt 1 - Bum bible

Fêt 1

¹Bèbɨn Tìyofilòs, à ndùku mô a ŋwàklù mì yì shyə̂ ha wò, mu nyak nâ gha à jɨ̀m te Jisòs tì yìme hi tè nì fê yike à ghɨ̂t,

²hi bè tàn te Yènfù tì lye kwoka wun a nyə̂. À ndùku mô shyəma ghɨ lyê kwok nì wûn a nyə̂, Yohnà Yulena nî, wù yiki a gha ghe ghɨt a wuna ghɨ tuma ghe wù tì chwokte, mò hi tè nì.

³À hì mô te Jisòs yena ngə̂k yì chìk kpulò kaha lôtì a yi kpû, wù chwûtì ngɨŋ à wûn ha ghɨt a wuna ghɨ tuma na yi ti lôtì a yi kpû hamok. Wù ni yâ a tu lum a tu lûm nâ a ghan a dona atɨ̂n à tuk mkìk, fî jîs ha ghɨna kum fə̂n wù Fùyènù.

⁴Tuku yû tuk wule, wù chyâhì yi sak ha ghɨna na, “Kə ghàn lo a Jèlusalèm chîn. Ghàn yuti fo ye mu tì fòkte ha ghàn na Bom ti chwûnà hi fo ha ghàn.

⁵Jon ndùku fo mòlû ha ghɨta kə nâ nì mòlû mù jwò, biyani a lân wu hì mô ma faŋ kə mu tuk mù sek ni shyəma ghɨ fo mòlû ha ghàn nì Yohnà Yulena.”

⁶Tuk yû tuk wule, ghê ghɨna hì fê chîntè mô kə wu luk wù mòk, ghɨt a wuna ghɨ tuma shìki buf ha wun na, “Bâba, yu ti kpên shyəma wò ni ma ghɨ kahà fo fə̂nù ha ghɨt a Isalì agha?”

⁷Jisòs fîsì ha ghɨna na, “À wijə wu luk wanu hi tè khə wu tuk makə yu we Bom che lema kə nâ hi nè a gha ghɨ̂n nì jyak a wuna,

⁸biyani ghàn hi khə na ghàn nè khɨtelò jyaka, a wu yu afa Yohnà Yulena bèna ha ghàn ma ghàn bê fòkti kum mu a Jèlusalèm nì Jùdiyà yì jɨ̀m nì Sàmaliyà nì bûlà tu mbyi tu tù jɨ̀m.”

⁹Te wù jìsa mihe gha mɨ ghɨ̂n, Yènfù lyi kwok wun a nyə̂, ghɨna hì ke te wù kwoka. Wù kwok kə ni, lyi ləhàlò atɨ̂n à sìmbàk.

¹⁰Ghɨt a tum ghê hì baha ke kə a nyə̂ te Jisòs yènà, ghɨt a lɨmànà ale bûŋhì timi a ghɨna ngwùŋ, à bà ma ghɨna ti mak njumù, fufamù,

¹¹buf ha ghɨna na, “Njwô ghə te ghàn time hì ke kokhe a nyə̂ ni a ghɨt a Galìlî? Jisòs wunâ a ghɨ lye a ghàn a fùtɨ̂n kwok a nyə̂ ni, bè kaha bênà kə wu lum afân a ghàn yena wu yênà atɨ̂n.”

¹²Ghɨt a Jisòs ghɨ tuma lo a kùn à mù kàk mù Olìfs kaha chwo a Jèlusalèm, lum wu tɨnu dâfà wi, wu chyâtè kə bəh a mâl fùjiti.

¹³Ghɨna ben tan a Jèlusalèm lyi kwok yen atɨ̂n à ndâ afa ghɨna ndùku chyə atɨ̂n a nyə̂. A mô Bità nì Jon nì Jêms nì Andùlù, a mô Filîp nì Tomòs a mô Bàtòlòmiyà nì Màtiyò nì Jêms wâ Àfeyòs, nì Samùn wùt lùmana, a fê mô Judàs wâ Jêms.

¹⁴A mô yâ ghɨna yûŋtè nê yi jə̂m ghê ywen ale nì Mèli, nè Jisòs nì wana ne wuna.

¹⁵À hì mô tuk lefu, ghɨta hì fê mô kəbi wu luk wù mòk, tanà ghɨt wu wə nì mbà, Bità lôtì timî hì jîsà ha ghɨna jyâna,

¹⁶“Wana noma gha ghɨ̂n ghɨ che gana kum Judàs ni chehì kəta hi gàn hi lunhe gha ye Yohnà Yulena tì ne Defìt jis, ghɨ fî nyak a ŋwàklù Fùyèn kum wûn we wù che chwute Jisòs chìnsù ndâ Fùyènsu che khɨtî.

¹⁷Judàs chehì mô wut a ghàhnà nòn beka Bâba chehì mô ma wù ti chwok wûn na ghàhnà ghɨna hi yûŋtè fêtà amok.”

¹⁸“À ndùku mô ma Judàs ti lyi ka we ghɨ tì làka wûn atɨ̂n a yi gha bəmani afa wù tì mòmà yun wu luk wu fu chyə atɨ̂n, yi bàm yi tɨ̂n fen kpu kə wu lùk afân, lâ wunu bûkà mwə̀ mù wûn mu là fwu kə mù jɨ̀m.

¹⁹Nâ ghɨt à jɨ̀m a Jèlusalèm yu gha ye yi gana ha Judàs hì toŋte luk wu fu chyə mu we a ghɨna yi jìs na, Akèdamà, yi chwûtè na à mò fuk à mu luŋa.

²⁰“Ghɨ ti nyak a ŋwàklù Sù njàŋ na, ‘Ndâ wûn faŋ à kə yi yîm, kə wùt bè chyə atɨ̂n,’ fî nyak kəbi na, ‘Wùt wù lò lyi luk wu wunu, ma wù hi fêtà.’

²¹Bità fôktì ni ki jîs na, ‘Yi chwûtè na ghàhnà kəta hi chwoka wùt ma wù chinti a ghàhnà nòn ma wù hi fôktè ha ghɨta na Jisòs ti lôtì a yi kpû. A kəta hi tè mò wut we ghàhnà ghɨna chehì gbê kwoka amok a Jisòs yi bàm, hi yìmì kə te Jon ndùku fo mòlû ha ghɨta hi kwok a tàn te Yènfù tì lye Jisòs a ghàhnà fùtɨ̂n kwok nì wûn a nyə̂.’”

²³Ghɨna fo a yet à bà, a mô Josèf we wu kəta a yet à bà yile mô na Bàsabàs, yile mô Jûstùs, wùlè mô Màtiyàs.

²⁴Ghɨna ni yâ ki jə̂m jîsà na, “Bâba, wò khəlò nâ təm a ghɨta à jɨ̀m, chwuti wùt we wò chwoka atɨ̂n à ghɨt afân à bà

²⁵na wù lyi luk wu Judàs ma wù hi nê fêtì te wut wâ wu tum we wù che de yen hì mô a wun wù lùk wu ngəku.”

²⁶Ghɨna jis ni de gha tɨni ha Yènfù, yet yi Màtiyàs fwu kwôk ghɨ bakhi wun a nòn a ghɨt a tuma njwò yì mòk.