Read Bum Fêt 11 Bible Online

Fêt 11 - Bum bible

Fêt 11

¹Ghɨt a tuma Jisòs nì ghɨt a bimena ale ndùku mô a yi lak yi Jùdiyà yu na tumu ti boŋ yu gha Fùyènì.

²À mô te Bità kwoka a Jèlusalèm, ghɨt a bimena Jûs hì ngane wûn,

³jîsà na, wù chehì gbê chyâ lye tumu sù ndâ yə ghê ghɨna, teka ghɨ fati ghɨna.

⁴Bità fôktì kwok nâ gha à jɨ̀m ghe ghɨ ndùku mô ma ghɨ ti gân.

⁵Wù jis na, “Mu ndùku mô a yi tèk yi Jobà jə̂mà bâh a chika à shyə̀ ale fwu a mu yi kə̀k te ghɨ fwo a jem, mô te bâh à sùnjwo chika, ghɨ chwohe bênà nì ghɨna a nyə̂, ma ghɨ ti ghaŋhi soŋa tɨna à kìk, ghɨ chwohi tom a mu ngwùŋ.”

⁶Mu shihi tòkà kî, yen nyamsu ndasu nì su ngunsu nì mwə̀ mù ŋàŋlemù nì nyɨ̀mû,

⁷fî yu Yènfù jîsà ha mu na ‘Bità lòti ywiti mwə̀ munâ ma wò kut.’

⁸Biyani mu jis na, ‘Mu wi hi mòm a Bâba beka shyə ale tà timi lyi jə a mu yi jwô sak yahi yi laki bime wi.’

⁹Yènfù fî jis kə na ‘Mu ki lem na shyə yule kpenalò hi yə̂, kə wò jìs na sak yahi yi laki bamalò.’

¹⁰Wù jis ni hi tàn a ghan à tât, ghɨ kaha kwok nì mwə̀ mù tɨ̂n a nyə̂ nâ mù jɨ̀m.

¹¹À hì mô kə wu yu mefû, ghɨta ben à tât a ndâ afa mu ndùku chyə atɨ̂n ma ghɨ tum ghɨna a Sìsaliyà na ghɨna bê yen mu.

¹²Yohnà Yulena jis ha mu na, kə wò wunhi hi yèn ghàn à ghɨna. Ghɨt a bimena ghɨ̂n tufa a mu lye a Jobà ben nì ghɨna, ghàh à ghɨna yen amok a Sìsaliyà yen lye a wùt lè ndâ ghɨ toŋte na Kònilùs.

¹³Wù fôktì ha ghàh te wù ye yena anjèl à Fùyèn yi mô a wun a ndâ. Anjèl à Fùyèn àtɨ̂n jis ha wun na ‘Tum wùt ma wù yen a Jobà ma wù yê toŋa wùt afû yet yi wuni mô Samùn Bità.

¹⁴Wù nè bê fòktèlò gha ha wò ma ghɨ bonhi wò nì ghɨt gha ghɨ sah yi ndâ nâbi nì ghɨt gha ghɨ fetana.’

¹⁵Kə wu yu te mu yìme hi jìs ha ghɨna Yohnà Yulena ben ha ghɨna kəbi te ghɨ tì bèna ha ghàhnà a yìmi.

¹⁶Mu kaha kwâktì gha ye Bâba tì jîsà na, ‘Jon ndùku fo mòlû ha ghɨta nì mòlû mù jwò, biyani Yènfù mô hi nè fo mòlû ha ghàn nì Yohnà Yulena.’

¹⁷Mu ki yen hamok na, “Yènfù ti fo Yohnà Yulena ha tumu kəbi te fu tì fo ha ghàhnà a wu tuk afa ghàhnà tì bime ha Bâba Jisòs Klistù, ma mu nê hi mô nâ nde hi tàmtè gha ye Yènfù kəta hi nì agha.”

¹⁸À hì mô te ghɨt a Jûs ghɨ bimena ywo kwoka nì gha ye Bità jìsa, ghɨna tê fè jìs gha yile kum wûn, hì kokhe Yènfù jîsà na, “Ghàhnà ti yên na Yènfù ti boŋ fo lumu ha tumu na ghɨna kahi təm a ghɨna a ghɨna gha be ma ghɨna khɨti chyəna ghe ghɨ bè mê wi.”

¹⁹Ghɨt a bimena ghe ghɨ tì teta kum ngə̂k yê yì ndùku mô te ghɨ ywe Sìtifèn ti gbî yen tan a yi lak yi Fònisiyà nì lak yi Sàybulòs nì tèk yi chik yile ghɨ toŋte na Antiyòk. Ghɨna hì fôktè yênà nì tum yì jùŋ kə ha ghɨt a Jûs.

²⁰Biyani ghɨt a bimena ghɨ le fwu ben a Sàybulòs nì tèk yì Sìlên yen kəbi a Antiyòk hì fôktè yênà tum yì jùŋ ha tumu kum Bâba Jisòs.

²¹Yènfù gâmtì ghɨna nâ haŋaŋ, ghɨt a dona bimî samhi ha Bâba.

²²Ghɨt a bimena ghê ghɨ ndùku mô a Jèlusalèm, yu kum gha mi yîn, tum Bànabâs na wù yen a Antiyòk.

²³Wù yen afû, yen te Yènfù chwùtè təm a jûŋà ha ghɨna, wù hì saŋlê nâ haŋaŋ, chyati ghɨna na kə ghɨna bè de hi jùmtè Yènfù nì təm a ghɨna à jɨ̀m.

²⁴Bànabâs we ghɨ tì chinhe afû ndùku mô kə nâ wùt wù jùŋ, fate kəta yi bimî ma wù ti lûn nì Yohnà Yulena. Ghɨta bime Yènfù kum wûn dô kə ni.

²⁵Bànabâs fî lô yen a yi tèk yi Tasùs hi khɨŋa Sôl.

²⁶À hì mô te wù khɨŋa yena wûn, wù lyi yen nì wun a Antiyòk, ghê wûn chyə kwok afû a lɨ̀m à fublànà, yike ghɨt a bimena afû ghɨ dô kə ni. Ghɨ tì yìmi hi tè toŋte jùmtìbàmsù Klistù su na Klistènsù a Antiyòk.

²⁷À hì mô kəbi a mu tuk afû, fòktì sulesu lo a Jèlusalèm chwo a Antiyòk,

²⁸yìlè mô a ghɨna fùtɨ̂n yet yi wuni mô Àgabùs. Yohnà Yulena tihe wûn, wu lôtè time atɨ̂n à chìnti fôktè te jìŋ yì kanana nè kwo kə lak tù jɨ̀m. Jìŋ mi yina bè bênà a mô Kɨ̀lodiyàs fə̀n wù chìk.

²⁹Jùmtìbàmsu Bâba se su ndùku mô afû ki lem na nâbi nde kəta hi chinhe yi gâmtì ha ghɨt a bimena a Jùdiyà.

³⁰Ghɨna yûŋtì mwə̀ mù tɨ̂n tum Bànabâs ghê Sôl na ghɨna lyê yê fo ha chəhsu afû.